GST Effect : టూ-వీలర్ మార్కెట్‌కు జీఎస్టీ ఊతం.. అమ్మకాలు 6% పెరిగే ఛాన్స్

GST Effect : భారతీయ ఆటోమొబైల్ రంగానికి జీఎస్టీ కౌన్సిల్ నిర్ణయం పెద్ద ప్రోత్సాహాన్ని ఇచ్చింది. క్రిసిల్ రేటింగ్స్ విడుదల చేసిన నివేదిక ప్రకారం.. జీఎస్టీ తగ్గింపు వల్ల ఈ ఆర్థిక సంవత్సరంలో టూ-వీలర్ అమ్మకాల్లో 5 నుంచి 6 శాతం పెరుగుదల కనిపించవచ్చు. ఈ చర్య వల్ల దేశీయ మార్కెట్‌లో డిమాండ్ పెరుగుతుందని, ముఖ్యంగా టూ-వీలర్, ప్యాసెంజర్ వెహికల్స్ విభాగాల్లో ఇది స్పష్టంగా కనిపిస్తుందని క్రిసిల్ తెలిపింది. ఈ రెండు విభాగాలు కలిసి మొత్తం అమ్మకాల్లో దాదాపు 90 శాతం వాటాను కలిగి ఉన్నాయి.

క్రిసిల్ రేటింగ్స్ అంచనా ప్రకారం, జీఎస్టీ తగ్గింపు వల్ల టూ-వీలర్ డిమాండ్‌లో 200 బేసిస్ పాయింట్లు, ప్యాసెంజర్ వెహికల్ డిమాండ్‌లో 100 బేసిస్ పాయింట్ల పెరుగుదల ఉంటుంది. ఈ ఏడాది తొలి త్రైమాసికంలో టూ-వీలర్ అమ్మకాలు మందగించాయి. దీనికి ప్రధాన కారణం ఓబీడీ2 నిబంధనలు అమలు కావడం, ముందుగానే వచ్చిన నైరుతి రుతుపవనాల వల్ల గ్రామీణ ప్రాంతాల్లో డిమాండ్ తగ్గడం. అయితే, ఇప్పుడు పన్ను తగ్గింపు వల్ల ఈ పరిస్థితి మెరుగుపడే అవకాశం ఉంది.

బైక్ ధరలు ఎంత తగ్గుతాయంటే..

జీఎస్టీ తగ్గింపుతో టూ-వీలర్ ధరలు రూ.3,000 నుంచి రూ.7,000 వరకు తగ్గే అవకాశం ఉంది. ఈ మార్పు నవరాత్రి, పండుగల సీజన్ కంటే ముందే అమలవ్వడంతో అమ్మకాలు మరింత పుంజుకుంటాయి. కొత్త జీఎస్టీ స్ట్రక్చర్ ప్రకారం.. చిన్న ప్యాసెంజర్ వాహనాలు, 350సీసీ వరకు ఉన్న టూ-వీలర్లు, త్రీ వీలర్లు, కమర్షియల్ వెహికల్స్‌పై జీఎస్టీ రేటు 28% నుంచి 18%కి తగ్గింది. అయితే, 350సీసీ కంటే ఎక్కువ సామర్థ్యం ఉన్న బైక్‌లపై మాత్రం 40% పన్ను కొనసాగుతుంది. ఈ నిర్ణయం ఆటోమొబైల్ రంగానికి ఒక ముఖ్యమైన మలుపు కానుంది, ముఖ్యంగా పండుగల సీజన్‌లో కొత్త మోడళ్లు విడుదలవుతున్న నేపథ్యంలో ఇది మరింత ప్రయోజనకరంగా ఉంటుంది.