GST Collection : ఆగస్టులో తగ్గినా జీఎస్టీ వసూళ్లు మాత్రం సూపర్ హిట్.. ఎంత వచ్చిందంటే ?

GST Collection : ప్రభుత్వ ఖజానా జీఎస్టీ కలెక్షన్​తో కళకళలాడుతోంది. ఇటీవల విడుదలైన ప్రభుత్వ గణాంకాల ప్రకారం... ఆగస్టు 2025లో జీఎస్టీ కలెక్షన్ రూ. 1.86 లక్షల కోట్లకు చేరుకుంది. గత ఏడాది ఆగస్టు 2024లో జీఎస్టీ కలెక్షన్ రూ. 1.75 లక్షల కోట్లుగా ఉండగా, ఈసారి దాదాపు 6.5% పెరిగింది. అయితే, గత నెల, అంటే జులై 2025తో పోలిస్తే మాత్రం ఆగస్టు కలెక్షన్ కాస్త తక్కువగా ఉంది. జులైలో జీఎస్టీ కలెక్షన్ రూ. 1.96 లక్షల కోట్లుగా నమోదైంది. జులై నెలలో పండుగలు, ఇతర ఆర్థిక కార్యకలాపాల వల్ల కలెక్షన్ ఎక్కువగా ఉంది. కానీ ఆగస్టులో అది సాధారణ స్థాయికి చేరుకుంది. అయినప్పటికీ, గత సంవత్సరంతో పోలిస్తే ఆగస్టులో జీఎస్టీ కలెక్షన్ మెరుగ్గా ఉంది. ఈ ఏడాది ఏప్రిల్‌లో జీఎస్టీ కలెక్షన్ చరిత్రలోనే అత్యధికంగా రూ. 2.37 లక్షల కోట్లకు చేరుకుంది. ఇది ఇప్పటివరకు అత్యధికం.

ఆగస్టు 2025లో జీఎస్టీతో పాటు మొత్తం దేశీయ ఆదాయం కూడా పెరిగింది. ఇది రూ. 1.36 లక్షల కోట్లుగా నమోదైంది. ఇది గత ఏడాది కంటే 6.6 శాతం ఎక్కువ. అయితే, దిగుమతులపై పన్ను మాత్రం స్వల్పంగా తగ్గింది. అది ఏడాదికి 1.2 శాతం తగ్గి రూ. 49,354 కోట్లుగా నమోదైంది.

స్వాతంత్ర్య దినోత్సవం సందర్భంగా ప్రధాని నరేంద్ర మోదీ ఒక పెద్ద ప్రకటన చేశారు. జీఎస్టీలో తదుపరి తరం సంస్కరణలను దీపావళి నాటికి ప్రజల ముందుకు తీసుకువస్తామని చెప్పారు. ఈ సంస్కరణల వల్ల సామాన్య ప్రజలకు పన్నుల భారం తగ్గుతుందని, చిన్న వ్యాపారులు, మధ్యతరగతి వ్యాపారవేత్తలకు లాభం చేకూరుతుందని ఆయన అన్నారు. జీఎస్టీ అమలులోకి వచ్చి ఎనిమిదేళ్లు పూర్తయిందని, ఇప్పుడు పన్నుల వ్యవస్థను మరింత సులభంగా, ప్రభావవంతంగా మార్చాల్సిన సమయం వచ్చిందని ప్రధాని అన్నారు.

ఇటీవల వచ్చిన వార్తల ప్రకారం.. చాలా ప్రతిపక్ష పాలిత రాష్ట్రాలు కూడా జీఎస్టీ సంస్కరణలకు మద్దతు ఇస్తున్నాయి. జీఎస్టీ రేట్లు మరింత సరళంగా ఉండాలని, వ్యాపారులకు, సామాన్య ప్రజలకు లాభం చేకూరాలని అవి కోరుకుంటున్నాయి. అలాగే, లాభాలను కొందరు మాత్రమే పొందకుండా, అందరికీ ప్రయోజనాలు అందేలా చర్యలు తీసుకోవాలని అవి కోరుకుంటున్నాయి.