Emilio Gay and Sonny Baker: న్యూజిలాండ్‌తో తొలి టెస్ట్.. ఇంగ్లాండ్ జట్టులోకి ఎమిలియో గే, సన్నీ బేకర్!

Emilio Gay and Sonny Baker: న్యూజిలాండ్ క్రికెట్ జట్టుతో జరగబోయే మూడు మ్యాచ్‌ల టెస్ట్ సిరీస్‌లో భాగంగా, లార్డ్స్ మైదానంలో జరగనున్న తొలి టెస్ట్ కోసం ఇంగ్లాండ్ అండ్ వేల్స్ క్రికెట్ బోర్డు (ECB) 12 మంది సభ్యులతో కూడిన జట్టును మంగళవారం (జూన్ 2న) ప్రకటించింది. కౌంటీ క్రికెట్‌లో డర్హామ్ క్లబ్‌కు ప్రాతినిధ్యం వహిస్తూ, ఇటలీ తరఫున మూడు అంతర్జాతీయ టీ20లు ఆడిన 26 ఏళ్ల లెఫ్ట్ హ్యాండ్ టాప్ ఆర్డర్ బ్యాటర్ ఎమిలియో గే తొలిసారిగా ఇంగ్లాండ్ టెస్ట్ జట్టులో చోటు దక్కించుకున్నారు. జూన్ 4 నుండి 8 వరకు క్రికెట్ మక్కాగా పిలవబడే లార్డ్స్ వేదికగా ఈ మ్యాచ్ జరగనుంది.

ఎమిలియో గేతో పాటు అంతర్జాతీయ అరంగేట్రం చేయని 23 ఏళ్ల యువ ఫాస్ట్ బౌలర్ సన్నీ బేకర్ కూడా ఇంగ్లాండ్ 12 మంది సభ్యుల జట్టులో చోటు సంపాదించారు. అలాగే ఫిబ్రవరి 2024 తర్వాత సుదీర్ఘ విరామం అనంతరం ససెక్స్ సీమర్ ఓలీ రాబిన్సన్ తిరిగి టెస్ట్ జట్టులోకి పునరాగమనం (రీ-ఎంట్రీ) చేశారు. ఈ ముగ్గురి చేరికతో ఇంగ్లాండ్ జట్టు సరికొత్త వ్యూహాలతో బరిలోకి దిగుతోంది.

ఇటలీ తరఫున 2025లో మూడు టీ20 మ్యాచ్‌లు ఆడిన ఎమిలియో గేకు ఫస్ట్-క్లాస్ క్రికెట్‌లో మంచి అనుభవం ఉంది. ఆయన ఇప్పటివరకు 73 ఫస్ట్-క్లాస్ మ్యాచ్‌లు ఆడి 13 సెంచరీలు, 18 హాఫ్ సెంచరీల సహాయంతో 4,702 పరుగులు చేశారు. ప్రస్తుతం జరుగుతున్న 2026 కౌంటీ ఛాంపియన్‌షిప్ డివిజన్-2లో డర్హామ్ తరఫున కేవలం 6 మ్యాచ్‌ల్లోనే 3 సెంచరీలు బాది అద్భుతమైన ఫామ్‌లో ఉన్నారు. ఈ టోర్నమెంట్‌లో అత్యధిక పరుగులు చేసిన బ్యాటర్ల జాబితాలో దక్షిణాఫ్రికా ఆటగాడు డేవిడ్ బెడింగ్‌హామ్ తర్వాత ఎమిలియో గే రెండో స్థానంలో కొనసాగుతున్నారు.

మరోవైపు యువ పేసర్ సన్నీ బేకర్ ఇప్పటివరకు 12 ఫస్ట్-క్లాస్ మ్యాచ్‌లు ఆడి 41 వికెట్లు పడగొట్టారు. ఆయన ఇప్పటికే సెప్టెంబర్ 2025లో ఇంగ్లాండ్ తరఫున ఒక వన్డే, ఒక టీ20 మ్యాచ్ ఆడి అంతర్జాతీయ అరంగేట్రం పూర్తి చేశారు. ఇప్పుడు రెడ్-బాల్ క్రికెట్‌లోనూ తన ముద్ర వేయడానికి సిద్ధమవుతున్నారు. బెన్ స్టోక్స్ కెప్టెన్సీలోని ఈ 12 మంది సభ్యుల జట్టులో జో రూట్, హ్యారీ బ్రూక్, గస్ అట్కిన్సన్ వంటి కీలక ఆటగాళ్లు ఉన్నారు.

న్యూజిలాండ్‌తో తొలి టెస్ట్ కోసం ఇంగ్లాండ్ 12 మంది సభ్యుల జట్టు:

బెన్ స్టోక్స్ (కెప్టెన్), ఎమిలియో గే, బెన్ డకెట్, జాకబ్ బెథెల్, జో రూట్, హ్యారీ బ్రూక్, జేమీ స్మిత్ (వికెట్ కీపర్), గస్ అట్కిన్సన్, ఓలీ రాబిన్సన్, జోష్ టంగ్, సన్నీ బేకర్, షోయబ్ బషీర్.