Bajaj Chetak : బజాజ్ చేతక్ ఉత్పత్తికి గండం..చైనా నిషేధంతో భారీగా తగ్గిన ఉత్పత్తి

Bajaj Chetak : ఎలక్ట్రిక్ వాహనాల మార్కెట్‌పై చైనా విధించిన రేర్ ఎర్త్ మాగ్నెట్స్ ఎగుమతి నిషేధం ప్రభావం ఇప్పుడు కనిపించడం మొదలైంది. భారతదేశంలో అత్యంత ప్రజాదరణ పొందిన ఎలక్ట్రిక్ స్కూటర్లలో ఒకటైన బజాజ్ చేతక్ ఉత్పత్తిపై ఈ నిషేధం తీవ్రమైన ప్రభావాన్ని చూపుతోంది. చైనా నిషేధం వల్ల రేర్ ఎర్త్ మాగ్నెట్స్ కొరత ఏర్పడి, బజాజ్ ఆటో ఉత్పత్తి గణనీయంగా పడిపోయింది. మార్కెట్‌లో డిమాండ్ ఉన్నప్పటికీ ఉత్పత్తి తగ్గడం పరిశ్రమ వర్గాల్లో ఆందోళన కలిగిస్తోంది.

ఉత్పత్తిలో భారీగా తగ్గుదల

దేశంలోని ఆటోమొబైల్ తయారీదారుల సంఘం విడుదల చేసిన తాజా గణాంకాల ప్రకారం.. బజాజ్ ఆటో గత నెలలో కేవలం 10,824 చెతక్ ఎలక్ట్రిక్ స్కూటర్లను మాత్రమే తయారు చేసింది. ఇది గత ఏడాది జూలై 2024లో ఉత్పత్తి చేసిన 20,384 యూనిట్లతో పోలిస్తే 47% తక్కువ. అంతేకాకుండా, జూన్ 2025లో ఉత్పత్తి అయిన 18,479 యూనిట్లతో పోలిస్తే ఇది 41% తక్కువ. ఈ సంఖ్యలు స్పష్టంగా రేర్ ఎర్త్ మాగ్నెట్స్ కొరత ప్రభావం ఎంత తీవ్రంగా ఉందో తెలియజేస్తున్నాయి. ఎలక్ట్రిక్ వాహనాల మోటార్లు, పవర్ స్టీరింగ్ సిస్టమ్‌లు, డాష్‌బోర్డ్ డిస్‌ప్లేలు, ఎల్‌ఈడీ లైటింగ్ సిస్టమ్‌ల తయారీలో ఈ మాగ్నెట్‌లు కీలక పాత్ర పోషిస్తాయి.

డీలర్లకు తగ్గిన స్కూటర్ల సరఫరా

ఫ్యాక్టరీ ఉత్పత్తి తగ్గడం వల్ల డీలర్లకు చేసే సరఫరా కూడా భారీగా పడిపోయింది. గత నెలలో డీలర్లకు పంపిన చేతక్ స్కూటర్ల సంఖ్య ఏడాదివారీగా 42% తగ్గి, 11,584 యూనిట్లకు చేరుకుంది. గతేడాది జూలై 2024లో ఈ సంఖ్య 20,114 యూనిట్లుగా ఉంది. ఈ ఏడాదిలో ఇదే అత్యల్ప నెలవారీ సరఫరా. గతంలో జూన్ 2025లో 18,479 యూనిట్లు సరఫరా చేయగా, అది ఈ ఏడాదిలో రెండో అత్యల్ప సరఫరాగా నమోదైంది.

ఆగస్టు నెల నుంచి పరిస్థితిలో మెరుగుదల?

రేర్ ఎర్త్ మాగ్నెట్స్ సరఫరా సంక్షోభం ఆగస్టులో కూడా కొనసాగుతుందని భావించారు. అయితే, బజాజ్ ఆటో ఎగ్జిక్యూటివ్ డైరెక్టర్ రాకేష్ శర్మ ఒక నెల క్రితం మాట్లాడుతూ జూన్ చివరి నుంచి తమ ఉత్పత్తి ప్రభావితమైందని, జూలైలో ఉత్పత్తి 50% తగ్గిందని చెప్పారు. "ఆగస్టులో ఉత్పత్తి సున్నా అవుతుందని మేము భావించాము, కానీ అలా జరగదు. ఆగస్టులో ఉత్పత్తి జూలై కంటే మెరుగ్గా ఉంటుంది, అయినప్పటికీ ఇది ఇప్పటికీ ప్రణాళికలో 50-60% మాత్రమే ఉంటుంది" అని ఆయన తెలిపారు. ఈ సంక్షోభాన్ని అధిగమించడానికి కంపెనీ ప్రత్యామ్నాయ పరిష్కారాలపై దృష్టి సారించింది.

బజాజ్ ఆటో అన్వేషిస్తున్న పరిష్కారాలు

ఈ సమస్యను పరిష్కరించడానికి బజాజ్ ఆటో రెండు రకాల వ్యూహాలను అనుసరిస్తోంది. అందుబాటులో ఉన్న తేలికపాటి రేర్ ఎర్త్ మాగ్నెట్లను ఉపయోగించడం ఒక పద్ధతి. మరొకటి, రేర్ ఎర్త్ మెటీరియల్‌లను అస్సలు ఉపయోగించని కొత్త మాగ్నెట్ టెక్నాలజీని అభివృద్ధి చేయడం. అయితే, ఈ సంక్షోభం ఇతర కంపెనీలపై అంతగా ప్రభావం చూపడం లేదు. టీవీఎస్ గత నెలలో 23,742 ఐక్యూబ్ స్కూటర్లను తయారు చేసింది. ఇది గతేడాది జూలై కంటే 6% ఎక్కువ. అలాగే ఏథర్ ఎనర్జీ 16,148 ఈ-స్కూటర్లను ఉత్పత్తి చేసి 45% వృద్ధిని నమోదు చేసింది.