EPFO: ప్రైవేట్ ఉద్యోగులకు గుడ్ న్యూస్..2025లో రిటైర్ అయితే ఎంత పెన్షన్ వస్తుంది?

 EPFO: ప్రైవేట్ రంగంలో పనిచేసే కోట్లాది మంది ఉద్యోగులకు రిటైర్మెంట్ తర్వాత భరోసా ఇచ్చేది ఎంప్లాయిస్ పెన్షన్ స్కీమ్. ప్రభుత్వ ఉద్యోగులలాగే ప్రైవేట్ ఉద్యోగులకు కూడా ప్రతి నెలా కచ్చితమైన పెన్షన్ వచ్చే అవకాశం ఉంది. మీరు 2025లో లేదా ఆ తర్వాత రిటైర్ అవ్వాలని ప్లాన్ చేస్తుంటే, మీ చేతికి ఎంత పెన్షన్ వస్తుందో ఈ క్రింది వివరాల ద్వారా సులభంగా తెలుసుకోవచ్చు. మీరు ఉద్యోగం చేస్తున్నప్పుడు ప్రతి నెలా మీ జీతం నుంచి పీఎఫ్ కట్ అవుతుంది. ఇందులో మీ యాజమాన్యం (కంపెనీ) చెల్లించే 12 శాతం వాటాలో.. 8.33 శాతం నేరుగా పెన్షన్ స్కీమ్ ఖాతాలోకి వెళ్తుంది. ఈ డబ్బు మీ రిటైర్మెంట్ తర్వాత పెన్షన్ రూపంలో అందుతుంది. అయితే, ఈ పెన్షన్ పొందాలంటే మీరు కనీసం 10 ఏళ్ల సర్వీసు పూర్తి చేసి ఉండాలి. సాధారణంగా 58 ఏళ్లు నిండిన తర్వాత పూర్తి పెన్షన్ తీసుకోవచ్చు.

పెన్షన్ లెక్కించే సులభమైన ఫార్ములా మీకు ఎంత పెన్షన్ వస్తుందో ఈపీఎఫ్ఓ ఒక ఫార్ములాను నిర్ణయించింది. అది: పెన్షన్ మొత్తం = (సగటు జీతం x మొత్తం ఉద్యోగ కాలం) ÷ 70 ఇక్కడ ఒక ముఖ్య విషయం ఏమిటంటే, పెన్షన్ లెక్కించడానికి ప్రభుత్వం నిర్ణయించిన గరిష్ట బేసిక్ జీతం పరిమితి నెలకు రూ. 15,000 మాత్రమే. మీ జీతం ఎంత ఎక్కువగా ఉన్నా, ప్రస్తుత నిబంధనల ప్రకారం పెన్షన్ లెక్కను రూ. 15,000 ఆధారంగానే చేస్తారు. ఉద్యోగ కాలం అంటే మీరు ఎన్ని సంవత్సరాలు పీఎఫ్ కట్టారనేది లెక్కలోకి వస్తుంది.

2025లో రిటైర్ అయితే ఎంత రావచ్చు? (ఉదాహరణ) ఒకవేళ ఒక ఉద్యోగి 2025లో రిటైర్ అవుతున్నారనుకుందాం. ఆయన మొత్తం 30 ఏళ్ల సర్వీసు పూర్తి చేశారు అనుకుంటే, పైన చెప్పిన ఫార్ములా ప్రకారం లెక్క ఇలా ఉంటుంది: (15,000 x 30) ÷ 70 = రూ. 6,428. అంటే ఆ ఉద్యోగికి ప్రతి నెలా సుమారు రూ. 6,428 పెన్షన్ లభిస్తుంది. ఒకవేళ మీరు 58 ఏళ్ల కంటే ముందే (అంటే 50 ఏళ్ల నుంచే) పెన్షన్ తీసుకోవాలనుకుంటే, తీసుకునే ప్రతి ఏటూ 4 శాతం చొప్పున పెన్షన్ మొత్తం తగ్గుతుంది. అదే 58 ఏళ్లు నిండాక తీసుకుంటే పూర్తి మొత్తం అందుతుంది.