Tilak Varma Undergoes Emergency Surgery: తిలక్ వర్మకు ఎమర్జెన్సీ సర్జరీ: మొదటి మూడు మ్యాచ్‌లకు దూరం

Tilak Varma Undergoes Emergency Surgery: టీమిండియా యువ బ్యాటర్ తిలక్ వర్మకు రాజ్‌కోట్‌లో అత్యవసర శస్త్రచికిత్స జరిగింది. విజయ్ హజారే ట్రోఫీలో భాగంగా హైదరాబాద్ జట్టు తరఫున ఆడుతున్న సమయంలో ఆయనకు తీవ్రమైన కడుపు నొప్పి (టెస్టిక్యులర్ టార్షన్) రావడంతో వెంటనే ఆసుపత్రికి తరలించారు. వైద్యుల సూచన మేరకు జనవరి 7, బుధవారం నాడు ఆయనకు విజయవంతంగా సర్జరీ నిర్వహించారు. ప్రస్తుతం ఆయన కోలుకుంటున్నారని, శుక్రవారం హైదరాబాద్‌కు తిరిగి చేరుకుంటారని బీసీసీఐ (BCCI) అధికారికంగా ధృవీకరించింది.

ఈ గాయం కారణంగా జనవరి 21 నుండి ప్రారంభం కానున్న న్యూజిలాండ్ 5 మ్యాచ్‌ల టీ20 సిరీస్‌లోని మొదటి మూడు మ్యాచ్‌లకు తిలక్ వర్మ దూరమయ్యారు. ఒకవేళ ఆయన కోలుకునే తీరు మెరుగ్గా ఉంటే, చివరి రెండు మ్యాచ్‌ల్లో ఆడే అవకాశం ఉంది. అయితే, వరల్డ్ కప్ ముందు టీమిండియా ఆడుతున్న చివరి సిరీస్ ఇదే కావడంతో, తిలక్ అందుబాటులో లేకపోవడం జట్టు ప్రణాళికలపై ప్రభావం చూపే అవకాశం ఉంది.

ఫిబ్రవరి 7 నుండి భారత్ వేదికగా జరగనున్న టీ20 ప్రపంచకప్‌లో తిలక్ వర్మ ఆడటంపై ఇప్పుడు సందిగ్ధత నెలకొంది. గతేడాది ఆసియా కప్ ఫైనల్‌లో పాకిస్థాన్‌పై అద్భుతమైన ఇన్నింగ్స్‌తో ఆకట్టుకున్న తిలక్, టీమిండియా మిడిల్ ఆర్డర్‌లో కీలక ఆటగాడిగా మారారు. ఆయన అందుబాటులో లేకపోతే, శ్రేయస్ అయ్యర్ లేదా రుతురాజ్ గైక్వాడ్‌లను ప్రత్యామ్నాయంగా ఎంపిక చేసే ఆలోచనలో సెలక్టర్లు ఉన్నారు.