Chandrababu–Amit Shah Meeting: చంద్రబాబు-అమిత్ షా భేటీ: అమరావతికి చట్టబద్ధ హోదా కల్పించాలి

ఢిల్లీలో కీలక చర్చలు... కేంద్ర బడ్జెట్‌లో ఏపీకి ప్రత్యేక ప్రాధాన్యం ఇవ్వండి

ఉపాధి హామీ పథకంలో రాష్ట్ర వాటాకు సులువు చూపించండి

Chandrababu–Amit Shah Meeting: ఆంధ్రప్రదేశ్ రాజధానిగా అమరావతికి పార్లమెంటు ద్వారా చట్టబద్ధ హోదా కల్పించాలని ముఖ్యమంత్రి నారా చంద్రబాబు నాయుడు కేంద్ర హోంమంత్రి అమిత్ షాను కోరారు. రాష్ట్ర విభజన చట్టంలో దీన్ని చేర్చి, రాబోయే పార్లమెంటు సమావేశాల్లో సంబంధిత బిల్లును ప్రవేశపెట్టి ఆమోదించాలని విజ్ఞప్తి చేశారు. ఇలా చేయడం వల్ల రాష్ట్రంలో అభివృద్ధి వేగం పుంజుకుంటుందని, ప్రజల ఆకాంక్షలు నెరవేరతాయని ఆయన అన్నారు.

బుధవారం ఢిల్లీకి చేరుకున్న చంద్రబాబు, రాత్రి కృష్ణమేనన్ మార్గ్‌లోని అమిత్ షా నివాసంలో ఆయనతో భేటీ అయ్యారు. ఈ సందర్భంగా రాష్ట్ర ఆర్థిక పరిస్థితులను వివరిస్తూ, ఫిబ్రవరి 1న ప్రవేశపెట్టనున్న కేంద్ర బడ్జెట్‌లో ఏపీకి తగిన ప్రాధాన్యత ఇవ్వాలని కోరారు. గ్రామీణ ఉపాధి హామీ పథకంలో కేంద్ర-రాష్ట్ర నిష్పత్తి 60:40గా ఉన్న నేపథ్యంలో ఏపీకి ప్రత్యామ్నాయ వెసులుబాటు కల్పించాలని విన్నవించారు. అలాగే, పరిపాలనా సౌలభ్యం కోసం ఏర్పాటు చేసిన రెండు కొత్త జిల్లాలు, రెవెన్యూ డివిజన్ల మార్పుల గురించి కూడా అమిత్ షా దృష్టికి తీసుకెళ్లారు.

పూర్వోదయ పథకం ప్రతిపాదనలకు ఆమోదం త్వరగా

గత ప్రభుత్వ హయాంలో నాశనమైన మౌలిక సదుపాయాలను పునర్నిర్మించడానికి మూలధన వ్యయానికి కేంద్రం నుంచి ఆర్థిక సాయం అందించాలని చంద్రబాబు కోరారు. రాష్ట్రంలో భారీ పరిశ్రమలు, ప్రాజెక్టుల ఏర్పాటుకు త్వరిత అనుమతులతోపాటు నిధులు సమకూర్చాలని అడిగారు. పూర్వోదయ పథకం కింద రాష్ట్ర ప్రభుత్వం సమర్పించిన ప్రతిపాదనలకు త్వరగా ఆమోదమిచ్చి నిధులు విడుదల చేయాలని విజ్ఞప్తి చేశారు.

వామపక్ష తీవ్రవాద ప్రభావిత ప్రాంతమైన రంపచోడవరం కేంద్రంగా ఏర్పాటు చేసిన పోలవరం జిల్లా అభివృద్ధికి హోంశాఖ నుంచి ప్రత్యేక నిధులు కేటాయించాలని కోరారు. పోలవరం, అమరావతి ప్రాజెక్టులను సకాలంలో పూర్తి చేయడానికి కేంద్ర సహకారం అవసరమని నొక్కి చెప్పారు. విశాఖపట్నంలో జరిగిన పెట్టుబడుల సదస్సు ఒప్పందాల అమలుకు తీసుకుంటున్న చర్యలను వివరించారు. అలాగే, ఆ రోజు పోలవరం ప్రాజెక్టును సందర్శించి వచ్చానని చెబుతూ, అక్కడి పనుల పురోగతిని కూడా తెలియజేశారు.

ఎల్‌జీ ప్రతినిధులతోనూ చర్చ

అమిత్ షాతో భేటీకి ముందు, ఢిల్లీలోని తన అధికారిక నివాసం 1-జన్‌పథ్‌లో చంద్రబాబు ఎల్‌జీ సంస్థ ప్రతినిధులతో సమావేశమైనట్లు సమాచారం. శ్రీసిటీలో ఆ కంపెనీ ఏర్పాటు చేస్తున్న కొత్త పరిశ్రమ పురోగతిపై చర్చించారు. మొదట అమరావతిలో జరగాల్సిన ఈ భేటీ, సీఎం షెడ్యూల్ మారిన కారణంగా ఢిల్లీలో నిర్వహించినట్లు తెలుస్తోంది.