IPL Franchises’ Decision: ఐపీఎల్ ఫ్రాంచైజీల నిర్ణయంపై హ్యారీ బ్రూక్ ఫైర్!

IPL Franchises’ Decision: బ్రిటన్‌లో జరగనున్న 'ది హండ్రెడ్' లీగ్‌లో పాకిస్థాన్ ఆటగాళ్లను పక్కన పెట్టడంపై ఇంగ్లాండ్ టీ20 కెప్టెన్ హ్యారీ బ్రూక్ తీవ్ర అసంతృప్తి వ్యక్తం చేశారు. పాకిస్థాన్ ఎంతో కాలంగా క్రికెట్ ప్రపంచంలో అద్భుతమైన దేశంగా కొనసాగుతోందని, అలాంటి దేశానికి చెందిన ప్రతిభావంతులైన ఆటగాళ్లను లీగ్‌లోకి తీసుకోకపోవడం చాలా విచారకరమని ఆయన అన్నారు. మార్చి 11, 12 తేదీల్లో జరగనున్న ఈ టోర్నీ వేలంలో.. భారత ఐపీఎల్ ఫ్రాంచైజీల యాజమాన్యంలో ఉన్న జట్లు పాక్ క్రికెటర్లను పట్టించుకోవడం లేదన్న వార్తలు వస్తున్న నేపథ్యంలో బ్రూక్ ఈ వ్యాఖ్యలు చేయడం ప్రాధాన్యత సంతరించుకుంది.

సన్‌రైజర్స్ లీడ్స్ (గతంలో నార్తర్న్ సూపర్ ఛార్జర్స్) జట్టుకు రికార్డు స్థాయిలో దాదాపు 5.68 కోట్ల రూపాయలకు అమ్ముడైన హ్యారీ బ్రూక్, ప్రస్తుతం తన దృష్టి అంతా టీ20 ప్రపంచకప్‌పైనే ఉందని స్పష్టం చేశారు. అయితే పాకిస్థాన్ జట్టులో ప్రపంచ స్థాయి ఆటగాళ్లు ఉన్నారని, వారిని 'ది హండ్రెడ్' వంటి పెద్ద లీగ్‌లో చూడకపోవడం అభిమానులకు నిరాశ కలిగించే విషయమని ఆయన పేర్కొన్నారు. ప్రస్తుతం జరుగుతున్న ప్రపంచకప్‌లో భాగంగా ఇంగ్లాండ్ తన తదుపరి మ్యాచ్‌లో శ్రీలంకతో తలపడనుంది.

ఈ ఏడాది 'ది హండ్రెడ్' వేలం కోసం సుమారు 63 మంది పురుషులు, నలుగురు మహిళా పాకిస్థానీ క్రికెటర్లు తమ పేర్లను నమోదు చేసుకున్నారు. అయితే ఐపీఎల్ జట్లతో సంబంధం ఉన్న మాంచెస్టర్ సూపర్ జయంట్స్, ఎంఐ లండన్, సదరన్ బ్రేవ్, సన్‌రైజర్స్ లీడ్స్ వంటి జట్లు పాక్ ఆటగాళ్లను కొనుగోలు చేయడానికి ఆసక్తి చూపడం లేదని సమాచారం. దీనిపై ఇంగ్లాండ్ మాజీ కెప్టెన్ మైఖేల్ వాన్ కూడా స్పందిస్తూ.. జాతీయత ఆధారంగా క్రీడాకారులను దూరం పెట్టడం సరైంది కాదని, ఇంగ్లాండ్ క్రికెట్ బోర్డు (ECB) ఈ విషయంలో త్వరగా జోక్యం చేసుకోవాలని డిమాండ్ చేశారు.