Major Reshuffle in the Union Cabinet: కేంద్ర మంత్రివర్గంలో భారీ పునర్వ్యవస్థీకరణ ఊహాగానాలు!

వర్షాకాల సమావేశాలకు ముందే ప్రధాని మోదీ కీలక మార్పులు?

Major Reshuffle in the Union Cabinet: కేంద్ర మంత్రివర్గ పునర్వ్యవస్థీకరణపై ఢిల్లీలో మళ్లీ తీవ్ర ఊహాగానాలు చోటు చేసుకున్నాయి. పార్లమెంట్ వర్షాకాల సమావేశాలు జూలై 20న ప్రారంభం కావడంతో, అంతకు ముందే ప్రధాని నరేంద్ర మోదీ క్యాబినెట్‌లో భారీ మార్పులు జరగడం ఖాయమని రాజకీయ వర్గాలు అంటున్నాయి.

మంగళవారం సాయంత్రం ప్రధాని మోదీ రాష్ట్రపతి ద్రౌపది ముర్మును కలుసుకుని కీలక సమాలోచనలు జరిపారు. ఈ నేపథ్యంలో రెండు కీలక పరిణామాలు మంత్రివర్గ మార్పులకు బలం చేకూర్చాయి. కేరళకు చెందిన కేంద్ర మైనారిటీ వ్యవహారాల సహాయ మంత్రి జార్జి కురియన్ బుధవారం తన పదవికి రాజీనామా చేశారు. ఆయన రాజ్యసభ పదవీకాలం ఈ నెల 21న ముగిసినా, తిరిగి నామినేషన్ ఇవ్వలేదు. అలాగే రైల్వే శాఖ సహాయ మంత్రి రవనీత్ సింగ్ రాజ్యసభ పదవీకాలం కూడా ముగిసినా రెన్యువల్ దక్కలేదు.

ఇక కేంద్ర రవాణా, రహదారులు, కార్పొరేట్ వ్యవహారాల సహాయ మంత్రి హర్ష మల్హోత్రాను గత నెలలో ఢిల్లీ బీజేపీ అధ్యక్షుడిగా నియమించగా, ఆర్థిక శాఖ సహాయ మంత్రి పంకజ్ చౌదరికి ఉత్తరప్రదేశ్ బీజేపీ బాధ్యతలు అప్పగించారు. ఈ పరిణామాలతో మంత్రివర్గంలో మరికొందరు మంత్రులకు ఉద్వాసన తప్పదని, కొత్త ముఖాలకు అవకాశం లభించే అవకాశం ఉందని చర్చ జరుగుతోంది.

ముఖ్యంగా ఈసారి కేంద్ర మంత్రివర్గంలో 33 శాతం మహిళలకు చోటు దక్కే అవకాశం ఉందని రాజకీయ వర్గాలు భావిస్తున్నాయి. దీంతో పలు రాష్ట్రాల మహిళా ఎంపీలు ఢిల్లీలోని పెద్దలతో సంప్రదింపులు మొదలుపెట్టినట్లు తెలుస్తోంది.

పార్టీ పునర్వ్యవస్థీకరణపైనా దృష్టి:

క్యాబినెట్ మార్పులకు ముందే బీజేపీ పార్టీ పునర్వ్యవస్థీకరణపై కూడా అధిష్ఠానం దృష్టి సారించింది. జీ7 సమావేశాలు ముగించుకుని ఢిల్లీ చేరుకున్న ప్రధాని మోదీ, బీజేపీ జాతీయ అధ్యక్షుడు నితిన్ గడ్కరీని లూధియానా నుంచి ఢిల్లీకి పిలిపించి సమాలోచనలు జరిపారు.

కురియన్‌కు గవర్నర్ పదవి అవకాశం?

జార్జి కురియన్ హఠాత్తుగా రాజీనామా చేయడం రాజకీయ వర్గాల్లో చర్చనీయాంశమైంది. కేంద్ర క్యాబినెట్‌లో ఏకైక క్రైస్తవ మంత్రి అయిన కురియన్ సోషల్ మీడియాలో స్పందిస్తూ, ప్రధాని మోదీ వల్లే తనకు ఈ అవకాశం లభించిందని, ఇది తన కలలో కూడా ఊహించని విషయమని పేర్కొన్నారు. ఆయనను ఏదో ఒక కీలక రాష్ట్రానికి గవర్నర్‌గా నియమించే అవకాశాలు ఉన్నట్లు తెలుస్తోంది.

బుధవారం జరిగే కేంద్ర క్యాబినెట్ భేటీలో పార్లమెంట్ సమావేశాలపై కీలక నిర్ణయాలు జరగడం ఖాయమని సమాచారం. మొత్తం మీద కేంద్ర మంత్రివర్గంలో భారీ మార్పులు జరగనున్నట్లు రాజకీయ దృశ్యం సంకేతాలు ఇస్తోంది.