Tata Punch : హ్యుందాయ్ ఎక్స్టర్, మారుతి ఫ్రాంక్స్‌లకు చుక్కలే..సేఫ్టీలో టాటా పంచ్ అరాచకం

Tata Punch : టాటా పంచ్ ఫేస్‌లిఫ్ట్ కారును భారత్ NCAP క్రాష్ టెస్ట్ చేసినప్పుడు, ఇది పెద్దలకు, పిల్లలకు రక్షణ కల్పించడంలో అద్భుతమైన ప్రతిభ కనబరిచి 5-స్టార్ రేటింగ్ దక్కించుకుంది. నిజానికి దీని పాత వెర్షన్ కూడా గ్లోబల్ NCAP టెస్టులో 5-స్టార్ సాధించింది. కానీ కొత్త 2026 మోడల్‌లో మరిన్ని అడ్వాన్స్‌డ్ ఫీచర్లను జోడించి దీనిని ఒక మినీ ట్యాంక్ లా మార్చేశారు. ఈ కారు మార్కెట్లో నిస్సాన్ మాగ్నైట్, రెనాల్ట్ కైగర్, సిట్రోయెన్ సి3 వంటి కార్లకు ముచ్చెమటలు పట్టిస్తోంది. దీనికి 5-స్టార్ రేటింగ్ రావడానికి గల ఆ 5 ముఖ్యమైన కారణాలు ఇప్పుడు చూద్దాం.

మొదటిది, 360-డిగ్రీ సరౌండ్ వ్యూ కెమెరా. సాధారణంగా లగ్జరీ కార్లలో కనిపించే ఈ ఫీచర్‌ను టాటా పంచ్‌లోనూ అందించారు. దీనివల్ల డ్రైవర్ కారు చుట్టూ ఏముందో స్క్రీన్ మీద క్లియర్ గా చూడవచ్చు. ఇరుకైన సందుల్లో లేదా రద్దీగా ఉండే ట్రాఫిక్ లో కారును పార్క్ చేసేటప్పుడు లేదా నడిపేటప్పుడు ఇది ఎంతగానో ఉపయోగపడుతుంది. ఇక రెండోది, హై-స్ట్రెంత్ బాడీ షెల్. టాటా కార్లంటేనే బిల్డ్ క్వాలిటీకి మారుపేరు. ఈ కారు బాడీని అత్యంత దృఢమైన ఉక్కుతో తయారు చేశారు. ప్రమాదం జరిగినప్పుడు వచ్చే వేగాన్ని లేదా ఒత్తిడిని ఈ బాడీ తనలో ఇముడ్చుకుని, లోపల ఉన్న ప్రయాణికుల క్యాబిన్ నలిగిపోకుండా కాపాడుతుంది.

మూడో ముఖ్యమైన ఫీచర్ 6 ఎయిర్‌బ్యాగులు. కొత్త పంచ్ ఫేస్‌లిఫ్ట్‌లో డ్యూయల్ ఫ్రంట్ ఎయిర్‌బ్యాగులతో పాటు, సైడ్, కర్టెన్ ఎయిర్‌బ్యాగులను స్టాండర్డ్ ఫీచర్లుగా ఇస్తున్నారు. అంటే ప్రమాదం ఏ వైపు నుంచి జరిగినా ప్రయాణికులకు రక్షణ లభిస్తుంది. నాలుగోది, హిల్ డిసెంట్ కంట్రోల్. కొండ ప్రాంతాల్లో లేదా ఎత్తుపల్లాల రోడ్లపై కారును కిందకు దింపేటప్పుడు డ్రైవర్ కంట్రోల్ తప్పకుండా ఈ టెక్నాలజీ సహాయపడుతుంది. దీనివల్ల కారు జారిపోకుండా సురక్షితంగా ప్రయాణించవచ్చు.

చివరగా, ఎలక్ట్రానిక్ స్టెబిలిటీ ప్రోగ్రామ్. కారు వేగంగా వెళ్తున్నప్పుడు అకస్మాత్తుగా మలుపు తిప్పినా లేదా రోడ్డు మీద జారే అవకాశం ఉన్నా ESP సిస్టమ్ కారును అదుపులో ఉంచుతుంది. కారు పల్టీలు కొట్టకుండా లేదా ట్రాక్ తప్పకుండా ఇది కాపాడుతుంది. ఈ ఐదు ఫీచర్ల కలయిక వల్లే టాటా పంచ్ ఇప్పుడు ఇండియాలో అత్యంత సురక్షితమైన కార్లలో ఒకటిగా నిలిచింది.