Uday Krishna Reddy: ట్రైనీ ఐపీఎస్ అధికారి ఉదయ్‌ కృష్ణారెడ్డి ఆత్మహత్యాయత్నం

Uday Krishna Reddy: జాతీయ పోలీస్‌ అకాడమీలో లైంగిక వేధింపుల ఆరోపణలు ఉద్వేగం సృష్టించిన నేపథ్యంలో నిందితుడు ట్రైనీ ఐపీఎస్‌ అధికారి ఉదయ్‌ కృష్ణారెడ్డి ఆత్మహత్యాయత్నం చేశాడు. సోమవారం ఉదయం మోతీనగర్‌లోని బంధువుల ఇంటికి వచ్చిన ఉదయ్‌ శానిటైజర్‌ తాగి ఆత్మహత్యకు ప్రయత్నించాడు. బంధువులు వెంటనే అతడిని ఎస్‌ఆర్‌ నగర్‌లోని ఒక ప్రైవేటు ఆస్పత్రికి తరలించి చికిత్స అందించారు.

ఆస్పత్రి వైద్యులు మాట్లాడుతూ, “ఉదయం 9:30 గంటల ప్రాంతంలో ఉదయ్‌ను స్పృహ లేని స్థితిలో తీసుకొచ్చారు. వెంటనే స్టమక్‌ వాష్‌ చేశాం. విషపదార్థం తీసుకున్న అనుమానంతో చికిత్స అందించాం. బ్లడ్‌ రిపోర్టులు వచ్చిన తర్వాత ఏం తీసుకున్నది పూర్తిగా తెలుస్తుంది. బీపీతో సహా అన్ని పారామీటర్లు సాధారణ స్థితిలోనే ఉన్నాయి. స్పృహ తిరిగి వచ్చేందుకు ఇంకా 24 గంటలు పట్టవచ్చు” అని తెలిపారు.

ఉదయ్‌ సోదరుడు ప్రణయ్‌ కృష్ణారెడ్డి మాట్లాడుతూ, తమ అన్నయ్య అపస్మారక స్థితిలో ఉన్నాడని, వెంటనే ఆస్పత్రికి తీసుకొచ్చినట్లు చెప్పారు. ప్రస్తుతం ఆయన ఆరోగ్యం నిలకడగా ఉందని తెలిపారు.

మరోవైపు, తనపై వచ్చిన ఆరోపణలు, ప్రచారాలు అవాస్తవమని ఉదయ్‌ కృష్ణారెడ్డి ఇన్‌స్టాగ్రామ్‌లో పోస్టు చేశాడు. చట్టంపై తనకు పూర్తి నమ్మకం ఉందని, న్యాయం గెలుస్తుందని ఆయన పేర్కొన్నాడు. ట్రైనీ మహిళపై లైంగిక వేధింపులకు పాల్పడ్డారన్న ఆరోపణలపై అత్తాపూర్‌ పోలీస్‌ స్టేషన్‌లో ఉదయ్‌పై పలు సెక్షన్ల కింద కేసు నమోదు చేశారు. ఈ కేసులో దర్యాప్తు కొనసాగుతోంది.

ఈ ఘటన హైదరాబాద్‌లోని పోలీస్‌ అకాడమీ వర్గాల్లో తీవ్ర చర్చనీయాంశమైంది.