Kia Carnival: పండగ వేళ కియా కార్నివాల్‌పై భారీ ఆఫర్.. రూ.1.70 లక్షల వరకు ఆదా

Kia Carnival: పండగ సీజన్‌లో కొత్త వాహనం కొనుగోలు చేయాలనుకునే లగ్జరీ కార్ లవర్లకు కియా మోటార్స్ తీపి కబురు అందించింది. సాధారణంగా బడ్జెట్ కార్లపై ఇచ్చే డిస్కౌంట్ల గురించి ఎక్కువ చర్చ జరుగుతుంటుంది, కానీ ఈసారి కియా తన ఫ్లాగ్‌షిప్ లగ్జరీ MPV మోడల్ కియా కార్నివాల్ పై భారీ ఆఫర్లను ప్రకటించింది. అక్టోబర్ నెలకు సంబంధించి ఈ కారుపై ఏకంగా రూ.1.70 లక్షల వరకు లబ్ధి పొందే అవకాశాన్ని కల్పిస్తోంది. పెద్ద కుటుంబాలకు అత్యంత సౌకర్యవంతమైన ప్రయాణాన్ని అందించే ఈ లగ్జరీ కారుపై లభిస్తున్న ఆఫర్ వివరాలను చూద్దాం.

రూ. 1.70 లక్షల డిస్కౌంట్ లభించేది ఎలా?

కియా కార్నివాల్‌పై ప్రకటించిన రూ.1.70 లక్షల ప్రయోజనాన్ని మూడు విభాగాలుగా విభజించారు. అందులో ఎక్స్చేంజ్ బోనస్, స్క్రాపేజ్ బోనస్, కార్పొరేట్ డిస్కౌంట్ కలిసి ఉన్నాయి. మీ వద్ద ఉన్న పాత కారును మార్చి కొత్త కియా కార్నివాల్ కొనుగోలు చేస్తే గరిష్టంగా రూ.లక్ష వరకు ఎక్స్చేంజ్ బోనస్ లభిస్తుంది. దీనితో పాటు పాత వాహనాన్ని స్క్రాప్ చేయడానికి ఇస్తే రూ.20,000 వరకు స్క్రాపేజ్ బోనస్ అందిస్తున్నారు. ఉద్యోగులు, ఎంపిక చేసిన సంస్థల సిబ్బంది కోసం ప్రత్యేకంగా రూ.50,000 వరకు కార్పొరేట్ డిస్కౌంట్ కేటాయించారు. ఇవన్నీ కలిపితే మొత్తం రూ.1.70 లక్షల వరకు ఆదా అవుతుంది.

వీఐపీ సీటింగ్ సౌకర్యాలు

కియా కార్నివాల్ కారులో అత్యంత శక్తివంతమైన 3.5-లీటర్ స్మార్ట్‌స్ట్రీమ్ V6 పెట్రోల్ ఇంజిన్ అమర్చారు. ఇది రోడ్డుపై సాఫీగా, వేగంగా ప్రయాణించేందుకు ఎంతగానో తోడ్పడుతుంది. కారు కేబిన్ డిజైన్ ప్రయాణికుల సౌకర్యానికి ప్రాధాన్యతనిస్తూ తీర్చిదిద్దారు. రెండవ వరుసలో ప్రెసిడెన్షియల్ క్లాస్ అనుభూతినిచ్చే విఐపి 3D కెప్టెన్ సీట్లు అందించారు. సుదీర్ఘ ప్రయాణాలు చేసే కుటుంబాలకు ఇవి అద్భుతమైన సౌకర్యాన్ని ఇస్తాయి. కేబిన్ లోపల చల్లని, వేడి పానీయాలు ఉంచుకోవడానికి కప్ హోల్డర్లు, కూల్డ్ స్టోరేజ్, షూస్ ఉంచుకోవడానికి ప్రత్యేక స్థలం వంటి ప్రీమియం ఫీచర్లు ఉన్నాయి.

ధర ఎంత?

భారత మార్కెట్లో కియా కార్నివాల్ ప్రారంభ ఎక్స్-షోరూమ్ ధర సుమారు రూ.59.45 లక్షల నుంచి రూ.59.65 లక్షల మధ్యలో ఉంది. అంతటి భారీ లగ్జరీ కారుపై రూ.1.70 లక్షల వరకు పొదుపు చేసుకోవడం మంచి అవకాశంగా భావించవచ్చు. అయితే ఈ ఆఫర్లు నగరం, డీలర్‌షిప్‌ వద్ద ఉన్న స్టాక్, మీరు ఎంచుకునే వేరియంట్ ఆధారంగా మారే అవకాశం ఉంటుంది. కొనుగోలు చేయడానికి ముందు దగ్గర్లోని కియా డీలర్‌ను సంప్రదించి ఎక్స్చేంజ్ విలువ, కార్పొరేట్ డిస్కౌంట్ అర్హతలను సరిచూసుకోవడం శ్రేయస్కరం.