Nara Lokesh Appointed Executive President: తెదేపాలో కీలక మార్పు – నారా లోకేశ్ కార్యనిర్వాహక అధ్యక్షుడిగా నియామకం
నారా లోకేశ్ కార్యనిర్వాహక అధ్యక్షుడిగా నియామకం
Nara Lokesh Appointed Executive President: తెలుగుదేశం పార్టీ (తెదేపా)లో ముఖ్యమైన నిర్ణయం తీసుకుంది. మంత్రి నారా లోకేశ్ను పార్టీ కార్యనిర్వాహక అధ్యక్షుడిగా (వర్కింగ్ ప్రెసిడెంట్గా) ప్రకటించింది. తెదేపా ఏపీ అధ్యక్షుడిగా పల్లా శ్రీనివాస్ కొనసాగుతారని పార్టీ స్పష్టం చేసింది.
పొలిట్బ్యూరో, జాతీయ కమిటీ, రాష్ట్ర కమిటీలతో కూడిన కొత్త నాయకత్వ బృందాన్ని పార్టీ జాతీయ అధ్యక్షుడు చంద్రబాబు నాయుడు ప్రకటించారు. ఈ నిర్ణయంలో సీనియర్ నాయకులకు గౌరవం ఇస్తూ, కొత్త తరానికి అవకాశాలు కల్పించడం, సామాజిక సమీకరణాలు బేరీజు వేసుకోవడం లాంటి అన్ని అంశాలను దృష్టిలో ఉంచి నిర్ణయం తీసుకున్నారు. విధేయత, కష్టపడే తత్వం, అనుభవం ఆధారంగా పదవులు కేటాయించారు. నామినేటెడ్ పదవుల్లో అవకాశం రాని వారికి పార్టీ పదవుల ద్వారా న్యాయం చేశారు.
పార్టీ కమిటీల వివరాలు ఇలా ఉన్నాయి:
పొలిట్బ్యూరో: 29 మంది
జాతీయ కమిటీ: 31 మంది
రాష్ట్ర కమిటీ: 185 మంది
జాతీయ ప్రధాన కార్యదర్శులుగా రామ్మోహన్ నాయుడు, బైరెడ్డి శబరి, రాజేశ్ కిలార్లను నియమించారు. రాష్ట్ర స్థాయిలో ప్రధాన కార్యదర్శులు 7 మంది, ఉపాధ్యక్షులు 16 మంది, అధికార ప్రతినిధులు 14 మంది, జోనల్ కో-ఆర్డినేటర్లు 10 మంది, కార్యనిర్వాహక కార్యదర్శులు 59 మంది, కార్యదర్శులు 77 మంది ఉన్నారు.
ఈ సారి సంచలన నిర్ణయాలు కూడా తీసుకున్నారు. ఒక మండల పార్టీ అధ్యక్షురాలు, ఒక క్లస్టర్ ఇన్ఛార్జ్కు నేరుగా పొలిట్బ్యూరోలో చోటు కల్పించారు. గజపతినగరం మండల పార్టీ అధ్యక్షురాలు గంట్యాడ శ్రీదేవి, మంగళగిరి క్లస్టర్ ఇన్ఛార్జ్ గుత్తికొండ ధనుంజయ్లు ఈ గౌరవం పొందారు.
సామాజిక సమీకరణాలపై ప్రత్యేక దృష్టి సారించారు. రాష్ట్ర కమిటీలోని 185 మంది సభ్యుల్లో 50 మంది మహిళలకు చోటు ఇచ్చారు. బీసీలు 77 మంది, ఎస్సీలు 25 మంది, ఎస్టీలు 7 మంది, మైనార్టీలు 13 మంది స్థానం పొందారు. బడుగు వర్గాలకు 122 మంది స్థానాలు కేటాయించి జనాభా నిష్పత్తి ప్రకారం సమతుల్యం సాధించారు. పొలిట్బ్యూరో, జాతీయ కమిటీల్లో కూడా మహిళలకు సముచిత స్థానం కల్పించారు.
2029 ఎన్నికలను దృష్టిలో ఉంచుకొని అన్ని కోణాల్లో విశ్లేషించి ఈ కమిటీల కూర్పు చేపట్టినట్లు పార్టీ వర్గాలు తెలిపాయి. సీనియర్ల అనుభవం, యువత ఉత్సాహం, సామాజిక సమీకరణాలు – అన్నీ బేరీజు వేసి తీసుకున్న ఈ నిర్ణయం తెదేపా భవిష్యత్ దిశను మరింత బలోపేతం చేస్తుందని రాజకీయ విశ్లేషకులు అభిప్రాయపడుతున్నారు.