Amit Shah Unveils Key Strategy: చొరబాట్లను అడ్డుకునేందుకు ‘స్మార్ట్ బోర్డర్’ ప్లాన్: అమిత్ షా

Amit Shah Unveils Key Strategy: సరిహద్దు చొరబాట్లను ఎట్టి పరిస్థితుల్లోనూ సహించేది లేదని కేంద్ర హోం మంత్రి అమిత్ షా స్పష్టం చేశారు. జీరో టాలరెన్స్ విధానాన్ని అనుసరిస్తూ, దేశ సరిహద్దులను పూర్తిగా మూసివేసేందుకు ఒక సంవత్సరంలోగా సమగ్ర 'స్మార్ట్ బోర్డర్' ప్రణాళికను అమలు చేస్తామని ప్రకటించారు. అక్రమ వలసదారులందరినీ గుర్తించి వెనక్కి తిప్పిపంపుతామన్నారు.

న్యూఢిల్లీలోని విజ్ఞాన్ భవన్‌లో శుక్రవారం బీఎస్ఎఫ్ (సరిహద్దు భద్రతా దళం) సిబ్బంది సమావేశంలో అమిత్ షా మాట్లాడారు. అక్రమ వలసలను దేశ జనాభా స్వభావాన్ని మార్చేందుకు ఉద్దేశపూర్వకంగా జరుగుతున్న కుట్రగా వివరించారు. దేశ డెమోగ్రాఫిక్స్‌ను రక్షించడానికి ప్రతి అక్రమ వలసదారునీ గుర్తించి బహిష్కరిస్తామని హామీ ఇచ్చారు.

6,000 కిలోమీటర్ల అంతర్జాతీయ సరిహద్దు వెంబడి అభేద్యమైన భద్రతా గ్రిడ్ ఏర్పాటు చేస్తామని చెప్పారు. 'స్మార్ట్ బోర్డర్' కాన్సెప్ట్ కింద రాడార్లు, అధునాతన కెమెరాలు, డ్రోన్లు వంటి అత్యాధునిక సాంకేతికతతో బీఎస్ఎఫ్‌ను సన్నద్ధం చేస్తామని వివరించారు.

బీఎస్ఎఫ్ సిబ్బంది రాష్ట్ర పోలీసులు, జిల్లా కలెక్టర్లు, గ్రామ పట్వారీలతో సమన్వయం చేసుకుని ఇంటెలిజెన్స్ నెట్‌వర్క్‌ను విస్తరించాలని సూచించారు. పశువుల అక్రమ రవాణా మార్గాలు, చొరబాటుదారులను గుర్తించాలన్నారు. పశ్చిమబెంగాల్, అస్సాం, త్రిపుర రాష్ట్రాలను కలుపుకుని భద్రతా గ్రిడ్ ఏర్పాటు చేస్తామని, మూడు రాష్ట్రాల ముఖ్యమంత్రులతో త్వరలో సమావేశం ఏర్పాటు చేస్తామని తెలిపారు.

వామపక్ష తీవ్రవాదాన్ని సమూలంగా నిర్మూలించినట్లే చొరబాటుదారులపై కఠిన చర్యలు తీసుకోవాలన్నారు. ఫ్రంట్‌లైన్ జవాన్లకు సహకరించేందుకు ఉన్నత స్థాయి డెమోగ్రఫీ మిషన్‌ను త్వరలో ప్రారంభిస్తామని ప్రకటించారు.

బీఎస్ఎఫ్ సేవలను అమిత్ షా ప్రశంసించారు. 1965లో 25 బెటాలియన్లతో ప్రారంభమైన బీఎస్ఎఫ్ ఇప్పుడు 2.7 లక్షల మందితో ప్రపంచంలోనే అతిపెద్ద సరిహద్దు రక్షణ దళంగా అవతరించిందని అన్నారు. ఎలాంటి సవాళ్లనైనా ఎదుర్కొని దేశ భద్రతను కాపాడిన జవాన్లను సన్మానించారు. "భారత్ ఎన్నటికీ తలవంచదు" అని ఉద్ఘాటించారు.