CNG SUVs: భారత ఆటోమొబైల్ మార్కెట్లో సీఎన్జీ కార్లకు ప్రాచుర్యం రోజురోజుకూ విపరీతంగా పెరుగుతోంది. పెట్రోల్, డీజిల్ ధరలతో పోలిస్తే మెయింటెనెన్స్ ఖర్చు చాలా తక్కువ కావడం వల్ల సామాన్య ప్రయాణికులు సీఎన్జీ వాహనాల వైపు మొగ్గు చూపుతున్నారు. అయితే సీఎన్జీ కార్లలో డిక్కీలో పెద్ద సిలిండర్ ఉండటం వల్ల సూట్‌కేసులు, ప్రయాణ సామాగ్రి పెట్టడానికి చోటు ఉండకపోవడం ప్రధాన లోపంగా మారేది. ఈ ఇబ్బందిని అధిగమించడానికి ఆటోమొబైల్ కంపెనీలు డబుల్ సిలిండర్ టెక్నాలజీ లేదా కారు కింద భాగంలో సీఎన్జీ ట్యాంక్‌లను అమర్చే పద్ధతిని తీసుకొచ్చాయి. దీనివల్ల బూట్ స్పేస్ ఏమాత్రం తగ్గకుండా భారీ లగేజ్ సామర్థ్యం లభిస్తోంది. భారత మార్కెట్లో అందుబాటులో ఉన్న అగ్రశ్రేణి 4 సీఎన్జీ ఎస్‌యూవీల ప్రత్యేకతలు ఇప్పుడు చూద్దాం.

1. మహీంద్రా XUV 3XO ZNG

మహీంద్రా సంస్థ సరికొత్తగా పరిచయం చేసిన XUV 3XO ZNG ఈ జాబితాలో ప్రధానంగా నిలుస్తోంది. ఇందులో కంపెనీ ఫ్యాక్టరీ ఫిట్టెడ్ ట్విన్ సిలిండర్ టెక్నాలజీని అందించింది. దీనివల్ల సిలిండర్ల పైన లగేజ్ పెట్టుకోవడానికి ప్రశాంతమైన స్థలం లభిస్తుంది. ఈ కారులో 270 లీటర్ల బూట్ స్పేస్ లభిస్తోంది. పవర్ విషయానికి వస్తే, ఇందులో 1.2 లీటర్ల 3-సిలిండర్ టర్బో-పెట్రోల్ ఇంజిన్ అమర్చారు. సీఎన్జీ మోడ్‌లో ఇది 111 hp పవర్, 200 Nm టార్క్‌ను ఉత్పత్తి చేస్తుంది. 6-స్పీడ్ మాన్యువల్ గేర్‌బాక్స్‌తో వచ్చే ఈ ఎస్‌యూవీ కేజీ సీఎన్జీకి 24.7 కిలోమీటర్ల మైలేజ్ ఇస్తుంది. దీని ఎక్స్-షోరూమ్ ధర రూ. 9.99 లక్షల నుండి రూ. 12.27 లక్షల వరకు ఉంది.

2. మారుతి సుజుకి బ్రెజ్జా S-CNG

కాంప్యాక్ట్ ఎస్‌యూవీ విభాగంలో అత్యంత ప్రజాదరణ పొందిన మారుతి బ్రెజ్జా S-CNG మోడల్‌లో కంపెనీ సీఎన్జీ ట్యాంక్‌ను కారు బాడీ కింద భాగంలో అమర్చింది. ఈ కారణంతో డిగ్గీలో ఏకంగా 328 లీటర్ల భారీ బూట్ స్పేస్ వినియోగదారులకు లభిస్తుంది. ఇందులో 1.5 లీటర్ల న్యాచురల్లీ ఆస్పిరేటెడ్ పెట్రోల్ ఇంజిన్‌ను పొందుపరిచారు. సీఎన్జీ మోడ్‌లో ఈ ఇంజిన్ 88 hp పవర్, 121.5 Nm టార్క్‌ను అందిస్తుంది. మాన్యువల్ గేర్‌బాక్స్‌తో నడిచే ఈ కారు కేజీకి 26.9 కిలోమీటర్ల అత్యుత్తమ మైలేజ్ ఇస్తూ కస్టమర్లను ఆకట్టుకుంటోంది.

3. టాటా నెక్సాన్ iCNG

భద్రతకు ప్రాధాన్యత ఇచ్చే వాహనదారుల కోసం టాటా నెక్సాన్ iCNG ఒక అద్భుతమైన ఎంపిక. టాటా మోటార్స్ ఇందులో వినూత్నమైన ట్విన్ సిలిండర్ సాంకేతికతను అందించడం ద్వారా 321 లీటర్ల విశాలమైన బూట్ స్పేస్‌ను సాధ్యం చేసింది. ఈ ఎస్‌యూవీలో 1.2 లీటర్ల టర్బో-పెట్రోల్ ఇంజిన్ ఉంటుంది. సీఎన్జీ మోడ్‌లో ఇది 100 hp పవర్, 170 Nm టార్క్‌ను విడుదల చేస్తూ పవర్ ఫుల్ పర్ఫామెన్స్ కనబరుస్తుంది. 6-స్పీడ్ మాన్యువల్ గేర్‌బాక్స్ కలిగిన ఈ కారు కేజీకి 24 కిలోమీటర్ల మైలేజ్ ఇస్తుంది. దీని ఎక్స్-షోరూమ్ ధర రూ.8.35 లక్షల నుంచి రూ.13.42 లక్షల మధ్య అందుబాటులో ఉంది.

4. మారుతి సుజుకి విక్టోరిస్ S-CNG

ఈ విభాగంలో మరొక నమ్మకమైన కారు మారుతి సుజుకి విక్టోరిస్ S-CNG. ఈ మోడల్‌లో కూడా సీఎన్జీ ట్యాంక్‌ను కారు కింద అమర్చడం వల్ల లగేజ్ నిల్వ చేయడానికి 320 లీటర్ల బూట్ స్పేస్ అందుబాటులోకి వచ్చింది. ఈ కారులో 1.5 లీటర్ల పవర్‌ఫుల్ ఇంజిన్ ఇచ్చారు. ఇది సీఎన్జీ మోడ్‌లో 87 hp పవర్, 121.5 Nm టార్క్‌ను అందిస్తుంది. 5-స్పీడ్ మాన్యువల్ గేర్‌బాక్స్‌తో వచ్చే ఈ వాహనం కేజీ సీఎన్జీకి అత్యధికంగా 27.02 కిలోమీటర్ల భారీ మైలేజ్‌ను అందిస్తుండటం విశేషం. దీని ఎక్స్-షోరూమ్ ధర రూ. 11.55 లక్షల నుంచి ప్రారంభమై రూ. 14.82 లక్షల వరకు ఉంటుంది.

Tags: