EV Charging Tips: 80% ఛార్జింగ్ రూల్ వెనుక అసలు రహస్యం.. మీ కారు బ్యాటరీ లైఫ్ పెంచే టిప్స్ ఇవే

EV Charging Tips: ప్రస్తుత కాలంలో ఎలక్ట్రిక్ వాహనాల వాడకం విపరీతంగా పెరిగిపోయింది. కారు కొనుగోలు చేసిన తర్వాత దాని నిర్వహణపై ప్రతి ఒక్కరూ ప్రత్యేక శ్రద్ధ చూపుతుంటారు. ముఖ్యంగా ఈవీ బ్యాటరీని ప్రతిరోజూ 100 శాతం పూర్తి స్థాయిలో ఛార్జ్ చేయాలా? లేక 80 శాతానికే ఆపేయాలా? అనే సందేహం చాలా మందిలో ఉంటుంది. ఈ ప్రశ్నకు సమాధానం మీ వాహనంలో ఏ రకమైన బ్యాటరీ అమర్చబడిందనే దానిపై ఆధారపడి ఉంటుంది. మార్కెట్లో లభించే లిథియం-అयनన్ బ్యాటరీల సాంకేతికత ఆధారంగా ఛార్జింగ్ విధానం మారుతూ ఉంటుంది.

ఎన్ఎంసీ బ్యాటరీలను 80% ఎందుకు ఉంచాలి?

మీ ఎలక్ట్రిక్ కారులో ఎన్ఎంసీ (Nickel Manganese Cobalt) రకం బ్యాటరీ ఉంటే, రోజూవారీ ప్రయాణాలకు దానిని 80 శాతం వరకు మాత్రమే ఛార్జ్ చేయడం ఉత్తమం. ఎందుకంటే బ్యాటరీని ఎప్పుడూ 100 శాతం నింపి ఉంచితే దాని సెల్స్‌పై తీవ్రమైన ఒత్తిడి పడుతుంది. కాలక్రమేణా ఈ ఒత్తిడి కారణంగా బ్యాటరీ సామర్థ్యం తగ్గుతూ వస్తుంది. మీరు కేవలం ఆఫీసుకు వెళ్లడానికి లేదా నగరంలో తిరగడానికి మాత్రమే కారును వాడితే, ఫుల్ ఛార్జ్ చేయాల్సిన అవసరం లేదు. 80 శాతం ఛార్జింగ్ మీ రోజువారీ అవసరాలకు సరిపోతుంది.

100% ఛార్జ్ చేయడం వల్ల కలిగే నష్టాలు ఏమిటి?

ఎప్పుడూ బ్యాటరీని ఫుల్ చేయకూడదని కాదు. సుదూర ప్రాంతాలకు ప్రయాణించే సమయంలో 100 శాతం ఛార్జింగ్ చేసుకోవడం అవసరమే. అయితే ఎల్లప్పుడూ అలాగే ఉంచితే మాత్రం బ్యాటరీ లైఫ్ త్వరగా తగ్గిపోతుంది. అంతేకాకుండా పూర్తి ఛార్జ్ అయిన స్థితిలో రీజెనరేటివ్ బ్రేకింగ్ ద్వారా తయారయ్యే శక్తిని స్టోర్ చేసుకునేందుకు స్థలం ఉండదు. దీనివల్ల ఆ ఫీచర్ సరిగ్గా పనిచేయదు. కాబట్టి దీర్ఘకాలిక ప్రయోజనాల కోసం రోజువారీ వాడకంలో 80 శాతం నియమం పాటించడం మంచిది.

ఎల్‌ఎఫ్‌పి బ్యాటరీల విషయంలో భిన్నమైన నియమం

కొన్ని ఎలక్ట్రిక్ కార్లలో ఎల్‌ఎఫ్‌పి (Lithium Iron Phosphate) బ్యాటరీలను ఇస్తుంటారు. ఈ రకమైన బ్యాటరీల ఛార్జింగ్ పద్ధతి కాస్త భిన్నంగా ఉంటుంది. బ్యాటరీ మేనేజ్‌మెంట్ సిస్టమ్ (BMS) కచ్చితమైన ఛార్జ్ శాతాన్ని లెక్కించేందుకు కంపెనీలు అప్పుడప్పుడు దీనిని 100 శాతం వరకు ఛార్జ్ చేయాలని సూచిస్తాయి. అందువల్ల మీ కారు యూజర్ మాన్యువల్ పరిశీలించి అందులోని సూచనల ప్రకారం నడుచుకోవడం చాలా ముఖ్యం.

బ్యాటరీ లైఫ్ పెంచడానికి పాటించాల్సిన జాగ్రత్తలు

ఈవీ బ్యాటరీ ఎక్కువ కాలం మన్నాలంటే కొన్ని చిన్నచిన్న జాగ్రత్తలు తీసుకోవడం తప్పనిసరి. బ్యాటరీ పూర్తిగా ఖాళీ అయ్యే వరకు (0% వరకు) కారును నడపకండి. అలాగే అత్యధిక వేడి ఉండే ప్రదేశాలలో కారును ఎక్కువ రోజులు పూర్తిగా ఛార్జ్ చేసిన స్థితిలో లేదా చాలా తక్కువ ఛార్జ్‌తో నిలపకండి. ఈ చిన్నపాటి మెలకువలు పాటిస్తే మీ ఎలక్ట్రిక్ వాహన బ్యాటరీ ఎటువంటి ఇబ్బంది లేకుండా సుదీర్ఘకాలం పాటు అద్భుతమైన పనితీరును కనబరుస్తుంది.