Babar Azam: టీ20ల్లో బాబర్ ఆజం సరికొత్త చరిత్ర.. ఆ ఘనత సాధించిన తొలి పాకిస్థానీ బ్యాటర్‌గా రికార్డు!

Babar Azam: పాకిస్థాన్ స్టార్ బ్యాటర్, పెషావర్ జల్మీ కెప్టెన్ బాబర్ ఆజం టీ20 క్రికెట్‌లో అరుదైన మైలురాయిని చేరుకున్నారు. ప్రస్తుతం జరుగుతున్న పాకిస్థాన్ సూపర్ లీగ్ (PSL) 2026లో అద్భుతమైన ఫామ్‌ను కొనసాగిస్తున్న ఆయన, క్వెట్టా గ్లాడియేటర్స్‌తో జరిగిన మ్యాచ్‌లో ఈ ఘనత సాధించారు. ఈ మ్యాచ్‌లో 51 బంతుల్లో 71 పరుగులు చేసి నాటౌట్‌గా నిలిచిన బాబర్, తన టీ20 కెరీర్‌లో 100వ అర్ధ సెంచరీని నమోదు చేశారు. తద్వారా ఈ ఫార్మాట్‌లో వంద హాఫ్ సెంచరీలు పూర్తి చేసిన ప్రపంచంలోనే నాలుగో బ్యాటర్‌గా, పాకిస్థాన్ నుంచి తొలి ఆటగాడిగా చరిత్ర సృష్టించారు.

గతంలో ఈ ఘనత సాధించిన వారి జాబితాలో ఆస్ట్రేలియాకు చెందిన డేవిడ్ వార్నర్ (116 హాఫ్ సెంచరీలు), టీమ్ ఇండియా స్టార్ విరాట్ కోహ్లీ (107), ఇంగ్లాండ్ బ్యాటర్ జోస్ బట్లర్ మాత్రమే ఉన్నారు. తాజా ఇన్నింగ్స్‌తో బాబర్ కూడా ఈ ఎలైట్ క్లబ్‌లో చేరిపోయారు. ప్రస్తుతం పీఎస్ఎల్ 2026 సీజన్‌లో బాబర్ ఆజం ఆరు ఇన్నింగ్స్‌ల్లో 301 పరుగులతో టాప్ స్కోరర్ల జాబితాలో రెండో స్థానంలో ఉన్నారు. ఆయన జట్టు పెషావర్ జల్మీ కూడా ఆడిన ఏడు మ్యాచ్‌ల్లో ఆరింటిని గెలిచి పాయింట్ల పట్టికలో అగ్రస్థానంలో కొనసాగుతోంది.

మరోవైపు ఐపీఎల్‌లో కోహ్లీ జోరు:

అటు భారత్‌లో జరుగుతున్న ఐపీఎల్‌లో విరాట్ కోహ్లీ కూడా పరుగుల వర్షం కురిపిస్తున్నారు. లక్నో సూపర్ జెయింట్స్‌తో జరిగిన మ్యాచ్‌లో ఇంపాక్ట్ సబ్‌స్టిట్యూట్‌గా బరిలోకి దిగిన కోహ్లీ 49 పరుగులు చేసి రాయల్ ఛాలెంజర్స్ బెంగళూరు విజయంలో కీలక పాత్ర పోషించారు. ప్రస్తుతం ఐదు ఇన్నింగ్స్‌ల్లో 228 పరుగులు చేసిన కోహ్లీ, ఆరెంజ్ క్యాప్ రేసులో అగ్రస్థానంలో నిలిచారు. కోహ్లీ మెరుపులతో ఆర్సీబీ జట్టు ఐపీఎల్ 2026 పాయింట్ల పట్టికలో టాప్ ప్లేస్‌కు చేరుకుంది. మొత్తంమ్మీద బాబర్, కోహ్లీ ఇద్దరూ తమ తమ లీగ్స్‌లో రికార్డులతో దుమ్మురేపుతున్నారు.