TVS Raider 125 vs Bajaj Pulsar NS125: టీవీఎస్ రైడర్ వర్సెస్ పల్సర్ NS125.. 125cc సెగ్మెంట్‌లో అసలైన కింగ్ ఎవరు?

TVS Raider 125 vs Bajaj Pulsar NS125: భారతదేశంలో 125cc బైక్ సెగ్మెంట్ అంటే ఒకప్పుడు కేవలం మైలేజీ కోసం మాత్రమే అనుకునేవారు. కానీ ఇప్పుడు కాలం మారింది. మైలేజీతో పాటు స్టైల్, పవర్, లేటెస్ట్ ఫీచర్లు కోరుకునే కుర్రాళ్ల కోసం మార్కెట్లోకి వచ్చిన రెండు సూపర్ బైక్స్ టీవీఎస్ రైడర్ 125, బజాజ్ పల్సర్ ఎన్ఎస్ 125. ముందుగా జేబు గురించి మాట్లాడుకుంటే.. టీవీఎస్ రైడర్ ఇక్కడ స్పష్టంగా గెలిచేస్తుంది. బజాజ్ పల్సర్ NS125 తో పోలిస్తే రైడర్ ధర సుమారు రూ. 10,000 వరకు తక్కువగా ఉంటుంది. ఆశ్చర్యకరమైన విషయం ఏంటంటే, రైడర్ లో మనకు లభించే ABS వేరియంట్ ధర, పల్సర్ బేస్ వేరియంట్ కంటే కూడా తక్కువ. ఈ రోజుల్లో సేఫ్టీ ముఖ్యం కాబట్టి, తక్కువ ధరలో ABS రావడం రైడర్‌కు పెద్ద ప్లస్ పాయింట్.

బజాజ్ పల్సర్ NS125 చూడటానికి చాలా మస్కులర్‌గా, కొంచెం పెద్ద బైక్‌లా కనిపిస్తుంది. దీని సీటు ఎత్తు ఎక్కువ, వీల్‌బేస్ పొడవుగా ఉండటం వల్ల హైవేలపై ప్రయాణించేటప్పుడు బైక్ చాలా స్థిరంగా ఉంటుంది. కానీ సిటీ ట్రాఫిక్‌లో దూసుకుపోవాలంటే మాత్రం టీవీఎస్ రైడర్ తిరుగులేనిది. దీని బరువు తక్కువగా ఉండటం వల్ల ఇరుకైన వీధుల్లో కూడా సులభంగా మలుపులు తీసుకోవచ్చు. రోజువారీ ఆఫీస్ లేదా కాలేజీ పనుల కోసం రైడర్ చాలా ప్రాక్టికల్‌గా ఉంటుంది.

ఫీచర్ల విషయంలో టీవీఎస్ రైడర్ నెక్స్ట్ లెవల్ అని చెప్పాలి. ఇందులో బ్లూటూత్ కనెక్టివిటీ, వాయిస్ అసిస్ట్, కాల్/మెసేజ్ అలర్ట్స్, టాప్ వేరియంట్‌లో కలర్ TFT డిస్‌ప్లే వంటి హై-ఎండ్ ఫీచర్లు ఉన్నాయి. దీనికి భిన్నంగా పల్సర్ NS125 ఇప్పటికీ పాత పద్ధతినే అనుసరిస్తోంది. ఇందులో సింపుల్ డిజిటల్ కన్సోల్ మాత్రమే ఉంటుంది. పల్సర్ తన ఓల్డ్ స్కూల్ లుక్‌ను కాపాడుకోవడానికి ఫీచర్ల జోలికి పెద్దగా వెళ్లలేదు.

టీవీఎస్ రైడర్ ఇంజన్ చాలా స్మూత్‌గా ఉంటుంది. తక్కువ వేగంలో కూడా మంచి టార్క్ అందిస్తుంది, దీనివల్ల ట్రాఫిక్‌లో పదే పదే గేర్లు మార్చాల్సిన అవసరం ఉండదు. ఇక పల్సర్ NS125 విషయానికి వస్తే, దీని ఇంజన్ హై RPM వద్ద పవర్ ఫుల్ గా ఉంటుంది. మీకు స్పోర్టీగా బైక్ నడపడం ఇష్టమైతే పల్సర్ మంచి అనుభూతిని ఇస్తుంది. మైలేజీ పరంగా కూడా రైడర్ కొంచెం మెరుగ్గా ఉంటుంది.

మోడ్రన్ ఫీచర్లు, అదిరిపోయే మైలేజీ, తక్కువ ధర, సిటీలో సులభంగా నడిపే బైక్ కావాలంటే కళ్ళు మూసుకుని టీవీఎస్ రైడర్ 125 వైపు వెళ్లండి. అలా కాకుండా పల్సర్ బ్రాండ్ మీద నమ్మకం ఉండి, కొంచెం బరువైన, మస్కులర్ లుక్, హైవే మీద వేగంగా వెళ్లడానికి ఇష్టపడితే బజాజ్ పల్సర్ NS125 ను ఎంచుకోండి.