Cricket Australia: కెమెరాన్ గ్రీన్ ఎందుకు బౌలింగ్ చేయడం లేదు? అజింక్య రహానే వ్యాఖ్యలపై క్రికెట్ ఆస్ట్రేలియా రియాక్షన్!

Cricket Australia: ఐపీఎల్ వేలంలో రూ. 25.2 కోట్ల భారీ ధరతో కోల్‌కతా నైట్ రైడర్స్ (KKR) సొంతం చేసుకున్న ఆస్ట్రేలియా ఆల్‌రౌండర్ కెమెరాన్ గ్రీన్ ఇప్పుడు హాట్ టాపిక్‌గా మారారు. ఆదివారం రాత్రి ముంబై ఇండియన్స్‌తో జరిగిన హై-స్కోరింగ్ మ్యాచ్‌లో కేకేఆర్ ఓడిపోయింది. అయితే, ఇంత భారీ ధర పలికిన ఆల్‌రౌండర్ ఒక్క ఓవర్ కూడా బౌలింగ్ చేయకపోవడంపై విమర్శలు వెల్లువెత్తాయి. 224 పరుగుల భారీ లక్ష్యాన్ని కాపాడుకోవడంలో కేకేఆర్ బౌలర్లు విఫలమవ్వడంతో, గ్రీన్‌తో ఎందుకు బౌలింగ్ చేయించలేదనే ప్రశ్నలు తలెత్తాయి.

ఈ విషయంపై కేకేఆర్ కెప్టెన్ అజింక్య రహానేను ప్రశ్నించగా, ఆయన ఘాటుగా స్పందించారు. "ఆ ప్రశ్న మీరు క్రికెట్ ఆస్ట్రేలియాను (CA) అడగాలి" అంటూ బదులిచ్చారు. గ్రీన్‌ను బౌలింగ్ చేయకుండా ఆస్ట్రేలియా క్రికెట్ బోర్డే అడ్డుపడుతోందని రహానే పరోక్షంగా సూచించారు. దీంతో ఈ అంశం కాస్త వివాదంగా మారింది. రహానే వ్యాఖ్యలపై సోమవారం క్రికెట్ ఆస్ట్రేలియా స్పందిస్తూ అసలు విషయాన్ని బయటపెట్టింది.

కెమెరాన్ గ్రీన్ వెన్నునొప్పితో బాధపడుతున్నాడని, అందుకే కొద్దిరోజుల పాటు బౌలింగ్‌కు దూరంగా ఉండాలని సూచించినట్లు క్రికెట్ ఆస్ట్రేలియా ప్రతినిధి తెలిపారు. "గ్రీన్‌కు ఉన్న వెన్నునొప్పిని మేం పర్యవేక్షిస్తున్నాం. ప్రస్తుతం అతను కోలుకుంటున్నాడు. మరో 10 నుండి 12 రోజుల్లో అతను మళ్లీ బౌలింగ్ చేసే అవకాశం ఉంది. ఈ విషయం కేకేఆర్ యాజమాన్యానికి ముందే తెలుసు" అని స్పష్టం చేశారు. ఇటీవల జరిగిన టీ20 వరల్డ్ కప్‌లో కూడా గ్రీన్ కేవలం బ్యాటర్‌గానే ఆడాడని వారు గుర్తుచేశారు.

ముంబైతో జరిగిన మ్యాచ్‌లో మూడో నంబర్‌లో బ్యాటింగ్‌కు వచ్చిన గ్రీన్, 10 బంతుల్లో 18 పరుగులు చేసి అవుట్ అయ్యాడు. కేకేఆర్ ఆరుగురు బౌలర్లను మార్చి మార్చి ప్రయోగించినా, ముంబై బ్యాటర్లు దంచికొట్టడంతో ఓటమి తప్పలేదు. గ్రీన్ త్వరగా కోలుకుని బౌలింగ్ కూడా చేస్తేనే కేకేఆర్ జట్టుకు బలం చేకూరుతుందని విశ్లేషకులు భావిస్తున్నారు.