Hyundai Venue : రూ.7.90 లక్షలకే అదిరే ఫీచర్లు.. కంప్లీట్ గా మారిపోయిన హ్యుందాయ్ వెన్యూ

Hyundai Venue : భారత మార్కెట్‌లో అత్యంత ప్రజాదరణ పొందిన సబ్-కాంపాక్ట్ ఎస్‌యూవీలలో ఒకటైన హ్యుందాయ్ వెన్యూ సరికొత్త అవతారంలో లాంచ్ అయింది. హ్యుందాయ్ మోటార్ ఇండియా ఈ రోజు (నవంబర్ 4, 2025) నాడు కొత్త వెన్యూను విడుదల చేసింది. మరింత పెద్దగా ఆకర్షణీయంగా మారిన ఈ ఎస్‌యూవీ.. పూర్తిగా కొత్త క్యాబిన్ డిజైన్, అత్యుత్తమ టెక్ ఫీచర్లు, బలమైన ఇంజిన్ ఆప్షన్స్‌తో వచ్చింది. కేవలం రూ.7.90 లక్షల ప్రారంభ ధరతో విడుదలైన ఈ కారు ఫీచర్లు, ఇంజిన్ ఆప్షన్లు, అది అందించే స్పోర్టీ ఎన్-లైన్ వెర్షన్ వివరాలు తెలుసుకుందాం.

కొత్త 2025 హ్యుందాయ్ వెన్యూ బాహ్య డిజైన్‌లో పెద్ద మార్పులు చేసింది. ఇది 4 మీటర్ల లోపే ఉన్నా, గతంలో కంటే మరింత ఆకర్షణీయంగా, దృఢంగా కనిపిస్తోంది. కొత్త వెన్యూలో షార్ప్ లైన్లు, కొత్త గ్రిల్, స్కిడ్ ప్లేట్, 16 అంగుళాల అల్లాయ్ వీల్స్ ఉన్నాయి. వెనుకవైపు ఎల్-ఆకారంలో రిఫ్లెక్టర్‌తో కూడిన ఫుల్ లైట్ బార్ ఆకట్టుకునేలా ఉంది. దీని స్పోర్టీ వెర్షన్ అయిన ఎన్-లైన్లో 17 అంగుళాల అల్లాయ్ వీల్స్, డ్యూయల్ ఎగ్జాస్ట్ టిప్స్ వంటి ప్రత్యేక డిజైన్ అంశాలు లభిస్తాయి. కొత్త వెన్యూ ఇంటీరియర్ పూర్తిగా మారిపోయింది. ఇది ఇప్పుడు చాలా ప్రీమియంగా, టెక్నాలజీతో నిండి ఉంది.

పాత 8 అంగుళాల టచ్‌స్క్రీన్ స్థానంలో, ఇప్పుడు రెండు పెద్ద 12.3 అంగుళాల స్క్రీన్‌లు (ఒకటి డిజిటల్ క్లస్టర్, మరొకటి ఇన్ఫోటైన్‌మెంట్) ఇచ్చారు. ఇది క్యాబిన్‌కు ప్రీమియం లుక్ ఇచ్చింది. కొత్త స్టీరింగ్ వీల్ డిజైన్, ఎలక్ట్రిక్ పార్కింగ్ బ్రేక్, మెరుగైన క్వాలిటీ గల బటన్లు, కంట్రోల్స్ ఉన్నాయి. ఇన్ఫోటైన్‌మెంట్ సిస్టమ్‌లో OTA అప్‌డేట్స్, వైర్‌లెస్ యాపిల్ కార్‌ప్లే/ఆండ్రాయిడ్ ఆటో, ccNC సిస్టమ్ ఉన్నాయి. సేఫ్టీ కోసం ADAS లెవెల్ 2, 6 ఎయిర్‌బ్యాగ్‌లు, 360° కెమెరా, బ్లైండ్ వ్యూ మానిటర్ వంటి ఫీచర్లు ఉన్నాయి. లగ్జరీ కోసం వెంటిలేటెడ్ సీట్లు, డ్రైవర్ పవర్ సీట్, సింగిల్-పాన్ సన్‌రూఫ్, బోస్ 8 స్పీకర్ల సౌండ్ సిస్టమ్ కూడా ఇచ్చారు.

హ్యుందాయ్ కొత్త వెన్యూలో ఇంజిన్ ఆప్షన్స్‌లో కూడా అనేక ఆప్షన్లను అందిస్తోంది. 1.2 లీటర్ పెట్రోల్ ఇంజిన్ మాన్యువల్ గేర్‌బాక్స్‌తో లభిస్తుంది. 1.0 లీటర్ టర్బో పెట్రోల్ ఇంజిన్ ఇప్పుడు DCT ఆటోమేటిక్, మాన్యువల్ గేర్‌బాక్స్ రెండింటితో వస్తుంది. 1.5 లీటర్ డీజిల్ ఇంజిన్ కూడా ఇప్పుడు టార్క్ కన్వర్టర్ ఆటోమేటిక్ గేర్‌బాక్స్‌తో అందుబాటులో ఉంది. ఎన్-లైన్ వెర్షన్‌లో 120 బీహెచ్‌పీ పవర్ ఉత్పత్తి చేసే టర్బో ఇంజిన్ ఉంటుంది, ఇది సాధారణ వెన్యూ కంటే మరింత స్పోర్టీ డ్రైవింగ్ అనుభవాన్ని ఇస్తుంది. కొత్త హ్యుందాయ్ వెన్యూ ప్రారంభ ధర చాలా పోటీతత్వంగా నిర్ణయించబడింది. కొత్త హ్యుందాయ్ వెన్యూ ధర రూ.7.90 లక్షల నుంచి ప్రారంభమవుతుంది. ఈ కారు మొత్తం ఏడు వేరియంట్లలో లభిస్తుంది.