CM Chandrababu: పవన్‌పై విమర్శలు వస్తే మంత్రులంతా ఏకకాలంలో స్పందించాలి: సీఎం చంద్రబాబు

CM Chandrababu: నేరగాళ్లను వెనకేసుకొస్తూ వైకాపా రాజకీయం చేస్తోందని ఏపీ సీఎం చంద్రబాబు తీవ్రంగా విమర్శించారు. కులాల మధ్య చిచ్చుపెట్టే కుట్రలను దీటుగా తిప్పికొట్టాలని మంత్రులకు సూచించారు. క్యాబినెట్‌ సమావేశం ముగిసిన తర్వాత తాజా పరిణామాలపై మంత్రులతో సీఎం చంద్రబాబు విస్తృత చర్చ నిర్వహించారు.

కర్నూలులో జరిగిన ఘటనను సీఎం ప్రస్తావించారు. ఊరంతా బహిష్కరించిన వ్యక్తులను వైకాపా వెనకేసుకొచ్చిందని గుర్తు చేశారు. డిప్యూటీ సీఎం పవన్‌ కల్యాణ్‌ను వివాదాల్లోకి లాగడానికి ప్రయత్నించినప్పుడు మంత్రులంతా ఏకకాలంలో స్పందించాలని సీఎం స్పష్టం చేశారు.

మంత్రులు అన్ని శాఖలపై అవగాహన పెంచుకోవాలి

మంత్రులు తమ శాఖ పరిధి మాత్రమే కాకుండా అన్ని విషయాలపై స్పందించాలని చంద్రబాబు సూచించారు. డీఎస్‌సీ, వివిధ అంశాలపై వైకాపా చేస్తున్న దుష్ప్రచారాన్ని బలంగా తిప్పికొట్టాలని ఆదేశించారు. జొన్నగిరి గ్రామాన్ని ‘స్వర్ణ గ్రామం’గా నామకరణం చేయాలని ప్రకటించారు. జులై 3న కడప స్టీల్‌ ప్లాంట్‌కు శంకుస్థాపన జరుగుతుందని తెలిపారు.

కృష్ణలంకకు చెందిన గాదె సాయికృష్ణ వ్యవహారంలో ప్రభుత్వ చిత్తశుద్ధిని అతని కుటుంబసభ్యులు నమ్ముతున్నారని మంత్రులు తెలిపారు. ఈ అంశంలోనూ వైకాపా రాజకీయ లబ్ది కోసం ప్రయత్నాలు చేస్తోందని విమర్శించారు.

ఈ చర్చలో మంత్రులు తమ అభిప్రాయాలు స్పష్టంగా వ్యక్తం చేశారు. ప్రభుత్వం ప్రజా సమస్యల పరిష్కారంపై దృష్టి సారిస్తున్నట్లు సమావేశం సందేశం ఇచ్చింది.