Deputy CM Pawan Kalyan: ఆర్నబ్ తుఫాను బాధిత గ్రామాల్లో పునరుద్ధరణ వేగవంతం చేయాలి: ఉపముఖ్యమంత్రి పవన్ కళ్యాణ్

Deputy CM Pawan Kalyan: ఆర్నబ్ తుఫాను ప్రభావిత గ్రామాల్లో సాధారణ పరిస్థితులు త్వరగా నెలకొనేలా మౌలిక సదుపాయాల పునరుద్ధరణ పనులను వేగవంతం చేయాలని ఉపముఖ్యమంత్రి పవన్ కళ్యాణ్ అధికారులను ఆదేశించారు.

పంచాయతీరాజ్, గ్రామీణాభివృద్ధి శాఖ, గ్రామీణ నీటి సరఫరా విభాగం అధికారులతో ఆయన సమీక్షించారు. ఈ సందర్భంగా అధికారులు పరిస్థితిని వివరించారు. రాష్ట్రవ్యాప్తంగా 75 మండలాల పరిధిలోని 852 గ్రామ పంచాయతీలు తుఫాను ప్రభావానికి గురయ్యాయి. గ్రామీణ రహదారులపై 776 చెట్లు నేలకొరిగాయి. తుఫాను ప్రభావంతో రాష్ట్రవ్యాప్తంగా గ్రామ పంచాయతీల పరిధిలో 566 వీధి దీపాలు దెబ్బతినగా, ఇప్పటి వరకు 147 పునరుద్ధరించామని తెలిపారు. అర్బన్ ప్రభావిత జిల్లాల్లో 15,686 మంది పారిశుధ్య సిబ్బందిని క్షేత్రస్థాయిలో అందుబాటులో ఉంచాం. పారిశుధ్య చర్యల కోసం 1017 టన్నుల బ్లీచింగ్, 2840 టన్నుల సున్నం, 40,241 లీటర్ల క్లోరిన్ అందుబాటులో ఉంచామని అధికారులు వివరించారు.

గ్రామ పంచాయతీల్లో పరిస్థితులు పూర్తిగా సాధారణ స్థితికి వచ్చే వరకు అధికారులు క్షేత్రస్థాయిలో అందుబాటులో ఉండాలని, పునరుద్ధరణ పనుల పురోగతిపై ఎప్పటికప్పుడు నివేదికలు అందించాలని ఉపముఖ్యమంత్రి ఆదేశించారు. రహదారులపై చెట్లను వెంటనే తొలగించాలి. డ్రైన్లలో ప్రవాహాలకు అడ్డంకులు లేకుండా చూడాలి. లోతట్టు ప్రాంతాల నుంచి నీరు తక్షణం బయటకు వెళ్లేలా డ్రైనేజీ వ్యవస్థను పునరుద్ధరించాలి. అంటువ్యాధులు ప్రబలకుండా తగిన చర్యలు చేపట్టాలి. గ్రామాల్లో విద్యుత్ సరఫరా, వీధిదీపాల పునరుద్ధరణకు ప్రాధాన్యం ఇవ్వాలి. తాగునీటి వనరులు కలుషితం కాకుండా జాగ్రత్తలు తీసుకోవాలి. పంపుసెట్లు, ఓవర్‌హెడ్ ట్యాంక్‌లు, పైపులైన్లు దెబ్బతిని ఉంటే వెంటనే పునరుద్ధరించాలని, అవసరమైన ప్రాంతాల్లో ట్యాంకర్లతో తాగునీటి సరఫరా చేయాలని, నీటి నాణ్యతను నిరంతరం పరిశీలించాలని ఆయన స్పష్టం చేశారు.సిబ్బంది క్షేత్రస్థాయిలో అందుబాటులో ఉండాలని పవన్ కళ్యాణ్ గట్టిగా సూచించారు.