Smriti Mandhana’s Ex-Boyfriend: చిక్కుల్లో పడ్డ స్మృతి మంధాన మాజీ లవర్

Smriti Mandhana’s Ex-Boyfriend: ప్రముఖ క్రికెటర్ స్మృతి మంధానతో వివాహం రద్దు కావడంతో వార్తల్లో నిలిచిన సంగీత దర్శకుడు పలాష్ ముచ్చల్ తాజాగా చిక్కుల్లో పడ్డారు. స్మృతి మంధాన చిన్ననాటి స్నేహితుడిపై కుల వివక్షతో కూడిన వ్యాఖ్యలు చేశారనే ఆరోపణలపై ఆయనపై కేసు నమోదైంది.

టీవీ9 మరాఠీ నివేదిక ప్రకారం, స్మృతి మంధాన చిన్ననాటి స్నేహితుడు, సాంగ్లీ నివాసి అయిన విజ్ఞాన్ ప్రకాష్ మానే ఫిర్యాదు మేరకు పలాష్ ముచ్చల్‌పై ఎస్సీ, ఎస్టీ (అట్రాసిటీ నిరోధక) చట్టం కింద పోలీసులు కేసు నమోదు చేశారు. గత ఏడాది నవంబర్ 22న సాంగ్లీ-అష్టా రహదారిలోని ఒక టోల్ ప్లాజా వద్ద జరిగిన వాగ్వాదంలో పలాష్ తనపై కులపరమైన దూషణలకు దిగారని విజ్ఞాన్ తన ఫిర్యాదులో పేర్కొన్నారు. దీనిపై సెక్షన్ 3(1), 351(2), 352 కింద కేసు నమోదు చేసిన పోలీసులు ప్రస్తుతం విచారణ జరుపుతున్నారు.

ఈ వివాదానికి ప్రధాన కారణం ఆర్థిక లావాదేవీలేనని తెలుస్తోంది. ఒక సినిమా నిర్మాణ ప్రాజెక్టు కోసం పలాష్ తన వద్ద నుండి ₹25 లక్షలు అప్పుగా తీసుకున్నారని, ఆరు నెలల్లో సినిమా పూర్తి చేస్తానని హామీ ఇచ్చారని విజ్ఞాన్ మీడియాకు తెలిపారు. అయితే, సినిమా పూర్తి చేయకపోగా, తన డబ్బు తిరిగి ఇవ్వమని అడిగినప్పుడు పలాష్ దుర్భాషలాడారని ఆయన ఆరోపించారు. పలాష్ తనను మోసం చేశాడని, కెమెరా ముందు చెప్పలేని విధంగా అసభ్యకర పదజాలంతో కులం పేరుతో దూషించారని విజ్ఞాన్ పేర్కొన్నారు.

మరోవైపు, పలాష్ ముచ్చల్ మరియు స్మృతి మంధాన వివాహం గతేడాది నవంబర్ 23న జరగాల్సి ఉండగా, స్మృతి తండ్రికి ఎదురైన అనారోగ్యం కారణంగా వాయిదా పడింది. ఆ తర్వాత పలాష్ కూడా ముంబైలోని ఆసుపత్రిలో చేరడం, వారిద్దరూ సోషల్ మీడియాలో ఒకరినొకరు అన్‌ఫాలో చేసుకోవడంతో వీరి బంధం తెగిపోయినట్లు ప్రచారం జరుగుతోంది. ఈ క్రమంలోనే పలాష్ ఇన్‌స్టాగ్రామ్‌లో స్పందిస్తూ, తన వ్యక్తిగత సంబంధం నుండి తప్పుకుంటున్నట్లు ప్రకటించారు. నిరాధారమైన పుకార్ల వల్ల తాను ఎంతో మానసిక వేదన అనుభవిస్తున్నానని, సమాజం వాస్తవాలు తెలుసుకోకుండా తీర్పులు ఇవ్వకూడదని ఆయన కోరారు. పలాష్‌పై నమోదైన ఈ తాజా కేసు ఇప్పుడు చర్చనీయాంశంగా మారింది.