Asia Cup Final: ఆసియా కప్ ఫైనల్లోకి టీమిండియా కుర్రాళ్లు

Asia Cup Final: అండర్-18 ఆసియా కప్ హాకీ టోర్నీలో భారత కుర్రాళ్లు అదరగొట్టారు! సాంప్రదాయ ప్రత్యర్థి పాకిస్తాన్‌ను చిత్తు చేస్తూ ఫైనల్లోకి దూసుకెళ్లారు. శుక్రవారం జరిగిన హై-వోల్టేజ్ సెమీఫైనల్ మ్యాచ్‌లో.. టీమిండియా ఐదు-మూడు (5–3) గోల్స్ తేడాతో పాకిస్తాన్‌పై తిరుగులేని విజయాన్ని నమోదు చేసింది.

మ్యాచ్ ఆరంభంలో ఇరు జట్లు మిడ్‌ఫీల్డ్‌పై పట్టు కోసం ప్రయత్నించడంతో ఆట కాస్త నిదానంగానే సాగింది. కానీ.. భారత ఫార్వర్డ్స్ లభించిన ప్రతి అవకాశాన్ని అందిపుచ్చుకుంటూ పాక్ డిఫెన్స్‌ను ముక్కలు చేశారు. ఈ క్రమంలో 12వ నిమిషంలోనే భారత్ తొలి గోల్ సాధించింది. ఆ తర్వాత పుంజుకున్న పాక్.. రెండో క్వార్టర్‌లో స్కోరును వన్-ఆల్ (1–1) చేసింది. ఇక మూడో క్వార్టర్‌లో పాక్ జోరు పెంచి 3–2తో ఆధిక్యంలోకి దూసుకెళ్లింది.

కానీ.. అసలైన ఆట ఆఖరి క్వార్టర్‌లోనే మొదలైంది. చివరి నిమిషాల్లో భారత్ సర్వశక్తులూ ఒడ్డి వరుసగా పెనాల్టీ కార్నర్లు సాధించింది. భారత స్టార్ ప్లేయర్ ఆశిష్ తాని పుర్తి.. లభించిన పెనాల్టీలను సూపర్బ్‌గా గోల్ పోస్ట్‌లోకి పంపుతూ ఏకంగా నాలుగు గోల్స్‌తో (12, 49, 53, 56వ నిమిషాల్లో) చెలరేగిపోయాడు. మరో గోల్‌ను షారూక్ అలీ (35వ నిమిషంలో) అందించాడు. పాక్ తరఫున అబిద్, ఫర్హాన్, ఉజైర్ ఖురేషి తలో గోల్ చేసినా.. భారత్ దూకుడు ముందు వారి ఆట సాగలేదు.

మరోవైపు.. విమెన్స్ సెమీఫైనల్‌లో భారత అమ్మాయిలకు నిరాశే ఎదురైంది. హోరాహోరీగా సాగిన మ్యాచ్‌లో పెనాల్టీ షూటౌట్‌లో ఒకటి-మూడు (1–3) తేడాతో చైనా చేతిలో ఓడిపోయి గోల్డ్ మెడల్ రేస్ నుంచి తప్పుకుంది. నిర్ణీత సమయంలో ఇరు జట్లు రెండు-రెండు (2–2) తో సమంగా నిలిచాయి. భారత్ తరఫున నౌషీన్ నాజ్, కిరణ్ ఎక్కా గోల్స్ చేయగా.. చైనా ప్లేయర్లు లీ జెయాన్, జాంగ్ యుజెంగ్ గోల్స్ సాధించారు. మ్యాచ్ స్టార్టింగ్‌లోనే భారత్‌కు లీడ్ దక్కినా.. మిడ్-గేమ్‌లో జరిగిన డిఫెన్స్ వైఫల్యం టీమిండియా కొంపముంచింది.