Joe Root Named New Captain: ఇంగ్లాండ్ టెస్టు జట్టు కొత్త కోచ్‌గా స్టీఫెన్ ఫ్లెమింగ్ - కొత్త కెప్టెన్‌గా జో రూట్

Joe Root Named New Captain: క్రికెట్ ప్రపంచంలో ఒక సంచలన మార్పు చోటుచేసుకుంది. ఇండియన్ ప్రీమియర్ లీగ్‌లో చెన్నై సూపర్ కింగ్స్ విజయవంతమైన కోచ్‌గా పేరుగాంచిన స్టీఫెన్ ఫ్లెమింగ్.. ఇప్పుడు సరికొత్త బాధ్యతను అందుకున్నారు. ఇంగ్లాండ్ టెస్టు జట్టు ప్రధాన కోచ్‌గా ఆయన అధికారికంగా నియమితులయ్యారు. ఇప్పటివరకు ఆ పదవిలో ఉన్న బ్రెండన్ మెకల్లమ్ స్థానంలో ఫ్లెమింగ్ ఈ ప్రతిష్ఠాత్మక బాధ్యతలను చేపట్టనున్నారు. కేవలం కోచ్ మార్పు మాత్రమే కాకుండా, ఇంగ్లాండ్ టెస్టు జట్టు సారథ్యంలో కూడా కీలక మార్పు జరిగింది. మొన్నటి వరకు కెప్టెన్‌గా వ్యవహరించి, తాజాగా అంతర్జాతీయ క్రికెట్‌కు రిటైర్మెంట్ ప్రకటించిన బెన్ స్టోక్స్ స్థానంలో.. స్టార్ బ్యాటర్ జో రూట్‌ను ఇంగ్లాండ్ టెస్టు జట్టు కొత్త కెప్టెన్‌గా ఇంగ్లాండ్ క్రికెట్ బోర్డు (ECB) ప్రకటించింది.

ఈ నియామకంపై స్టీఫెన్ ఫ్లెమింగ్ మాట్లాడుతూ అత్యంత ఉత్సాహం వ్యక్తం చేశారు. "ఇంగ్లాండ్ టెస్ట్ కోచ్‌గా బాధ్యతలు చేపట్టేందుకు నేను ఎంతో ఉత్సాహంగా ఉన్నాను. ప్రపంచ క్రికెట్‌లో అత్యంత ప్రతిష్ఠాత్మకమైన కోచింగ్ పదవులలో ఇది ఒకటి. ఈ పదవికి ఎంపిక కావడం నాకు దక్కిన గొప్ప గౌరవంగా భావిస్తున్నాను," అని అన్నారు. ప్రస్తుతం విజయాలు సాధించడంతో పాటు, భవిష్యత్తులో జట్టును మరింత పటిష్టమైన స్థితిలో నిలపడమే తన ప్రధాన లక్ష్యమని ఫ్లెమింగ్ స్పష్టం చేశారు. ఇంగ్లాండ్ జట్టులో ఎంతోమంది ప్రతిభావంతులైన యువ ఆటగాళ్లు ఉన్నారని, వారిలోని నిజమైన సామర్థ్యాన్ని వెలికితీసి ప్రపంచ స్థాయి క్రికెటర్లుగా తీర్చిదిద్దడమే తన ధ్యేయమని ఆయన పేర్కొన్నారు.

మరోవైపు, ఇంగ్లాండ్ టెస్టు జట్టు బాధ్యతలను మళ్లీ అందుకోవడంపై జో రూట్ హర్షం వ్యక్తం చేశారు. 35 ఏళ్ల జో రూట్ గతంలో 2017 నుంచి 2022 మధ్యకాలంలో ఇంగ్లాండ్ టెస్టు కెప్టెన్‌గా అద్భుతమైన రికార్డు సృష్టించారు. ఇంగ్లాండ్ తరఫున అత్యధికంగా 65 టెస్టు మ్యాచ్‌లకు సారథ్యం వహించిన రికార్డు జో రూట్ పేరు మీదే ఉంది. ఆయన కెప్టెన్సీలో ఇంగ్లీష్ జట్టు 27 విజయాలను నమోదు చేసింది.

మరోసారి జట్టుకు కెప్టెన్‌గా వ్యవహరించే అవకాశం రావడం గొప్ప గౌరవమని జో రూట్ పేర్కొన్నారు. టెస్టు కెప్టెన్సీ ఎప్పుడూ సవాలుతో కూడుకున్నదే అయినప్పటికీ, ఆ బాధ్యత ఎంతో సంతృప్తిని ఇస్తుందని తెలిపారు. ఇక ప్రపంచవ్యాప్తంగా అపారమైన కోచింగ్ అనుభవం ఉన్న స్టీఫెన్ ఫ్లెమింగ్‌తో కలిసి పనిచేయడం ఎంతో స్ఫూర్తినిచ్చే అంశమని రూట్ అన్నారు. ఫ్లెమింగ్‌తో కలిసి ఇంగ్లాండ్ జట్టును మరింత ముందుకు నడిపించేందుకు ఆసక్తిగా ఎదురుచూస్తున్నట్లు తెలిపారు.

అనుభవజ్ఞుడైన కోచ్ స్టీఫెన్ ఫ్లెమింగ్, నూతన కెప్టెన్ జో రూట్ కలయికతో ఇంగ్లాండ్ టెస్టు జట్టు భవిష్యత్తు ఎలా ఉండబోతుందనే దానిపై ఇప్పుడు ప్రపంచవ్యాప్తంగా తీవ్ర ఆసక్తి నెలకొంది. ఈ సరికొత్త జోడీ ఇంగ్లాండ్‌ను ఎలాంటి విజయాల తీరాలకు చేరుస్తుందో వేచి చూడాలి!