Asia Cup 2025: చెలరేగిన అభిషేక్ శర్మ.. పాక్ చిత్తు

Asia Cup 2025: ఆసియా కప్ 2025లో భాగంగా దుబాయ్ ఇంటర్నేషనల్ స్టేడియంలో జరిగిన సూపర్-4 మ్యాచ్‌లో భారత్, పాకిస్తాన్‌పై 6 వికెట్ల తేడాతో ఘన విజయం సాధించింది. ఈ విజయంతో టీమిండియా పాయింట్ల పట్టికలో అగ్రస్థానానికి చేరుకుని ఫైనల్ అవకాశాలను మరింత మెరుగుపరుచుకుంది.

టాస్ గెలిచిన భారత కెప్టెన్ సూర్యకుమార్ యాదవ్ మొదట బౌలింగ్ ఎంచుకున్నాడు.పాకిస్తాన్ నిర్ణీత 20 ఓవర్లలో 5 వికెట్ల నష్టానికి 171 పరుగులు చేసింది. పాక్ ఓపెనర్ సాహిబ్జాదా ఫర్హాన్ 58 పరుగులు చేసి టాప్ స్కోరర్‌గా నిలిచాడు. భారత బౌలర్లలో శివమ్ దూబే రెండు వికెట్లు తీశాడు.

172 పరుగుల లక్ష్యాన్ని భారత్ 18.5 ఓవర్లలో 4 వికెట్లు కోల్పోయి ఛేదించింది. యువ ఓపెనర్ అభిషేక్ శర్మ కేవలం 39 బంతుల్లో 74 పరుగులు చేసి మ్యాచ్‌ను సునాయాసంగా మార్చాడు. శుభ్‌మన్ గిల్ (47), తిలక్ వర్మ (30 నాటౌట్) కూడా తమ వంతు సహకారం అందించారు.

ఈ మ్యాచ్‌లో అద్భుతమైన ఇన్నింగ్స్ ఆడిన అభిషేక్ శర్మకు ప్లేయర్ ఆఫ్ ది మ్యాచ్ అవార్డు లభించింది. ఈ విజయంతో ఆసియా కప్ 2025లో భారత్ వరుసగా నాలుగో విజయాన్ని నమోదు చేసింది.