EPFO: పీఎఫ్ విత్‌డ్రాయల్ ముందు అలర్ట్.. ఈ ఒక్క తప్పు చేస్తే పెన్షన్, పీఎఫ్ డబ్బులు గోవిందా

EPFO: ఉద్యోగుల భవిష్య నిధి (EPF) ఖాతాలో ఉద్యోగంలో చేరిన తేదీ (DoJ) లేదా ఉద్యోగం వదిలేసిన తేదీ (DoE) తప్పుగా నమోదైతే పీఎఫ్ బదిలీలు, డబ్బుల విత్ డ్రాతో పాటు ఎంప్లాయీస్ పెన్షన్ స్కీమ్ (EPS) అర్హతలపై తీవ్ర ప్రతికూల ప్రభావం పడుతుంది. ఈ చిన్న క్లరికల్ పొరపాటు వల్ల క్లెయిమ్‌లు తిరస్కరణకు గురయ్యే ప్రమాదం ఉందంటూ ఎంప్లాయీస్ ప్రావిడెంట్ ఫండ్ ఆర్గనైజేషన్ (EPFO) చందాదారులను అప్రమత్తం చేసింది. UAN ఖాతాతో అనుసంధానమైన ఎంప్లాయిమెంట్ హిస్టరీలో ఉద్యోగ ప్రారంభం, ముగింపు తేదీలు అత్యంత కీలకమైనవి. ప్రైవేట్ ఉద్యోగులు కంపెనీ మారిన సమయంలో పాత కంపెనీకి సంబంధించిన ఉద్యోగం వదిలేసిన తేదీ సరైన రీతిలో అప్‌డేట్ కాకపోతే ఆన్‌లైన్ పీఎఫ్ బదిలీ ప్రక్రియ ఆగిపోతుంది. ఈపీఎఫ్‌ఓ కొత్త ఎలక్ట్రానిక్ చలాన్ నిబంధనల ప్రకారం.. ఉద్యోగంలో చేరిన తేదీ నుంచి ఉద్యోగం వదిలిన తేదీ మధ్య కాలానికి మాత్రమే చందాలు జమ అవుతాయి. ఒకవేళ ఎగ్జిట్ డేట్ తప్పుగా ఉంటే తదుపరి చందాల లెక్కింపులో తీవ్ర సాంకేతిక ఇబ్బందులు తలెత్తుతాయి.

ఈపీఎస్ పెన్షన్ అర్హతపై తీవ్ర ప్రభావం

ఈ తేదీల లెక్కింపు ఎంప్లాయీస్ పెన్షన్ స్కీమ్‌కు మరింత ప్రాధాన్యతనిస్తుంది. ఈపీఎఫ్‌ఓ పెన్షన్ నిబంధనల ప్రకారం పెన్షన్ పొందేందుకు ఒక ఉద్యోగి కనీసం 10 సంవత్సరాల సర్వీసును పూర్తి చేయాల్సి ఉంటుంది. ఎగ్జిట్ లేదా జాయినింగ్ తేదీలు తప్పుగా నమోదైతే అసలు సర్వీస్ కాలాన్ని గణించడంలో వ్యత్యాసాలు వచ్చి 10 ఏళ్ల సరిహద్దులో ఉన్న ఉద్యోగులకు పెన్షన్ లభించే అర్హత చేజారే ప్రమాదం ఉంది. అయితే తేదీలు తప్పుగా ఉన్నంత మాత్రాన మీ పీఎఫ్ డబ్బులపై వచ్చే నెలవారీ వడ్డీ ఆగిపోదని, నిల్వ ఉన్న నిధులపై వడ్డీ యథాతథంగా జమ అవుతుందని సంస్థ స్పష్టం చేసింది.

సొంతంగా వివరాలు సవరించుకునే వెసులుబాటు

గతంలో ఈ పొరపాట్లను సరిదిద్దేందుకు పాత యాజమాన్యాల చుట్టూ తిరగాల్సి రాగా, ఆధార్ ఆధారితంగా యూఏఎన్ వెరిఫై అయిన సభ్యుల కోసం ప్రక్రియను ఈపీఎఫ్‌ఓ సులభతరం చేసింది. ఉద్యోగం వదిలిన 60 రోజుల తర్వాత సభ్యులే స్వయంగా పోర్టల్‌లోకి వెళ్లి వివరాలను సవరించుకోవచ్చు. సభ్యులు ఈపీఎఫ్‌ఓ మెంబర్ పోర్టల్‌లోకి లాగిన్ అయి Manage > Mark Exit ఆప్షన్ ఎంచుకుని, సంబంధిత పీఎఫ్ ఖాతా ద్వారా నిష్క్రమణ తేదీ, దానికి గల కారణాన్ని నమోదు చేసి ఆధార్ ఓటీపీతో ఆథెంటికేషన్ పూర్తి చేయవచ్చు.

ముందస్తు తనిఖీతో భవిష్యత్తు సురక్షితం

ఉద్యోగం మారిన వెంటనే లేదా ఉద్యోగం వదిలిన తక్షణమే మీ పీఎఫ్ సర్వీస్ హిస్టరీని తనిఖీ చేసుకోవడం ఎంతో శ్రేయస్కరం. అత్యవసరంగా డబ్బులు విత్‌డ్రా చేసుకునే సమయంలో లేదా ఉద్యోగ విరమణ దశలో ఈ సమస్యలను గుర్తించడం వల్ల వాటిని సరిదిద్దడం సవాలుగా మారుతుంది. అందువల్ల ఉద్యోగంలో చేరిన తేదీ, నిష్క్రమించిన తేదీలను పోర్టల్‌లో ఎప్పటికప్పుడు సరిచూసుకోవడం అవసరం. ఈపీఎఫ్ ఖాతాలో వివరాల ఖచ్చితత్వం లేకపోతే ఆర్థిక ప్రయోజనాల్లో తీవ్ర జాప్యం ఎదురవుతుంది. పీఎఫ్ బదిలీలు లేదా ఉపసంహరణ దరఖాస్తులు చేసే ముందే మీ సేవా వివరాలన్నీ సరిగ్గా ఉన్నాయో లేదో చెక్ చేసుకోవడం ఉత్తమం.