Syed Kirmani: భారత క్రికెట్ దిగ్గజం, మాజీ వికెట్ కీపర్ సయ్యద్ కిర్మానీ ఇటీవల తన ఆత్మకథ "Stumped: Life Behind and Beyond The Twenty-Two Yards" పుస్తకావిష్కరణ సందర్భంగా కొన్ని కీలక వ్యాఖ్యలు చేశారు. ఈ కార్యక్రమం హైదరాబాద్‌లో జరగడం వల్ల ఆయన తన వ్యక్తిగత జీవితం, క్రికెట్ కెరీర్‌కు సంబంధించిన ఆసక్తికర విషయాలను పంచుకున్నారు.

కిర్మానీకి హైదరాబాద్‌తో ఉన్న అనుబంధాన్ని గుర్తు చేసుకున్నారు. "నేను హైదరాబాదీని అని చెప్పుకోవడానికి గర్వపడుతున్నాను. నా మూలాలు హైదరాబాద్‌లోనే ఉన్నాయి" అని ఆయన అన్నారు. హైదరాబాద్‌లోని ఆల్ సెయింట్స్ స్కూల్‌లో చదువుకున్నానని, అదే స్కూల్‌లో వి.వి.ఎస్. లక్ష్మణ్ కూడా చదువుకున్నారని గుర్తుచేసుకున్నారు.

ఇటీవల ఇంగ్లండ్‌తో జరిగిన టెస్ట్ సిరీస్‌లో అద్భుతంగా రాణించిన హైదరాబాద్ పేసర్ మహమ్మద్ సిరాజ్‌ను కిర్మానీ ప్రశంసించారు. సిరాజ్ ఆట తీరు, అతని ఉత్సాహం దేశానికి గొప్ప గౌరవాన్ని తీసుకొచ్చాయని కిర్మానీ అన్నారు. భవిష్యత్తులో సిరాజ్ ఒక ఆల్ రౌండర్‌గా ఎదగాలని ఆకాంక్షించారు.

ఈ కార్యక్రమంలో పాల్గొన్న మాజీ క్రికెటర్ మహమ్మద్ అజహరుద్దీన్, కిర్మానీ ప్రపంచంలోనే అత్యుత్తమ వికెట్ కీపర్‌ అని కొనియాడారు. స్పిన్నర్లకు వికెట్ కీపింగ్ చేయడం సులభం కాదని, ఆ విషయంలో కిర్మానీ అసాధారణ ప్రతిభ చూపారని అజహరుద్దీన్ అన్నారు. యువ వికెట్ కీపర్లు కిర్మానీ దగ్గర శిక్షణ తీసుకోవాలని సూచించారు.

Tags: