Tarique Rahman Sworn In as Bangladesh Prime Minister: తారిఖ్ రెహమాన్ బంగ్లాదేశ్ ప్రధానిగా ప్రమాణ స్వీకారం.. మోదీకి ఆహ్వానం!

Tarique Rahman Sworn In as Bangladesh Prime Minister: బంగ్లాదేశ్‌లో బంగ్లాదేశ్ నేషనలిస్ట్ పార్టీ (బీఎన్‌పీ) భారీ విజయం సాధించిన నేపథ్యంలో, ప్రభుత్వ ఏర్పాటు ప్రక్రియ వేగంగా సాగుతోంది. మాజీ ప్రధానమంత్రి ఖాలిదా జియా కుమారుడు, బీఎన్‌పీ ఛైర్మన్ తారిఖ్ రెహమాన్ దేశ ప్రధానమంత్రిగా బాధ్యతలు స్వీకరించనున్నారు. ఆయన ప్రమాణ స్వీకార వేడుకకు భారత ప్రధానమంత్రి నరేంద్ర మోదీతో పాటు పలు దేశాల నేతలను ఆహ్వానించాలని బీఎన్‌పీ ఆలోచిస్తోంది. దక్షిణాసియా దేశాలపై ప్రత్యేక దృష్టి సారించినట్లు సమాచారం.

మోదీ ఈ కార్యక్రమానికి హాజరైతే, భారత్-బంగ్లాదేశ్ సంబంధాల్లో ఇది కీలక మలుపుగా నిలవనుంది. 2024 ఆగస్టులో విద్యార్థుల ఉద్యమం ఫలితంగా షేక్ హసీనా ప్రభుత్వం కూలిపోయిన విషయం తెలిసిందే. అప్పటి నుంచి మహమ్మద్ యూనస్ నేతృత్వంలో తాత్కాలిక సలహా మండలి దేశ పాలనను నిర్వహిస్తోంది. ఈ కాలంలో రెండు దేశాల మధ్య దౌత్యపరమైన ఉద్రిక్తతలు తలెత్తాయి.

బీఎన్‌పీ విజయం సాధించిన వెంటనే భారత్ నుంచి సానుకూల సందేశం వచ్చింది. ప్రధానమంత్రి నరేంద్ర మోదీ తారిఖ్ రెహమాన్‌కు ఫోన్ చేసి అభినందనలు తెలిపారు. ఆయన నాయకత్వంపై ప్రజలు చూపిన విశ్వాసానికి ఈ ఎన్నికలు నిదర్శనమని మోదీ పేర్కొన్నారు. దీనికి బీఎన్‌పీ ధన్యవాదాలు తెలిపింది.

తారిఖ్ రెహమాన్ ప్రమాణ స్వీకారం త్వరలో జరిగే అవకాశం ఉంది. ఈ ఆహ్వానం రెండు దేశాల మధ్య సంబంధాలను మెరుగుపరచడంలో సానుకూల పాత్ర పోషిస్తుందని రాజకీయ విశ్లేషకులు అభిప్రాయపడుతున్నారు. దక్షిణాసియాలో సహకారం, స్థిరత్వం కోసం ఇది ముఖ్యమైన అడుగుగా చెప్పవచ్చు.