Southern Zonal Council Meeting: మామల్లపురంలో సదరన్‌ కౌన్సిల్‌ సమావేశం.. చంద్రబాబు, విజయ్‌తో పాటు దక్షిణాది సీఎంలు హాజరు

Southern Zonal Council Meeting: కేంద్ర హోం మంత్రి అమిత్‌షా అధ్యక్షతన తమిళనాడులోని చారిత్రక పట్టణం మామల్లపురం (మహాబలిపురం)లో దక్షిణ మండలి (సదరన్‌ కౌన్సిల్‌) సమావేశం గురువారం కొనసాగుతోంది. దక్షిణాది రాష్ట్రాల సమస్యలను చర్చించి పరిష్కార మార్గాలు వెతకడమే ఈ సమావేశం ముఖ్య ఉద్దేశం.

ఈ కీలక సమావేశానికి ఆంధ్రప్రదేశ్‌ ముఖ్యమంత్రి నారా చంద్రబాబు నాయుడు, తమిళనాడు ముఖ్యమంత్రి విజయ్‌, కర్ణాటక ముఖ్యమంత్రి డీకే శివకుమార్‌, కేరళ ముఖ్యమంత్రి సతీశన్‌, తెలంగాణ డిప్యూటీ సీఎం భట్టి విక్రమార్కతో పాటు ఇతర అధికార ప్రతినిధులు హాజరయ్యారు. సమావేశం ప్రారంభానికి ముందు సీఎం చంద్రబాబు ఇతర దక్షిణాది ముఖ్యమంత్రులను కలుసుకుని స్నేహపూర్వకంగా మాట్లాడుకున్నారు. ఈ భేటీల సందర్భంగా తీసిన ఫోటోలను ఆంధ్రప్రదేశ్‌ సీఎం కార్యాలయం ‘ఎక్స్‌’ సోషల్‌ మీడియా ఖాతాలో పోస్ట్‌ చేసి ప్రజలకు అందించింది.

సమావేశంలో దక్షిణాది రాష్ట్రాలకు సంబంధించిన అనేక కీలక అంశాలపై విస్తృత చర్చ జరిగింది. కేంద్రం నుంచి రాష్ట్రాలకు కేటాయింపులు, అభివృద్ధి పథకాలు, నీటి వనరుల పంపిణీ, విద్యా విధానాలు వంటి విషయాలు ప్రధానంగా చర్చకు వచ్చాయి. ముఖ్యంగా నీట్‌ పరీక్షల వివాదం, కావేరి నదీ జలాల పంపిణీ సమస్య, నియోజకవర్గాల పునర్విభజన వంటి అంశాలపై దక్షిణాది ముఖ్యమంత్రులు తమ రాష్ట్రాల అభ్యంతరాలను, ఆందోళనలను కేంద్ర హోం మంత్రి అమిత్‌షా దృష్టికి తీసుకెళ్లారు. ఈ సమస్యలపై సమగ్ర పరిష్కారం కావాలని వారు నొక్కి చెప్పారు.

సదరన్‌ కౌన్సిల్‌ సమావేశం దక్షిణాది రాష్ట్రాల సమన్వయం, సహకారం పెంపొందించడంతో పాటు కేంద్ర-రాష్ట్ర సంబంధాలను మరింత బలోపేతం చేయడానికి మార్గం సుగమం చేస్తుందని అంచనా. సమావేశం ఫలితాలు త్వరలోనే అధికారికంగా వెల్లడయ్యే అవకాశం ఉంది.