Nissan Gravite : నేడే నిస్సాన్ గ్రావైట్ లాంచ్..రూ.6 లక్షలకే 7-సీటర్ కారు..మధ్యతరగతికి ఇక పండగే

Nissan Gravite : భారతదేశంలో మధ్యతరగతి కుటుంబాలకు తక్కువ బడ్జెట్‌లో 7-సీటర్ కారు కొనడం అనేది ఒక కల. ఆ కలను సాకారం చేసేందుకు నిస్సాన్ ఇండియా నేడు తన అత్యంత ప్రతిష్టాత్మకమైన ఎంపీవీ గ్రావైట్‎ను మార్కెట్లోకి విడుదల చేస్తోంది. 4 మీటర్ల కంటే తక్కువ పొడవు ఉండి, ఏడుగురు సౌకర్యవంతంగా కూర్చునే వెసులుబాటు ఉన్న కార్లు మన దేశంలో చాలా తక్కువ. ప్రస్తుతం ఈ విభాగంలో రెనాల్ట్ ట్రైబర్ మాత్రమే ఏకఛత్రాధిపత్యం వహిస్తుండగా, దానికి గట్టి పోటీ ఇచ్చేందుకు గ్రావైట్ సిద్ధమైంది. ఈ కారు ప్రారంభ ధర సుమారు రూ.6 లక్షలు (ఎక్స్-షోరూమ్) ఉండవచ్చని, టాప్ మోడల్ రూ.9 లక్షల వరకు వెళ్లే అవకాశం ఉందని మార్కెట్ వర్గాల అంచనా.

నిస్సాన్ గ్రావైట్ చూడ్డానికి చాలా బోల్డ్‌గా, స్టైలిష్‌గా ఉంటుంది. ఇది రెనాల్ట్ ట్రైబర్ ప్లాట్‌ఫారమ్‌పైనే నిర్మించినప్పటికీ, డిజైన్ పరంగా నిస్సాన్ తనదైన ముద్ర వేసింది. దీని ఫ్రంట్ గ్రిల్ చాలా పెద్దదిగా ఉండి కారుకు ఒక అగ్రెసివ్ లుక్‌ను ఇస్తుంది. షార్ప్ డిజైన్ బంపర్, ఎల్ఈడీ హెడ్‌లైట్స్, సరికొత్త డీఆర్ఎల్ ప్యాటర్న్ ఈ కారును ప్రీమియంగా చూపిస్తాయి. కారు ఎత్తు కూడా కాస్త ఎక్కువగా ఉండటం వల్ల రోడ్డుపై వెళ్తుంటే ఒక చిన్న ఎస్‌యూవీ వెళ్తున్న అనుభూతి కలుగుతుంది. బోనెట్‌పై ఉన్న లైన్స్ కారుకు మరింత దృఢత్వాన్ని జోడించాయి.

కారు లోపలి భాగం (కేబిన్) బ్లాక్, వైట్ డ్యూయల్-టోన్ కలర్ కాంబినేషన్‌లో ఉండబోతోంది. దీనివల్ల కారు లోపల చాలా విశాలంగా, వెలుతురుతో నిండినట్లు కనిపిస్తుంది. డ్యాష్‌బోర్డ్ డిజైన్ కూడా చాలా సింపుల్‌గా, యూజర్ ఫ్రెండ్లీగా ఉంది. ఈ ఎంపీవీలో ప్రధాన ఆకర్షణ సీటింగ్ ఫ్లెక్సిబిలిటీ. మీకు అవసరం లేనప్పుడు మూడో వరుస సీట్లను పూర్తిగా తొలగించుకోవచ్చు, దీనివల్ల సామాన్లు పెట్టుకోవడానికి భారీ బూట్ స్పేస్ లభిస్తుంది. రెండో వరుస సీట్లను కూడా ముందుకు, వెనక్కు జరుపుకునే సౌకర్యం ఉండటం ప్రయాణికులకు మరింత సౌకర్యాన్ని ఇస్తుంది.

టెక్నాలజీ విషయానికి వస్తే, గ్రావైట్‌లో 8-అంగుళాల ఫ్లోటింగ్ టచ్‌స్క్రీన్ ఇన్ఫోటైన్‌మెంట్ సిస్టమ్ ఉంటుంది. ఇది వైర్‌లెస్ ఆండ్రాయిడ్ ఆటో, ఆపిల్ కార్‌ప్లేను సపోర్ట్ చేస్తుంది. నిస్సాన్ మాగ్నైట్ నుంచి తీసుకున్న స్టీరింగ్ వీల్, దానిపై కంట్రోల్ బటన్లు కారుకు ప్రీమియం టచ్ ఇస్తాయి. వెనుక కూర్చునే వారి కోసం ప్రత్యేకంగా రియర్ ఏసీ వెంట్లతో పాటు రూఫ్-మౌంటెడ్ బ్లోయర్లు కూడా ఏర్పాటు చేశారు. ఇంజిన్ పరంగా ఇందులో 1.0 లీటర్ పెట్రోల్ ఇంజిన్ ఉంటుంది, ఇది 72bhp పవర్, 96Nm టార్క్‌ను ఉత్పత్తి చేస్తుంది. ఇది 5-స్పీడ్ మాన్యువల్, ఏఎంటీ (AMT) గేర్‌బాక్స్ ఆప్షన్లతో లభిస్తుంది.