Gadwal MLA: బీఆర్ఎస్ vs కాంగ్రెస్: గద్వాల ఎమ్మెల్యే బీఆర్ఎస్ సభకు వస్తారా? రాజకీయంగా ఆసక్తి

 Gadwal MLA: తెలంగాణ రాజకీయాలు రోజురోజుకు మరింత ఉత్కంఠగా మారుతున్నాయి. పార్టీలు మారిన ఎమ్మెల్యేల వ్యవహారం రాష్ట్రవ్యాప్తంగా ఆసక్తి రేపుతోంది. ప్రజలు ఈ అంశంపై ఎక్కువ దృష్టి సారిస్తున్నారు. ఎప్పుడు ఏమి జరుగుతుందో, ఎవరు ఎలాంటి నిర్ణయాలు తీసుకుంటారో అని ఎదురుచూస్తున్నారు. బీఆర్ఎస్ నుంచి 10 మంది ఎమ్మెల్యేలు కాంగ్రెస్‌కు అనుకూలంగా మారారు. దీంతో బీఆర్ఎస్, ఫిరాయించిన ఎమ్మెల్యేల మధ్య రాజకీయ పోరు తీవ్రమవుతోంది. ఒకరిపై ఒకరు ఎత్తులు వేసుకుంటున్నారు.

ఈ నేపథ్యంలో శనివారం జోగులాంబ గద్వాల జిల్లాలోని గద్వాలలో బీఆర్ఎస్ నిర్వహిస్తున్న సభ మరింత ఆసక్తి రేపుతోంది. గద్వాల ఎమ్మెల్యే బండ్ల కృష్ణమోహన్ రెడ్డి బీఆర్ఎస్ టికెట్‌పై గెలిచినప్పటికీ, తర్వాత కాంగ్రెస్‌కు అనుకూలంగా మారారు. అయితే, తాను పార్టీ మారలేదని, బీఆర్ఎస్‌లోనే ఉన్నానని ఆయన చెబుతున్నారు. ఈ సభకు బీఆర్ఎస్ వర్కింగ్ ప్రెసిడెంట్ కేటీఆర్ హాజరవుతున్నారు. మాజీ మున్సిపల్ చైర్‌పర్సన్ బీఎస్ కేశవ్ ఈ సభలో బీఆర్ఎస్‌లో చేరనున్నారు. ఈ సభ గద్వాల రాజకీయాల్లో కీలకంగా మారింది.

గతంలో బండ్ల కృష్ణమోహన్ రెడ్డి తాను బీఆర్ఎస్‌లోనే ఉన్నానని, స్పీకర్‌కు ఇచ్చిన వివరణలో కూడా అదే చెప్పారు. దీంతో ఆయన ఈ సభకు హాజరవ్వాల్సి ఉంటుంది. బీఆర్ఎస్ నాయకులు ఇదే విషయాన్ని లేవనెత్తుతున్నారు. ఆయన బీఆర్ఎస్‌లోనే ఉంటే సభకు అధ్యక్షత వహించాలి కదా అని ప్రశ్నిస్తున్నారు. మరి ఎమ్మెల్యే సభకు వస్తారా లేదా అన్న చర్చ గద్వాలలో జోరుగా సాగుతోంది.

కేటీఆర్ ఫిరాయించిన ఎమ్మెల్యేలపై తీవ్రంగా విమర్శలు గుప్పించే అవకాశం ఉందని బీఆర్ఎస్ వర్గాలు చెబుతున్నాయి. గతంలోనూ ఆ 10 మందిపై ఘాటు వ్యాఖ్యలు చేశారు. ఈ సభలో మరిన్ని విమర్శలు చేస్తారేమో అని రాజకీయ వర్గాల్లో చర్చ సాగుతోంది.