Asian games 2026: ఆసియా క్రీడల్లో భారత పురుషుల క్రికెట్ జట్టుకు వర్షం కారణంగా క్వార్టర్ ఫైనల్ మ్యాచ్ ఆడకుండానే సెమీఫైనల్ బెర్త్ దక్కింది. భారత్–అఫ్గానిస్థాన్ మధ్య జరగాల్సిన మ్యాచ్‌లో టాస్ కూడా సాధ్యం కాలేదు. భారీ వర్షం కారణంగా మ్యాచ్‌ను పూర్తిగా రద్దు చేశారు. టోర్నీలో మెరుగైన సీడింగ్ ఉన్న భారత్‌కు నిబంధనల ప్రకారం సెమీఫైనల్‌లో చోటు దక్కింది.

ఇక మంగళవారం జరిగిన శ్రీలంక–నేపాల్ క్వార్టర్ ఫైనల్ మ్యాచ్‌ కూడా వర్షం కారణంగా రద్దయింది. ఒక్క బంతి కూడా పడకుండానే మ్యాచ్‌ ముగిసింది. మెరుగైన సీడింగ్ కారణంగా శ్రీలంక సెమీఫైనల్‌కు అర్హత సాధించింది. దీంతో భారత్‌కు సెమీఫైనల్లో ప్రత్యర్థి ఎవరో కూడా ఖరారైంది.

దీంతో అక్టోబర్ 1న భారత్–శ్రీలంక మధ్య సెమీఫైనల్ జరగనుంది. ఈ మ్యాచ్ జపాన్‌లోని నిషిన్‌లో ఉన్న కొరోగి అథ్లెటిక్ పార్క్‌లో జరగనుంది. భారత కాలమానం ప్రకారం మ్యాచ్ ఉదయం 10 గంటలకు ప్రారంభం కానుంది. భారత్ గత ఆసియా క్రీడల్లో స్వర్ణ పతకం సాధించగా, ఈసారి కూడా పతకం కోసం బరిలోకి దిగుతోంది.

మరో సెమీఫైనల్లో పాకిస్థాన్–బంగ్లాదేశ్ తలపడనున్నాయి. పాకిస్థాన్–హాంకాంగ్ మ్యాచ్ కూడా వర్షం కారణంగా రద్దు కావడంతో పాకిస్థాన్ ముందుకు వెళ్లింది. అలాగే బంగ్లాదేశ్–మలేషియా మ్యాచ్ కూడా వర్షం కారణంగా రద్దవడంతో బంగ్లాదేశ్ సెమీస్‌కు చేరింది. అంటే నాలుగు క్వార్టర్ ఫైనల్స్‌లోనూ వర్షం ప్రభావం చూపడంతో, ఒక్క మ్యాచ్ కూడా పూర్తిగా ఆడకుండానే సెమీఫైనల్ లైనప్ ఖరారైంది.

Tags: