Tata Motors:పండగ సీజన్‌లో టాటా ఈవీల హవా.. డిమాండ్‎కు అనుగుణంగా కంపెనీల ముందస్తు ప్లాన్

Tata Motors: దేశీయ ఆటోమొబైల్ దిగ్గజం టాటా మోటార్స్ ఈసారి పండుగల సీజన్‌లో సరికొత్త రికార్డులు సృష్టించేందుకు సిద్ధమవుతోంది. భారతీయ వాహనదారుల్లో ఎలక్ట్రిక్ కార్ల పట్ల ఆసక్తి ఊహించని రీతిలో పెరుగుతోంది. ఎంతలా అంటే, ప్రస్తుతం మార్కెట్లో ఉన్న డిమాండ్‌కు తగ్గట్టుగా కార్లను డెలివరీ చేయడం కంపెనీకి ఒక పెద్ద సవాలుగా మారింది. గత ఫిబ్రవరి నెలతో పోలిస్తే ఈవీల డిమాండ్ ఏకంగా 3.5 రెట్లు పెరిగిందని టాటా మోటార్స్ ప్యాసింజర్ వెహికల్స్ మేనేజింగ్ డైరెక్టర్ శైలేష్ చంద్ర వెల్లడించారు. ఈ భారీ డిమాండ్‌ను తట్టుకునేందుకు ఉత్పత్తి సామర్థ్యాన్ని గణనీయంగా పెంచుతున్నట్లు సంస్థ స్పష్టం చేసింది.

రికార్డు స్థాయి అమ్మకాలు.. పెరిగిన కెపాసిటీ

ప్రస్తుత ఆర్థిక సంవత్సరం మొదటి త్రైమాసికంలో టాటా మోటార్స్ ఎన్నడూ లేని విధంగా 34,000 కు పైగా ఎలక్ట్రిక్ వాహనాలను విక్రయించి సంచలనం సృష్టించింది. కంపెనీ సాధించిన మొత్తం ప్యాసింజర్ వాహనాల విక్రయాల్లో ఈవీల వాటానే ఏకంగా 20 శాతంగా నమోదు కావడం గమనార్హం. కేవలం జులై నెలలోనే 15,000 ప్యాసింజర్ వాహనాల హోల్‌సేల్ అమ్మకాలను నమోదు చేసింది. పెరిగిన కస్టమర్ల రద్దీకి అనుగుణంగా తన నెలవారీ ఉత్పత్తి సామర్థ్యాన్ని 9,000 యూనిట్ల నుంచి ఏకంగా 15,000 యూనిట్లకు పైగా పెంచింది. రాబోయే రోజుల్లో ఈ ప్రొడక్షన్ కెపాసిటీని మరింత విస్తరించాలని వ్యూహాలు రచిస్తోంది.

కచ్చితమైన లక్ష్యం.. అంతర్జాతీయ విస్తరణ

ఈ ఆర్థిక సంవత్సరంలో ఈవీ అమ్మకాల్లో 70 శాతానికి పైగా వృద్ధిని సాధించడమే లక్ష్యంగా టాటా ముందుకు సాగుతోంది. అలాగే మొత్తం ఎలక్ట్రిక్ వాహనాల మార్కెట్లో తన వాటాను 40 శాతానికి పైగా స్థిరపరచుకోవాలని చూస్తోంది. విదేశీ మార్కెట్లలోనూ కంపెనీ తన అడుగులను వేగవంతం చేస్తోంది. దక్షిణాఫ్రికాలో టాటా కార్లకు మంచి స్పందన లభిస్తోంది. ఏప్రిల్-జులై కాలంలో ఎగుమతులు 2,432 యూనిట్లకు చేరాయి. గత ఏడాది ఇదే సమయంలో ఇవి కేవలం 1,035 యూనిట్లు మాత్రమే కావడం విశేషం. మరో పెద్ద విదేశీ మార్కెట్లోకి ఎంట్రీ ఇచ్చేందుకు సైతం ప్రణాళికలు రూపుదిద్దుకుంటున్నాయి.

సవాళ్లు.. భవిష్యత్ వ్యూహాలు

ఒకవైపు అమ్మకాలు దూసుకెళ్తున్నప్పటికీ, ముడిసరుకుల ధరలు పెరగడం కంపెనీకి కొంత భారంగా మారింది. మొదటి త్రైమాసికంలో కమోడిటీ ధరల ప్రభావం ఆదాయంపై 4.5 శాతం వరకు పడింది. జూన్‌తో ముగిసిన త్రైమాసికంలో లాభం కొంత తగ్గినప్పటికీ, ఆ భారాన్ని కస్టమర్లపై పూర్తిస్థాయిలో మోపకుండా ఉత్పత్తి వ్యయాన్ని తగ్గించుకోవడానికి ప్రాధాన్యత ఇస్తోంది. టాటా సియెర్రా ఈవీ మోడల్‌కు కూడా మార్కెట్ నుంచి మంచి స్పందన వస్తోంది. రాబోయే రోజుల్లో ఈవీ, సీఎన్‌జీ విభాగాలపైనే ఎక్కువ దృష్టి పెడతామని, కస్టమర్ల అభిరుచికి తగ్గట్టు మార్పులు చేసేందుకు సిద్ధంగా ఉన్నామని ప్రతినిధులు తెలిపారు.

ఇంధన ధరలు పెరుగుతున్న వేళ పర్యావరణహిత ఎలక్ట్రిక్ కార్ల వైపు భారతీయులు వేగంగా అడుగులు వేస్తున్నారు. మారుతున్న ట్రెండ్‌కు అనుగుణంగా టాటా మోటార్స్ నెరుపుతున్న వ్యూహాలు పండుగల సీజన్‌లో కంపెనీకి తిరుగులేని విజయాలను అందించడం ఖాయంగా కనిపిస్తోంది.