E20 Petrol : E20 పెట్రోల్ కొట్టించాక ఇంజన్ సీజ్.. మారుతి సుజుకికి కోర్టు షాక్

E20 Petrol : దేశవ్యాప్తంగా పర్యావరణ కాలుష్యాన్ని తగ్గించేందుకు కేంద్ర ప్రభుత్వం ఇంధన రంగంలో ఎథనాల్ బ్లెండింగ్‌ను వేగవంతం చేస్తోంది. ఇందులో భాగంగానే చాలా పెట్రోల్ బంకుల్లో 20 శాతం ఎథనాల్ కలిపిన E20 పెట్రోల్‌ను విరివిగా విక్రయిస్తున్నారు. అయితే ఈ ఇంధనం వాడకం వల్ల తన కొత్త కారు ఇంజన్ పాడైపోయిందంటూ ఓ కస్టమర్ దాఖలు చేసిన కేసులో ఛత్తీస్‌గఢ్ రాజధాని రాయ్‌పూర్‌లోని జిల్లా వినియోగదారుల వివాదాల పరిష్కార ఫోరం చారిత్రాత్మక తీర్పునిచ్చింది. ఈ కేసులో ప్రముఖ కార్ల తయారీ సంస్థ మారుతి సుజుకి ఇండియాకు గట్టి షాక్ తగిలింది. బాధితుడికి 45 రోజుల్లోగా అదే మోడల్‌కు చెందిన సరికొత్త E20 ఇంధన అనుకూలమైన కారును ఉచితంగా ఇవ్వాలని కోర్టు ఆదేశించింది.

వినియోగదారుల ఫోరం సంచలన తీర్పు

ఒకవేళ గడువులోగా కంపెనీ కొత్త కారును అందించలేకపోతే, సదరు కారు కొనుగోలు విలువ అయిన రూ.20,50,494 (రూ.20.50 లక్షలు) మొత్తాన్ని బాధితుడికి పూర్తిగా తిరిగి చెల్లించాలని కోర్టు స్పష్టం చేసింది. దీనితో పాటు కారు ఇంజన్ సమస్య వల్ల కస్టమర్ పడిన మానసిక ఆందోళనకు, ఇబ్బందులకు పరిహారంగా రూ.లక్ష జరిమానా చెల్లించాలని కోరింది. అలాగే కోర్టు ఖర్చుల నిమిత్తం మరో రూ.10 వేలను బాధితుడికి ఇవ్వాలని మారుతి సుజుకి సంస్థను ఆదేశించింది. ఈ తీర్పు ఇప్పుడు దేశవ్యాప్తంగా ఉన్న మిడిల్ క్లాస్ వాహనదారులలో ఒక కొత్త ఆశను రేకెత్తించింది.

కోర్టులో కస్టమర్ వాదనకు జడ్జి గ్రీన్ సిగ్నల్

బాధిత వాహనదారుడు తెలిపిన వివరాల ప్రకారం.. అతను కారు కొనుగోలు చేసిన తర్వాత బంకుల్లో లభించే E20 పెట్రోల్‌ను ఉపయోగించడం ప్రారంభించాడు. అయితే, ఆ ఇంధనం వాడటం మొదలుపెట్టినప్పటి నుంచే కారు ఇంజన్ పనితీరు క్షీణించింది. కారు స్టార్ట్ కాకపోవడం, ఇంజన్ నుంచి వింత శబ్దాలు రావడం, మిస్-ఫైరింగ్ లాంటి తీవ్రమైన సాంకేతిక లోపాలు తలెత్తాయి. దీనిపై కంపెనీ సర్వీస్ సెంటర్లలో ఎన్నిసార్లు రిపేర్ చేయించినా సమస్య పరిష్కారం కాలేదు. దీంతో సదరు కస్టమర్ రాయ్‌పూర్ వినియోగదారుల ఫోరాన్ని ఆశ్రయించాడు. విచారణలో భాగంగా ప్రస్తుతం పెట్రోల్ బంకుల్లో E20 పెట్రోల్ మాత్రమే లభిస్తోందని, సామాన్య కస్టమర్లకు ఇంధన విషయంలో వేరే ప్రత్యామ్నాయం లేనప్పుడు దీనివల్ల జరిగే నష్టానికి కంపెనీయే బాధ్యత వహించాలని కోర్టు అభిప్రాయపడింది.

కంపెనీ వాదనలు కొట్టివేసిన కోర్టు

న్యాయస్థానంలో మారుతి సుజుకి తన వాదనలను వినిపిస్తూ.. సదరు కారు E20 పెట్రోల్ వాడకానికి అనుకూలంగానే నిర్మించబడిందని, ఇంజన్ పాడవడానికి కస్టమర్ సరిగ్గా మెయింటెనెన్స్ చేయకపోవడమే కారణం కావొచ్చని పేర్కొంది. కానీ కారును అనేకసార్లు సర్వీస్ సెంటర్‌కు తీసుకువెళ్లిన రికార్డులను పరిశీలించిన కోర్టు కంపెనీ వాదనలను తిరస్కరించింది. కొత్త ఇంధన విధానాలు మార్కెట్లోకి వచ్చినప్పుడు కస్టమర్ల ప్రయోజనాలను కాపాడాల్సిన బాధ్యత సంస్థలపైనే ఉందని కోర్టు తేల్చి చెప్పింది. ఈ కీలక తీర్పు భవిష్యత్తులో వాహన తయారీ కంపెనీలు తమ ఇంజన్ నాణ్యత విషయంలో మరింత జాగ్రత్తగా ఉండేలా చేస్తుందని ఆటోమొబైల్ రంగ నిపుణులు భావిస్తున్నారు.