Hero Vida : మూడేళ్ల కష్టం ఫలించింది.. ఒక్క ఏడాదిలోనే లక్ష యూనిట్లు అమ్మిన హీరో విడా

 Hero Vida : భారతదేశంలో ఎలక్ట్రిక్ టూ-వీలర్ విభాగం చాలా వేగంగా వృద్ధి చెందుతోంది. ఈ మార్కెట్‌లో హీరో మోటోకార్ప్ అడుగుపెట్టి మూడు సంవత్సరాలు దాటినా, ఇప్పుడు తొలిసారిగా ఒకే క్యాలెండర్ సంవత్సరంలో లక్ష యూనిట్లకు పైగా ఎలక్ట్రిక్ స్కూటర్లను విక్రయించి రికార్డు సృష్టించింది. తాజా వాహన్ పోర్టల్ డేటా ప్రకారం, 2025 జనవరి 1 నుంచి డిసెంబర్ 5 వరకు మొత్తం 1,00,383 విడా ఎలక్ట్రిక్ స్కూటర్లు అమ్ముడయ్యాయి. అక్టోబర్ 2022లో లాంచ్ అయినప్పటి నుంచి హీరో విడా మొత్తం విక్రయాలు 1.5 లక్షల యూనిట్లను దాటాయి.

హీరో విడా ఎలక్ట్రిక్ స్కూటర్ మార్కెట్‌లోకి నవంబర్ 2022లో అడుగుపెట్టింది. అప్పటి నుంచి డిసెంబర్ 2024 వరకు మొత్తం 55,033 యూనిట్లు అమ్ముడవగా, కేవలం 2025లో తొలి 11 నెలలు 5 రోజుల్లోనే 1,00,383 యూనిట్లు అమ్ముడయ్యాయి. అంటే, ఇప్పటివరకు జరిగిన మొత్తం 1,55,416 యూనిట్ల అమ్మకాల్లో దాదాపు 65% కేవలం ఈ సంవత్సరంలోనే జరిగాయి. 2025 ప్రారంభం (జనవరిలో 1,626 యూనిట్లు) నెమ్మదిగా ఉన్నప్పటికీ, మార్చి నుంచి జూన్ వరకు వరుసగా నాలుగు నెలలు 6,000 యూనిట్లకు పైగా విక్రయాలు జరిగాయి. జూలైలో తొలిసారిగా 10,000 యూనిట్ల మైలురాయిని దాటింది. అక్టోబర్‌లో అత్యధికంగా 16,017 హీరో విడా స్కూటర్లు అమ్ముడయ్యాయి.

తీవ్ర పోటీ ఉన్న ఈ-టూవీలర్ మార్కెట్‌లో విడా అద్భుతమైన ప్రదర్శన కనబరుస్తోంది. నెలవారీ విక్రయాల ప్రకారం టాప్ 10 ఎలక్ట్రిక్ టూ-వీలర్ తయారీదారుల (OEM) జాబితాలో ఇది తన స్థానాన్ని స్థిరంగా మెరుగుపరుచుకుంటోంది. జనవరిలో 7వ స్థానం, ఫిబ్రవరిలో 6వ స్థానంలో ఉన్న విడా, మార్చి నుంచి అక్టోబర్ వరకు స్థిరంగా 5వ స్థానంలో కొనసాగింది. అత్యంత కీలకమైన అంశం ఏమిటంటే నవంబర్ నెలలో విడా, ఓలా ఎలక్ట్రిక్‌ను వెనక్కి నెట్టి 4వ ర్యాంకును కైవసం చేసుకుంది.

ఈ ఏడాది హీరో విడా ఇప్పటివరకు 1,00,383 ఎలక్ట్రిక్ స్కూటర్లను విక్రయించింది, ఇది గత ఏడాదితో పోలిస్తే 135% అధికం. ఈ అమ్మకాలతో కంపెనీ ఎలక్ట్రిక్ టూ-వీలర్ మార్కెట్‌లో 8% వాటాను సొంతం చేసుకుంది. భారతదేశంలో ఈ సంవత్సరంలో మొత్తం 11.9 లక్షల ఎలక్ట్రిక్ టూ-వీలర్లు అమ్ముడయ్యాయి. హీరో విడా కాకుండా, TVS (23% వాటా), బజాజ్ ఆటో (21%), ఓలా ఎలక్ట్రిక్ (16%), ఏథర్ ఎనర్జీ (15%) తో కలిపి మొత్తం 5 కంపెనీలు ఈ సంవత్సరం లక్షకు పైగా యూనిట్లను విక్రయించే రికార్డును నెలకొల్పాయి.