Crude Oil: అంతర్జాతీయ మార్కెట్లో గత కొన్ని రోజులుగా ఆందోళన కలిగిస్తున్న ముడిచమురు ధరలు సోమవారం ఊహించని విధంగా తగ్గుముఖం పట్టాయి. ఏప్రిల్ 2020 తర్వాత ఎన్నడూ లేనివిధంగా భారీ పతనాన్ని చవిచూసిన క్రూడ్ ఆయిల్, తాజాగా వంద డాలర్ల మార్కు కంటే దిగువకు పడిపోయింది. అమెరికా అధ్యక్షుడు డొనాల్డ్ ట్రంప్ నుంచి వచ్చిన సానుకూల సంకేతాల కారణంగా అంతర్జాతీయ కమోడిటీ మార్కెట్లో ఈ సరికొత్త పరిణామం చోటుచేసుకుంది. దీంతో చమురు దిగుమతి చేసుకునే దేశాలకు, సామాన్య ప్రజలకు కొంత మేర ఊరట లభించే అవకాశం కనిపిస్తోంది.

బ్రెంట్ క్రూడ్ 97 డాలర్లకు పతనం

సోమవారం నాటి ట్రేడింగ్‌లో బ్రెంట్ క్రూడ్ ఫ్యూచర్స్ సుమారు 1.04 శాతం క్షీణించి 97.30 డాలర్ల స్థాయికి చేరుకుంది. ట్రేడింగ్ సమయంలో ఒక దశలో దీని ధర ఒక్క డాలరు కంటే ఎక్కువగా పడిపోవడం విశేషం. మరోవైపు అమెరికన్ వెస్ట్ టెక్సాస్ ఇంటర్మీడియట్ (WTI) క్రూడ్ ఆయిల్ కూడా 58 సెట్లు అంటే 0.60 శాతం తగ్గి 90.29 డాలర్ల వద్ద ట్రేడవుతోంది. గత వారంలో నమోదైన భారీ నష్టాల కొనసాగింపుగానే నేడు మార్కెట్లు ఈ దిశగా కదలడం గమనార్హం.

డొనాల్డ్ ట్రంప్ ప్రకటనతో వెల్లువెత్తిన ఊరట

చమురు ధరల పతనానికి ప్రధాన కారణం అమెరికా అధ్యక్షుడు డొనాల్డ్ ట్రంప్ ఇచ్చిన ఓ కీలక ఇంటర్వ్యూ. ఇరాన్‌తో జరుగుతున్న దౌత్యపరమైన చర్చలు ఒక స్పష్టమైన ఒప్పందానికి దారితీస్తే, ఆ దేశంపై కొత్త దాడులు చేసే ప్రసక్తే లేదని ఆయన స్పష్టం చేశారు. ఒక బలమైన శాంతి ఒప్పందం కుదిరితే సైనిక చర్య అవసరం ఉండదని ఆయన చెప్పడం మార్కెట్లలో భయాలను తగ్గించింది. అమెరికా మధ్యంతర ఎన్నికలలో డెమోక్రటిక్ పార్టీ విజయం సాధించడం కూడా ఉద్రిక్తతలు మరింత పెరగవనే భరోసా ఇన్వెస్టర్లకు అందించింది.

రియాద్‌పై హూతీల దాడి కలకలం.. భవిష్యత్తు అంచనాలు

ఒకవైపు దౌత్య చర్చలు సాగుతున్నప్పటికీ పశ్చిమాసియాలో ఉద్రిక్తతలు పూర్తిగా సమసిపోలేదు. యెమెన్‌కు చెందిన హూతీ విద్రోహులు సౌదీ అరామ్‌కో ఆఫీసులపై డ్రోన్ అలాగే క్షిపణి దాడికి ప్రయత్నించగా, భద్రతా బలగాలు వాటిని గాలిలోనే అడ్డుకున్నాయి. ఈ నేపథ్యంలో ప్రముఖ ఇన్వెస్ట్‌మెంట్ బ్యాంక్ గోల్డ్‌మన్ సాక్స్ ముడిచమురు భవిష్యత్తుపై ఆందోళనకర అంచనాలు వెలువరించింది. భవిష్యత్తులో సరఫరాలో అంతరాలొస్తే 2027 నాటికి బ్రెంట్ క్రూడ్ మళ్లీ 140 డాలర్లకు దూసుకెళ్లే ప్రమాదం ఉందని హెచ్చరించింది.

Tags: