Bajaj Pulsar: ప్రముఖ టూ వీలర్ తయారీ సంస్థ బజాజ్ ఆటో తమ అత్యంత ప్రజాదరణ పొందిన పల్సర్ ఎన్250 బైక్‌లో సరికొత్త వర్షన్ పల్సర్ ఎన్250ఎస్ఎస్‎ను భారతీయ ఆటోమొబైల్ మార్కెట్‌లో అధికారికంగా విడుదల చేసింది. కంపెనీ ఈ కొత్త ప్రీమియం మోడల్ ఎక్స్-షోరూమ్ ధరను రూ.1,59,406గా నిర్ణయించింది. సాధారణ పల్సర్ ఎన్250 మోడల్ కంటే ఇది సుమారు రూ.14,000 వరకు ఎక్కువ ధర కలిగి ఉన్నప్పటికీ, దానికి తగినట్లుగానే ఇంజిన్, గేర్‌బాక్స్ అలాగే సాంకేతికపరమైన అంశాలలో అధునాతన మార్పులు చేశారు.

4V పవర్‌ఫుల్ ఇంజిన్, 6-స్పీడ్ గేర్‌బాక్స్

నూతన పల్సర్ ఎన్250ఎస్ఎస్ బైక్‌లో అప్‌డేట్ చేసిన 249cc 4-వాల్వ్ ఇంజిన్‌ను అమర్చారు. దీనికి ఎలక్ట్రానిక్ థ్రోటిల్ బాడీతో పాటు సరికొత్త 6-స్పీడ్ గేర్‌బాక్స్‌ను జతచేశారు. 6-స్పీడ్ గేర్‌బాక్స్ కారణంగా హైవేలపై ప్రయాణించేటప్పుడు బైక్ చాలా సజావుగా సాగడంతో పాటు గేర్ కంట్రోల్ మరింత సులభతరం కానుంది. క్లచ్ వాడాల్సిన అవసరం లేకుండా వేగంగా గేర్లు మార్చుకోవడానికి వీలుగా బై-డైరెక్షనల్ క్విక్‌షిఫ్టర్ సదుపాయాన్ని కూడా ఇందులో పొందుపరిచారు.

5-ఇంచుల టీఎఫ్‌టీ డిస్‌ప్లే, గూగుల్ మ్యాప్స్ సపోర్ట్

ఈ బైక్‌లో పొందుపరిచిన 5-ఇంచుల కలర్ టీఎఫ్‌టీ ఇన్స్ట్రుమెంట్ కన్సోల్ ప్రధాన ఆకర్షణగా నిలుస్తోంది. ఇందులో గూగుల్ మ్యాప్స్ మిర్రరింగ్ ఫీచర్ ఇవ్వడం వల్ల ప్రయాణించే సమయంలో బైక్ స్క్రీన్‌పైనే నేరుగా నావిగేషన్ వివరాలను చూసుకోవచ్చు. ఫోన్ ఛార్జింగ్ కోసం యూఎస్‌బీ టైప్-సీ పోర్ట్, కొత్త స్విచ్ గేర్ వంటి సౌకర్యాలు పొందుపరిచారు. దూరప్రాంత ప్రయాణాలు చేసే వారికి ఈ కనెక్టివిటీ ఫీచర్లు ఎంతగానో ఉపయోగపడతాయి.

ఐదు రైడింగ్ మోడ్స్, అడ్వాన్స్‌డ్ సేఫ్టీ ఫీచర్లు

రైడర్ల రక్షణ అలాగే విభిన్న రహదారి పరిస్థితులను తట్టుకోవడానికి ఐదు ప్రత్యేక రైడింగ్ మోడ్స్‌ను అందించారు. వీటిలో స్పోర్ట్, రోడ్, రెయిన్, ఆఫ్-రోడ్ అలాగే టూర్ మోడ్స్ ఉన్నాయి. జారే స్వభావం ఉన్న రోడ్లపై బైక్ స్కిడ్ కాకుండా కాపాడేందుకు ట్రాక్షన్ కంట్రోల్ సిస్టమ్‌ను కూడా ఏర్పాటు చేశారు. వీటితో పాటు అడ్జస్టబుల్ క్లచ్, బ్రేక్ లివర్లు, రెడ్ అల్లాయ్ వీల్స్, గోల్డ్ ఫినిష్ యుఎస్‌డి ఫ్రంట్ ఫోర్క్స్ ఇవ్వడం వల్ల బైక్‌కు మరింత స్పోర్టీ లుక్ వచ్చింది.

Tags: