Tensions Continue for Second Day in Kashmir: కశ్మీర్‌లో రెండో రోజూ ఉద్రిక్తత: ఖమేనీ హత్యకు నిరసనలు, 14 మందికి గాయాలు

Tensions Continue for Second Day in Kashmir: ఇరాన్ సుప్రీం నేత అయతుల్లా అలీ ఖమేనీ హత్యను తీవ్రంగా ఖండిస్తూ జమ్మూ కశ్మీర్‌లో రెండో రోజూ నిరసనలు ఊపందుకున్నాయి. శ్రీనగర్‌తో పాటు కశ్మీర్ లోయలోని వివిధ ప్రాంతాల్లో వేలాది మంది ప్రజలు సోమవారం రోజంతా ఆందోళనలకు దిగారు.

బెమినా, గుండ్ హస్సీ బాట్, జహంగీర్ చౌక్, పుల్వామా వంటి ప్రాంతాల్లో పెద్ద ఎత్తున నిరసనలు జరిగాయి. అదేవిధంగా చినాబ్ ప్రాంతంలోని దోడా, కిశ్త్‌వాడ్, రాంబన్ జిల్లాల్లో కూడా ప్రజలు రోడ్లపైకి వచ్చి తమ నిరసనను నమోదు చేశారు. ఈ నిరసనల నేపథ్యంలో అనేక చోట్ల దుకాణాలు, వ్యాపార సంస్థలను స్వచ్ఛందంగా మూసివేశారు.

విద్యార్థుల భద్రతను దృష్టిలో ఉంచుకుని ప్రభుత్వ, ప్రైవేటు విద్యాసంస్థలకు రెండు రోజుల పాటు సెలవు ప్రకటించారు. నిరసనకారులు అమెరికా, ఇజ్రాయెల్ దేశాలకు వ్యతిరేకంగా బలమైన నినాదాలు చేస్తూ ఆగ్రహం వ్యక్తం చేశారు.

పరిస్థితులు ఉద్రిక్త రూపం సంతరించుకోవడంతో పోలీసులు, భద్రతా బలగాలు విస్తృతంగా మోహరించాయి. నిరసనకారులపై ఆంక్షలు విధించడంతో పాటు మొబైల్ ఇంటర్నెట్ సేవల వేగాన్ని తగ్గించారు. వివిధ ప్రాంతాల్లో సాయుధ బలగాలతో నిరసనకారుల మధ్య ఘర్షణలు చోటుచేసుకోవడంతో మొత్తం 14 మంది గాయపడ్డారు. వీరిలో ఆరుగురు భద్రతా సిబ్బంది ఉన్నట్లు అధికారులు తెలిపారు.

పరిస్థితిని అదుపులోకి తెచ్చేందుకు భద్రతా బలగాలు కృతనిశ్చయంతో ఉన్నాయి. మరిన్ని ఘర్షణలు జరగకుండా చర్యలు చేపట్టినట్లు స్థానిక అధికారులు పేర్కొన్నారు.