Telangana CM Revanth Reddy: తెలంగాణ సీఎం రేవంత్‌రెడ్డి - గడ్కరీ సమావేశం: ఆర్‌ఆర్‌ఆర్‌ దక్షిణ భాగానికి అనుమతులు, విమానాశ్రయాల పనులు వేగవంతం

Telangana CM Revanth Reddy: తెలంగాణ ముఖ్యమంత్రి ఎ. రేవంత్‌రెడ్డి దిల్లీలో కేంద్ర రోడ్డు, రవాణా మంత్రి నితిన్ గడ్కరీని కలిసి రాష్ట్ర అభివృద్ధికి కీలకమైన అంశాలపై చర్చించారు.

ఈ సమావేశంలో సీఎం రేవంత్ రెడ్డి ఆర్‌ఆర్‌ఆర్ (రీజినల్ రింగ్ రోడ్) ఉత్తర భాగ పనులకు కేంద్ర కేబినెట్ ఆమోదం కోరగా, దక్షిణ భాగానికి వెంటనే అనుమతులు ఇవ్వాలని విజ్ఞప్తి చేశారు. రాష్ట్రంలో రోడ్డు మౌలిక సదుపాయాల అభివృద్ధికి ఈ ప్రాజెక్టు చాలా ముఖ్యమని సీఎం అభిప్రాయపడ్డారు.

అనంతరం విమానయాన శాఖ మంత్రి కె. రామ్మోహన్ నాయుడును కూడా సీఎం కలిశారు. వరంగల్, ఆదిలాబాద్ విమానాశ్రయాల నిర్మాణం, భూసేకరణ విషయాలపై విస్తృత చర్చ జరిగింది.

వరంగల్ ఎయిర్‌పోర్టు 2028 నాటికి సిద్ధం

వరంగల్ విమానాశ్రయ భూసేకరణలో సీఎం రేవంత్‌రెడ్డి చూపిన చొరవను కేంద్ర మంత్రి రామ్మోహన్ నాయుడు ప్రశంసించారు. మూడు వారాల్లో పనులు ప్రారంభించి, 2 జూన్ 2028 నాటికి వరంగల్ ఎయిర్‌పోర్టు నిర్మాణం పూర్తి చేస్తామని తెలిపారు. వరంగల్ ప్రజలకు అత్యాధునిక విమానాశ్రయం అందుబాటులోకి వస్తుందని ఆయన వెల్లడించారు.

తెలంగాణలో మరిన్ని విమానాశ్రయాలు అవసరమని, ఆదిలాబాద్ విమానాశ్రయం కోసం రక్షణ శాఖ భూముల విషయం పరిష్కరించి త్వరగా భూసేకరణ పూర్తి చేసి నిర్మాణం చేపడతామని కేంద్ర మంత్రి హామీ ఇచ్చారు.

ఈ సమావేశాలు తెలంగాణ అభివృద్ధికి కేంద్రం-రాష్ట్రాల మధ్య మంచి సమన్వయానికి నిదర్శనమని పరిశీలకులు అభిప్రాయపడుతున్నారు.