Windsor EV : టియాగో, నెక్సాన్ కు షాక్.. ఎలక్ట్రిక్ కారు మార్కెట్ ను షేక్ చేస్తున్న ఎంజీ విండ్సర్

Windsor EV : భారత మార్కెట్‌లో ఎలక్ట్రిక్ వాహనాల డిమాండ్ రోజురోజుకూ పెరుగుతోంది. ముఖ్యంగా పెట్రోల్, డీజిల్ ధరలు పెరగడం, పర్యావరణంపై అవగాహన పెరగడంతో వినియోగదారులు ఇప్పుడు చాలామంది ఈవీల వైపు చూస్తున్నారు. ఆర్థిక సంవత్సరం 2025లో ఎలక్ట్రిక్ కార్ల అమ్మకాలు ఒక కొత్త మైలురాయిని చేరుకున్నాయి. ఈ పోటీలో అన్నిటికంటే ముందు నిలిచింది ఎంజీ మోటార్కు చెందిన విండ్‌సర్ ఈవీ. అమ్మకాల విషయంలో ఎంజీ విండ్‌సర్ ఈవీ అన్ని కంపెనీలను వెనక్కి నెట్టి అగ్రస్థానాన్ని కైవసం చేసుకుంది. గత ఆర్థిక సంవత్సరంలో ఈ మోడల్ మొత్తం 19,394 యూనిట్లు అమ్ముడైంది. దీంతో ఇది దేశంలో అత్యధికంగా అమ్ముడైన ఎలక్ట్రిక్ కారుగా నిలిచింది. ఆసక్తికరమైన విషయం ఏమిటంటే.. గత కొన్ని నెలలుగా ఈ ఈవీ వరుసగా నంబర్ 1 స్థానంలోనే కొనసాగుతోంది.

రెండో స్థానంలో టాటా పంచ్ ఈవీ నిలిచింది. దీనిని 17,966 మంది కొనుగోలు చేశారు. టాటా మోటార్స్ ఈ కారును ఇటీవలనే మార్కెట్‌లో విడుదల చేసింది. విడుదలైన కొద్ది కాలంలోనే దీనికి అద్భుతమైన స్పందన లభించింది. దీని కాంపాక్ట్ డిజైన్, ఎక్కువ రేంజ్, తక్కువ ధర కస్టమర్ల మధ్య దీనికి ఎంతో ప్రజాదరణను తీసుకొచ్చాయి. మూడో స్థానంలో టాటా టియాగో ఈవీ నిలిచింది. దీని 17,145 యూనిట్లు అమ్ముడయ్యాయి. టియాగో ఈవీ ముఖ్యంగా మధ్యతరగతి కుటుంబాలకు ఒక అద్భుతమైన ఎంపికగా మారింది. దీని ధర, నడుపడానికి అయ్యే ఖర్చు ఇతర కార్లతో పోలిస్తే చాలా తక్కువ.

నాలుగో స్థానంలో టాటా నెక్సాన్ ఈవీ ఉంది. ఇది గతంలో చాలా కాలం పాటు ఈవీ సెగ్మెంట్‌కు లీడరుగా నిలిచింది. ఈ సంవత్సరం దీని 13,978 యూనిట్లు అమ్ముడయ్యాయి. ఇక ఐదో స్థానంలో ఎంజీ కామెట్ ఈవీ నిలిచింది. దీని అమ్మకాలు 10,149 యూనిట్లుగా ఉన్నాయి.

ఆరో స్థానంలో టాటా కర్వ్ ఈవీ ఉంది. దీనిని 7,534 మంది కస్టమర్లు కొనుగోలు చేశారు. ఆ తర్వాత ఏడో స్థానంలో ఎంజీ జెడ్ఎస్ ఈవీ ఉంది. దీని అమ్మకాలు 7,042 యూనిట్లుగా ఉన్నాయి. ఎనిమిదో స్థానంలో మహీంద్రా ఎక్స్‌ఈవీ 9ఇ నిలిచింది. దీని 5,422 యూనిట్లు అమ్ముడయ్యాయి. తొమ్మిదో స్థానంలో మహీంద్రా ఎక్స్‌యూవీ400 నిలిచింది, ఇది 4,843 యూనిట్లను విక్రయించింది. చివరగా, పదో స్థానంలో టాటా టిగోర్ ఈవీ నిలిచింది. ఇది 4,820 యూనిట్లు అమ్ముడయ్యాయి.