Ferrari: భారత్‌లో విస్తరణకు సిద్ధమైన ఫెరారీ.. దేశంలో 5 నగరాలకు చేరనున్న ఇటాలియన్ లగ్జరీ స్పోర్ట్స్ కార్లు

Ferrari: ప్రపంచ ప్రసిద్ధి చెందిన ఇటాలియన్ లగ్జరీ స్పోర్ట్స్ కార్ల తయారీ సంస్థ ఫెరారీ భారతీయ మార్కెట్‌లో తమ వ్యాపారాన్ని విస్తరించేందుకు భారీ ప్రణాళికలు రచిస్తోంది. ఇప్పటివరకు ఢిల్లీ, ముంబై అలాగే బెంగళూరు వంటి మెట్రో నగరాలకే పరిమితమైన ఫెరారీ షోరూమ్‌లు, త్వరలోనే 5 ప్రధాన నగరాలకు చేరుకోనున్నాయి. ఇందులో భాగంగా తమిళనాడు రాజధాని చెన్నైతో పాటు గుజరాత్‌లోని అహ్మదాబాద్‌లలో నూతన డీలర్‌షిప్‌లను ప్రారంభించేందుకు కంపెనీ ఏర్పాట్లు చేస్తోంది. భారత మార్కెట్ తమకు అత్యంత విలువైనదని, ఇక్కడి కస్టమర్లు అలాగే కార్ల ఔత్సాహికులతో సుదీర్ఘ అనుబంధాన్ని ఏర్పరుచుకోవడమే తమ ప్రధాన లక్ష్యమని ఫెరారీ సీఈఓ స్పష్టం చేశారు.

చెన్నై అలాగే అహ్మదాబాద్‌లలో కొత్త డీలర్‌షిప్‌లు

భారతీయ మార్కెట్‌లో తమ ఉనికిని బలపరచడానికి స్థానిక వ్యాపార దిగ్గజాలతో ఫెరారీ చేతులు కలిపింది. చెన్నై నగరంలో సరికొత్త డీలర్‌షిప్‌ను ప్రారంభించడానికి ప్రముఖ KUN Group‎తో ఒప్పందం కుదుర్చుకోగా, అహ్మదాబాద్‌లో నూతన షోరూమ్ ఏర్పాటుకు ఇన్ఫినిటీ గ్రూప్‎తో భాగస్వామ్యాన్ని ఏర్పరచుకుంది. ఈ రెండు ప్రధాన కేంద్రాల రాకతో భారతదేశంలో ఫెరారీ అధికారిక నెట్‌వర్క్ ఐదు నగరాలకు విస్తరించనుంది. ధనవంతులు, విలాసవంతమైన కార్ల ప్రియుల సంఖ్య పెరుగుతుండటంతో భారత మార్కెట్లో తమ విక్రయాలు భారీగా పెరుగుతాయని కంపెనీ యాజమాన్యం ధీమా వ్యక్తం చేస్తోంది.

తగ్గనున్న కార్ల ధరలు

భారత్ అలాగే యూరోపియన్ యూనియన్ మధ్య ప్రతిపాదిత ఉచిత వాణిజ్య ఒప్పందం(FTA) కార్యరూపం దాల్చితే లగ్జరీ స్పోర్ట్స్ కార్ల మార్కెట్లో విప్లవాత్మక మార్పులు రానున్నాయి. ప్రస్తుతం విదేశాల నుంచి నేరుగా దిగుమతి చేసుకునే లగ్జరీ కార్లపై దాదాపు 110 శాతం వరకు ఇంపోర్ట్ డ్యూటీ విధిస్తున్నారు. ఈ ఒప్పందం అమల్లోకి వస్తే కాలక్రమేణా ఈ సుంకం ఏకంగా 10 శాతానికి పడిపోయే అవకాశం ఉంది. దీనివల్ల ఐరోపా నుంచి దిగుమతి అయ్యే ఫెరారీ కార్ల ధరలు గణనీయంగా తగ్గి, దేశంలో వీటికి డిమాండ్ విపరీతంగా పెరిగే అవకాశం ఉందని నిపుణులు విశ్లేషిస్తున్నారు.

తొలి ఎలక్ట్రిక్ స్పోర్ట్స్ కార్ లూస్ ప్రదర్శన

భారత్‌లో నిర్వహించిన ప్రత్యేక ప్రదర్శనలో ఫెరారీ తమ సరికొత్త ఎలక్ట్రిక్ కార్ Luceను ప్రదర్శించి అందరి దృష్టిని ఆకర్షించింది. ఈ పవర్‌ఫుల్ ఈవీ మోడల్‌ను భారత మార్కెట్‌లో కూడా లాంచ్ చేసే ఆలోచనలో ఉన్నట్లు కంపెనీ సూచనప్రాయంగా వెల్లడించింది. అయితే భారత్-ఈయూ వాణిజ్య ఒప్పందంలో ఎలక్ట్రిక్ వాహనాల దిగుమతి సుంకాల మినహాయింపులు పొందుపరిచారా లేదా అనే దానిపై ఇంకా స్పష్టత రావాల్సి ఉంది. రాబోయే రోజుల్లో అధునాతన టెక్నాలజీ, మైండ్ బ్లావింగ్ స్పీడ్‌తో రానున్న ఫెరారీ కార్లు భారత వీధుల్లో హల్‌చల్ చేయడం ఖాయంగా కనిపిస్తోంది.