Mahindra XUV 3XO : మహీంద్రా నుంచి గుడ్ న్యూస్.. త్వరలో సీఎన్‌జీ అవతారంలో XUV 3XO ఎంట్రీ

Mahindra XUV 3XO : పెట్రోల్, డీజిల్ ధరలు మండిపోతున్న తరుణంలో సామాన్యుడికి సీఎన్‌జీ కార్లే పెద్ద ఊరట. ఇప్పటికే మారుతి, టాటా కంపెనీలు సీఎన్‌జీ విభాగంలో పాగా వేయగా, ఇప్పుడు దేశీయ దిగ్గజం మహీంద్రా కూడా ఆ దిశగా అడుగులు వేస్తోంది. తన పాపులర్ ఎస్‌యూవీ XUV 3XOను సీఎన్‌జీ వెర్షన్‌లో లాంచ్ చేసేందుకు కంపెనీ సిద్ధమవుతోంది. భారీ ఫీచర్లు, అదిరిపోయే మైలేజీతో రాబోతున్న ఈ కారు, మార్కెట్లో ఉన్న బ్రెజా, నెక్సాన్ వంటి కార్లకు గట్టి పోటీ ఇచ్చేలా కనిపిస్తోంది.

భారత మార్కెట్లో ప్రస్తుతం క్లీన్ ఫ్యూయల్ కార్లకు డిమాండ్ విపరీతంగా పెరిగింది. ముఖ్యంగా సబ్-4 మీటర్ల ఎస్‌యూవీ విభాగంలో సీఎన్‌జీ కార్లదే హవా. ఈ క్రమంలోనే మహీంద్రా తన లేటెస్ట్ మోడల్ XUV 3XOలో సీఎన్‌జీ ఆప్షన్ తీసుకురావాలని భావిస్తోంది. రిపోర్ట్స్ ప్రకారం, ఈ కారు 2026 చివరి నాటికి లేదా 2027 ప్రారంభంలో రోడ్లపైకి రావచ్చు. ఇప్పటికే ఈ కారుకు ఉన్న క్రేజ్ చూస్తుంటే, సీఎన్‌జీ వెర్షన్ వస్తే అమ్మకాలు మరింత పెరిగే అవకాశం ఉంది.

ప్రస్తుతం XUV 3XOలో మూడు రకాల ఇంజిన్ ఆప్షన్లు ఉన్నాయి. అయితే సీఎన్‌జీ వెర్షన్ కోసం కంపెనీ 1.2-లీటర్ MPFi టర్బో పెట్రోల్ ఇంజిన్‌ను ఉపయోగించే అవకాశం ఉంది. ఇది 111 hp పవర్, 200 Nm టార్క్‌ను ఉత్పత్తి చేస్తుంది. సీఎన్‌జీ కిట్ జత చేయడం వల్ల పవర్ కొంచెం తగ్గే అవకాశం ఉన్నప్పటికీ, మైలేజీ విషయంలో మాత్రం అద్భుతమైన రిజల్ట్ ఇస్తుందని కంపెనీ ఆశిస్తోంది. టర్బో ఇంజిన్‌తో సీఎన్‌జీ రావడం వల్ల డ్రైవింగ్ అనుభవం కూడా పవర్‌ఫుల్‌గా ఉంటుంది.

మార్కెట్లో ఇప్పటికే మారుతి సుజుకి బ్రెజా సీఎన్‌జీ, టాటా నెక్సాన్ సీఎన్‌జీ (ట్విన్ సిలిండర్ టెక్నాలజీ) తన ఆధిపత్యాన్ని ప్రదర్శిస్తున్నాయి. వీటికి చెక్ పెట్టాలంటే మహీంద్రా కేవలం మైలేజీ మాత్రమే కాకుండా, బూట్ స్పేస్ విషయంలో కూడా కొత్త టెక్నాలజీని వాడాల్సి ఉంటుంది. టాటా లాగా ట్విన్ సిలిండర్ టెక్నాలజీని మహీంద్రా అనుసరిస్తుందా లేదా అనేది ఇంకా సస్పెన్స్. అయితే మహీంద్రా బ్రాండ్ వాల్యూ, కారులో ఉండే అత్యాధునిక ఫీచర్లు కస్టమర్లను ఆకట్టుకుంటాయి.

సాధారణంగా సీఎన్‌జీ కార్లలో కొన్ని లగ్జరీ ఫీచర్లు తగ్గించడం చూస్తుంటాం. కానీ మహీంద్రా మాత్రం XUV 3XO సీఎన్‌జీని ప్రీమియం వేరియంట్లలో కూడా అందించే ప్లాన్ చేస్తోంది. డ్యూయల్ 10.25-అంగుళాల స్క్రీన్లు, లెవల్-2 ADAS, పనోరమిక్ సన్‌రూఫ్, 360-డిగ్రీ కెమెరా వంటి అగ్రశ్రేణి ఫీచర్లు సీఎన్‌జీ వెర్షన్‌లోనూ ఉండే ఛాన్స్ ఉంది. సేఫ్టీ విషయంలో రాజీ పడకుండా 6 ఎయిర్‌బ్యాగ్స్ వంటి ఫీచర్లు స్టాండర్డ్‌గా రాబోతున్నాయి.

ప్రస్తుతం XUV 3XO ధర రూ. 7.54 లక్షల నుంచి రూ. 14.88 లక్షల వరకు ఉంది. సీఎన్‌జీ వెర్షన్ వస్తే, పెట్రోల్ మోడల్ కంటే రూ.80,000 నుంచి రూ.లక్ష వరకు ధర ఎక్కువగా ఉండవచ్చు. అంటే సుమారు రూ.9 లక్షల నుంచి రూ.12 లక్షల మధ్య సీఎన్‌జీ వేరియంట్లు లభించే అవకాశం ఉంది. పెరుగుతున్న పొల్యూషన్ నిబంధనలను దృష్టిలో ఉంచుకుని మహీంద్రా తీసుకుంటున్న ఈ నిర్ణయం ఆ కంపెనీ భవిష్యత్తుకు చాలా కీలకం కానుంది.