EV Adoption : చైనాను నమ్ముకుంటే కుదరదు.. ఎలక్ట్రిక్ వాహనాలతోనే భారత్‌కు ఇంధన భద్రత

EV Adoption : పశ్చిమ ఆసియా దేశాలలో నెలకొన్న తాజా సంక్షోభ పరిస్థితులు భారతదేశ ఇంధన దిగుమతులపై తీవ్ర ప్రభావాన్ని చూపిస్తున్నాయి. ఈ నేపథ్యంలో దేశ ఇంధన భద్రతను బలోపేతం చేసుకోవడానికి ఎలక్ట్రిక్ వాహనాల వాడకాన్ని వేగవంతం చేయడం, ఈవీ స్పేర్ పార్ట్స్ విషయంలో చైనాపై ఆధారపడటాన్ని తగ్గించడం అత్యంత ప్రాధాన్యతగా మారిందని ప్రధానమంత్రి నరేంద్ర మోదీ సలహాదారు తరుణ్ కపూర్ స్పష్టం చేశారు. ప్రముఖ పరిశ్రమల మండలి అసోచామ్ నిర్వహించిన ఒక ప్రత్యేక సదస్సులో ఆయన మాట్లాడుతూ.. భారతదేశాన్ని ఈవీ హబ్‌గా మార్చడంతో పాటు, స్థానిక తయారీ రంగానికి ప్రభుత్వం పెద్దపీట వేయాల్సిన అవసరం ఉందని అభిప్రాయపడ్డారు.

పశ్చిమ ఆసియా సంక్షోభం ఒక హెచ్చరిక

ప్రస్తుత అంతర్జాతీయ పరిస్థితుల నేపథ్యంలో భారతదేశానికి ఎలక్ట్రిక్ వాహనాలను ప్రోత్సహించడం అనేది ఒక సాధారణ ఎంపిక కాదు, అది ఒక అత్యవసర బాధ్యత అని తరుణ్ కపూర్ పేర్కొన్నారు. విదేశాల నుండి మనం దిగుమతి చేసుకునే ముడి చమురు పరిమాణం తగ్గితే, దేశ ఆర్థిక వ్యవస్థ మరింత బలోపేతం అవుతుందని మరియు అంతర్జాతీయ మార్కెట్లో భారత రూపాయి విలువ మెరుగవుతుందని ఆయన వివరించారు. అంతర్జాతీయ సంక్షోభాలు వచ్చిన ప్రతిసారీ భారత షేర్ మార్కెట్లు ఒడిదొడుకులకు లోనవుతున్నాయని, ఇంధనం కోసం మనం వేరే దేశాలపై ఎక్కువగా ఆధారపడటమే ఇందుకు ప్రధాన కారణమని ఆయన ఆందోళన వ్యక్తం చేశారు. అందుకే దీనిని ఒక మిషన్ లాగా భావించి ముందుకు తీసుకెళ్లాలని పిలుపునిచ్చారు.

పెట్రోల్ వినియోగంలో 5 శాతం తగ్గినా భారీ మార్పు

దేశంలో పెట్రోలియం ఉత్పత్తుల వాడకాన్ని పూర్తిగా సున్నాకి తీసుకురావడం రాత్రికి రాత్రే సాధ్యం కాకపోవచ్చు, కానీ అందులో స్వల్ప తగ్గింపు వచ్చినా దేశ ఆర్థిక స్థితిగతుల్లో పెద్ద మార్పు వస్తుందని తరుణ్ కపూర్ అన్నారు. పెట్రోలియం వినియోగంలో కేవలం 5 శాతం కోత విధించినా అది దేశ బడ్జెట్‌కు భారీ ఉపశమనాన్ని ఇస్తుంది. ఇది సాధ్యం కావాలంటే మనం వేగంగా ఈవీ వైపు అడుగులు వేయాలి. ప్రస్తుతం దేశంలో ద్విచక్ర (టూ-వీలర్స్), త్రిచక్ర (త్రీ-వీలర్స్) వాహనాల విభాగంలో ఈవీల అమ్మకాలు బాగున్నా, ఫోర్-వీలర్స్ విభాగంలో ఇంకా చాలా దూరం ప్రయాణించాల్సి ఉందన్నారు. ముఖ్యంగా దేశంలో వినియోగమయ్యే మొత్తం పెట్రోల్‌లో 60 శాతం కేవలం టూ-వీలర్ల ద్వారానే ఖర్చవుతోంది కాబట్టి, ఈ విభాగంలో ఈవీల వాడకం పెరగడం చాలా కీలకం.

చైనా గుత్తాధిపత్యానికి బ్రేక్

ఈవీ రంగాన్ని విస్తరిస్తున్న తరుణంలో చైనా నుండి విడిభాగాల దిగుమతులను తగ్గించుకోవడంపై భారత్ ప్రత్యేక దృష్టి పెట్టాలని పీఎం సలహాదారు హెచ్చరించారు. విదేశీ దిగుమతులను పూర్తిగా ఆపివేయడం అసాధ్యమైనప్పటికీ, ఈవీలకు అత్యంత కీలకమైన బ్యాటరీ విడిభాగాలు మరియు అవసరమైన ఖనిజాలను దేశీయంగానే ఉత్పత్తి చేసుకోవాలి. భవిష్యత్తులో చైనా ఒకవేళ ఈ వస్తువుల ఎగుమతులపై ఎలాంటి ఆంక్షలు విధించినా భారత ఆటోమొబైల్ పరిశ్రమ దెబ్బతినకుండా ఉండాలంటే ఈ జాగ్రత్తలు తప్పనిసరి. ఈ స్వయంసమృద్ధి లక్ష్యాన్ని చేరుకోవడానికి పరిశ్రమ వర్గాలకు ప్రభుత్వం తరఫున అన్ని విధాలా సహకారం ఉంటుందని ఆయన హామీ ఇచ్చారు.

ఐదేళ్లలో మారనున్న భారత రోడ్ల చిత్రం

ఇటీవల ప్రకటించిన ఢిల్లీ ఎలక్ట్రిక్ వాహన విధానం దేశంలో ఈవీల వాడకాన్ని పెంచే దిశగా పడిన ఒక సరైన అడుగని తరుణ్ కపూర్ కొనియాడారు. రాబోయే రోజుల్లో కేంద్ర ప్రభుత్వం కూడా ఈవీల వ్యాప్తి కోసం మరింత వేగవంతమైన, స్పష్టమైన లక్ష్యాలతో కూడిన వ్యూహాన్ని అమలు చేయబోతోందని వెల్లడించారు. రాబోయే ఐదేళ్ల కాలంలో భారతదేశంలోని రోడ్లపై ఈవీల సంఖ్య ఊహించని రీతిలో పెరగాలని, ఈ రంగంలో భారత్ సాధించిన విప్లవాత్మక మార్పులను చూసి ప్రపంచ దేశాలు ఆశ్చర్యపోయేలా దేశీయ మార్కెట్ రూపాంతరం చెందబోతోందని ఆయన ఆశాభావం వ్యక్తం చేశారు.