Hyundai : క్రెటా, వెన్యూలకు గుడ్ బై..హ్యుందాయ్ నుంచి అదిరిపోయే ఎలక్ట్రిక్ కారు

Hyundai : హ్యుందాయ్ మోటార్ కంపెనీ తన ఐకానిక్ ఎంపీవీ ఎలక్ట్రిక్ వెర్షన్ హ్యుందాయ్ స్టారియా ఎలక్ట్రిక్‎ను 2026 బ్రసెల్స్ మోటార్ షోలో ఘనంగా ఆవిష్కరించింది. కేవలం ఒక కారులా కాకుండా, రోడ్డుపై ప్రయాణించే ఒక అత్యాధునిక లగ్జరీ లాంజ్‎లా దీనిని తీర్చిదిద్దారు. 2026 ప్రథమార్ధంలో కొరియా, యూరప్ మార్కెట్లలో ఇది అడుగుపెట్టనుంది. గతేడాది భారత్‌లో జరిగిన ఆటో ఎక్స్‌పో 2025లో దీని ఇంధన వెర్షన్‌ను చూసిన ఆటో ప్రియులకు, ఇప్పుడు ఈ కంప్లీట్ ఎలక్ట్రిక్ మోడల్ సరికొత్త అనుభూతిని ఇస్తోంది. ముఖ్యంగా ప్రీమియం సౌకర్యాలు కోరుకునే పెద్ద కుటుంబాలకు ఇది ఒక అద్భుతమైన ఎంపిక.

దీని డిజైన్ విషయానికి వస్తే, హ్యుందాయ్ ఇన్‌సైడ్ అవుట్ అనే వినూత్న ఫిలాసఫీని వాడింది. అంటే ప్రయాణికులకు లోపల ఎంత స్పేస్ కావాలో ముందుగా ప్లాన్ చేసి, దానికి అనుగుణంగా వెలుపలి రూపాన్ని డిజైన్ చేశారు. ముందు భాగంలో పొడవుగా సాగే హారిజాంటల్ ఎల్‌ఈడీ లైట్ బార్చ క్లోజ్డ్ గ్రిల్ దీనికి ఒక స్పేస్‌షిప్ లాంటి ఫ్యూచరిస్టిక్ లుక్ ఇస్తాయి. వెడల్పాటి స్లైడింగ్ డోర్లు, భారీ విండోస్ వల్ల కారు లోపల ఉన్నవారికి బయట ప్రపంచం సినిమా స్క్రీన్‌లా కనిపిస్తుంది.

కారు లోపలి భాగం ఒక విలాసవంతమైన హోటల్ గదిని తలపిస్తుంది. డ్యాష్‌బోర్డ్‌పై రెండు 12.3-ఇంచుల స్క్రీన్లు ఉన్నాయి. ఒకటి డ్రైవర్ సమాచారం కోసం, మరొకటి ఎంటర్‌టైన్‌మెంట్ కోసం. ఇది 7-సీటర్, 9-సీటర్ ఆప్షన్లలో లభిస్తుంది. 7-సీటర్ మోడల్‌లో సెకండ్ రో సీట్లు పూర్తిగా వెనక్కి వాలి విశ్రాంతి తీసుకోవడానికి వీలుగా రిలాక్సేషన్ మోడ్‎ను కలిగి ఉంటాయి. ఇక 9-సీటర్ వెర్షన్‌లో సీట్లు మడతపెడితే ఏకంగా 1,303 లీటర్ల భారీ కార్గో స్పేస్ అందుబాటులోకి వస్తుంది.

పెర్ఫార్మెన్స్, బ్యాటరీ విషయానికి వస్తే, స్టారియా ఎలక్ట్రిక్ తన శక్తిని చాటుతోంది. ఇందులో 84 kWh సామర్థ్యం గల భారీ బ్యాటరీ ప్యాక్ ఉంది, ఇది ఒక్కసారి ఛార్జ్ చేస్తే 400 కిమీ వరకు ప్రయాణించే వీలు కల్పిస్తుంది. ఇందులో ఉన్న 800-వోల్ట్ అల్ట్రా-ఫాస్ట్ ఛార్జింగ్ టెక్నాలజీ వల్ల, కేవలం 20 నిమిషాల్లోనే బ్యాటరీని 10 నుండి 80 శాతానికి ఛార్జ్ చేసుకోవచ్చు. దీని మోటార్ 215 bhp శక్తిని, 350 Nm టార్క్‌ను ఉత్పత్తి చేస్తూ, భారీ వాహనాన్ని కూడా ఎంతో సునాయాసంగా నడిపిస్తుంది.

వచ్చే ఏడాది గ్లోబల్ మార్కెట్లో విడుదలైన తర్వాత, హ్యుందాయ్ ఈ ఎలక్ట్రిక్ ఎంపీవీని భారత మార్కెట్లోకి కూడా తీసుకువచ్చే అవకాశం ఉందని సమాచారం. ఆధునిక టెక్నాలజీ, అత్యున్నత భద్రతా ఫీచర్లు, రాజసం ఉట్టిపడే లుక్ కలగలిసిన ఈ స్టారియా ఎలక్ట్రిక్, భవిష్యత్తు ప్రయాణాలకు ఒక నిలువుటద్దంలా నిలుస్తుంది.