IPL 2026: చరిత్ర సృష్టించిన రబాడ.. మహమ్మద్ షమీ రికార్డు బద్దలు

IPL 2026: ఐపీఎల్ 2026 క్వాలిఫైయర్ 1 మ్యాచ్‌లో గుజరాత్ టైటాన్స్ (GT) ఫాస్ట్ బౌలర్ కాగిసో రబడ సరికొత్త రికార్డుతో సంచలనం సృష్టించాడు. ధర్మశాలలోని హిమాచల్ ప్రదేశ్ క్రికెట్ అసోసియేషన్ స్టేడియంలో రాయల్ ఛాలెంజర్స్ బెంగళూరుతో జరిగిన ఈ కీలకమైన మ్యాచ్‌లో రబడ గుజరాత్ టైటాన్స్ బౌలింగ్ విభాగాన్ని ముందుండి నడిపించాడు. ఆర్సీబీ ఇన్నింగ్స్ రెండో ఓవర్ వేసిన రబడ, ఆ ఓవర్ ఆఖరి బంతికి ప్రమాదకరమైన ఓపెనర్ వెంకటేష్ అయ్యర్‌ను అవుట్ చేశాడు. గాల్లోకి షాట్ ఆడబోయిన మధ్యప్రదేశ్ బ్యాటర్ వెంకటేష్ అయ్యర్.. శుభ్‌మన్ గిల్‌కు క్యాచ్ ఇచ్చి పెవిలియన్ చేరాడు.

వెంకటేష్ అయ్యర్ వికెట్ తీయడం ద్వారా కాగిసో రబడ ఒక ఐపీఎల్ సీజన్లో పవర్‌ప్లే (మొదటి 6 ఓవర్లు) లోనే అత్యధిక వికెట్లు పడగొట్టిన బౌలర్‌గా సరికొత్త రికార్డును తన పేరిట లిఖించుకున్నాడు. ప్రస్తుతం జరుగుతున్న ఐపీఎల్ 2026 ఎడిషన్ లో రబడ ఇప్పటివరకు పవర్‌ప్లే ఓవర్లలోనే ఏకంగా 18 వికెట్లు పడగొట్టడం విశేషం. అంతకుముందు ఈ రికార్డు మహమ్మద్ షమీ పేరిట ఉండేది.

షమీ 2023 ఐపీఎల్ సీజన్ లో గుజరాత్ టైటాన్స్ తరఫున ఆడుతూ పవర్‌ప్లేలో 17 వికెట్లు పడగొట్టాడు. ఒక ఐపీఎల్ సీజన్ పవర్‌ప్లేలో అత్యధిక వికెట్లు తీసిన బౌలర్ల జాబితాలో రబడ, షమీల తర్వాత మిచెల్ జాన్సన్, ట్రెంట్ బౌల్ట్ చెరో 16 వికెట్లతో తర్వాతి స్థానాల్లో ఉన్నారు. జాన్సన్ 2013లో, బౌల్ట్ 2020లో ముంబై ఇండియన్స్ తరఫున ఆడుతూ ఈ ఘనత సాధించారు.

ఈ మ్యాచ్‌లో 7 బంతుల్లో 3 ఫోర్లు, 1 సిక్సర్‌తో 19 పరుగులు చేసిన అయ్యర్‌ను అవుట్ చేయడం ద్వారా రబడ ఈ ఐపీఎల్ 2026 సీజన్ లో తన మొత్తం వికెట్ల సంఖ్యను 25కు పెంచుకున్నాడు. అతను కేవలం 15 మ్యాచ్‌ల్లోనే 25 వికెట్లు పడగొట్టి ప్రస్తుతం 'పర్పుల్ క్యాప్' (అత్యధిక వికెట్లు తీసిన బౌలర్) రేసులో అందరికంటే ముందు వరుసలో దూసుకుపోతున్నాడు.

అంతేకాకుండా, ప్రస్తుత సీజన్ లో గుజరాత్ జట్టు తరఫున 25 వికెట్లు తీయడం ద్వారా రబడ ప్రపంచ క్రికెట్ లోనే ఒక అరుదైన మైలురాయిని అందుకున్నాడు. ఐపీఎల్ చరిత్రలో మూడు వేర్వేరు సీజన్లలో 25 లేదా అంతకంటే ఎక్కువ వికెట్లు పడగొట్టిన ప్రపంచంలోనే మొట్టమొదటి బౌలర్‌గా రబడ సరికొత్త రికార్డు సృష్టించాడు.