Stock Market : హోలీ పూట వెలవెల బోయిన మార్కెట్..సెన్సెక్స్ 1750 పాయింట్లు పతనం, రూ.9లక్షల కోట్లు ఆవిరి

Stock Market : మధ్యప్రాచ్యంలో రగులుతున్న యుద్ధ జ్వాలలు భారతీయుల హోలీ పండుగ రంగులను పూర్తిగా తుడిచిపెట్టేశాయి. దేశవ్యాప్తంగా బుధవారం (మార్చి 4) ప్రజలు హోలీ సంబరాల్లో మునిగిపోవాలని సిద్ధమవ్వగా, స్టాక్ మార్కెట్ మాత్రం ఇన్వెస్టర్ల గుండెల్లో రైళ్లు పరిగెత్తించింది. మార్కెట్ ప్రారంభమైన నిమిషాల వ్యవధిలోనే సెన్సెక్స్, నిఫ్టీలు పాతాళానికి పడిపోయాయి. ఒక్క రోజులోనే ఇన్వెస్టర్ల సంపద దాదాపు 9 లక్షల కోట్లు ఆవిరైపోయింది. గత మూడు రోజులుగా కొనసాగుతున్న ఈ అమ్మకాల సునామీ వల్ల ఇన్వెస్టర్లు మొత్తం మీద 20 లక్షల కోట్లు నష్టపోయారు. పండుగ పూట లాభాలు వస్తాయని ఆశించిన సామాన్య ఇన్వెస్టర్లకు ఈ పరిణామం కోలుకోలేని దెబ్బగా మారింది.

బుధవారం ఉదయం మార్కెట్ గంట మోగగానే బాంబే స్టాక్ ఎక్స్ఛేంజ్ సూచీ సెన్సెక్స్ ఏకంగా 1795 పాయింట్లు పతనమై 78,443 స్థాయికి చేరుకుంది. అటు నేషనల్ స్టాక్ ఎక్స్ఛేంజ్ సూచీ నిఫ్టీ కూడా 550 పాయింట్లకు పైగా నష్టపోయి 24,315 వద్ద ట్రేడయ్యింది. కేవలం భారత మార్కెట్లే కాదు, ఆసియా మార్కెట్లన్నీ రక్తసిక్తమయ్యాయి. కొరియాకు చెందిన కోస్పి ఏకంగా 8 శాతం కుప్పకూలింది. అమెరికా మార్కెట్లు కూడా నష్టాలతో ముగియడం మన మార్కెట్లపై తీవ్ర ప్రభావం చూపింది. పండుగ సెలవు తర్వాత బుధవారం మార్కెట్ మళ్లీ లాభాల బాట పడుతుందని ఊహించిన విశ్లేషకులకు కూడా ఈ స్థాయి పతనం షాక్ ఇచ్చింది.

మార్కెట్లు ఇంతలా కుప్పకూలడానికి ప్రధాన కారణం అమెరికా-ఇరాన్ మధ్య యుద్ధం ముదరడమే. ఇరాన్ సుప్రీం లీడర్ ఖమేనీ మరణం తర్వాత పశ్చిమ ఆసియాలో ఉద్రిక్తతలు తారాస్థాయికి చేరాయి. ఇజ్రాయెల్ క్షిపణుల వర్షం కురిపిస్తుండగా, అమెరికా అధ్యక్షుడు డొనాల్డ్ ట్రంప్ ఈ యుద్ధం మరో ఐదు వారాల పాటు కొనసాగవచ్చని, అంతకంటే ఎక్కువ కాలం సాగినా తాము సిద్ధమేనని ప్రకటించడం మంటల్లో నెయ్యి పోసినట్లయ్యింది. దీనివల్ల అంతర్జాతీయ మార్కెట్లో ముడి చమురు ధరలు మండిపోతున్నాయి. బ్రెంట్ క్రూడ్ బ్యారెల్ ధర 82 డాలర్లు దాటేసింది. చమురు ధరలు పెరిగితే భారత్ వంటి దేశాల్లో ద్రవ్యోల్బణం పెరుగుతుందనే భయం ఇన్వెస్టర్లను వెనక్కి తగ్గేలా చేసింది.

మరోవైపు భారత రూపాయి చరిత్రలోనే ఎన్నడూ లేనంత కనిష్ట స్థాయికి పడిపోయింది. డాలరుతో పోలిస్తే రూపాయి విలువ 92.15 కు పడిపోవడం భారత ఆర్థిక వ్యవస్థపై ఒత్తిడిని పెంచుతోంది. రూపాయి బలహీనపడటంతో విదేశీ ఇన్వెస్టర్లు తమ పెట్టుబడులను భారత్ నుంచి వెనక్కి తీసుకుంటున్నారు. కేవలం ఫిబ్రవరిలోనే వారు 6,641 కోట్ల విలువైన షేర్లను విక్రయించగా, మార్చి నెలలో కూడా అదే ఒరవడి కొనసాగుతోంది. ఈ వరుస పరిణామాల వల్ల మార్కెట్ క్యాప్ 4.56 లక్షల కోట్ల నుంచి 4.48 లక్షల కోట్లకు పడిపోయింది. పండుగ పూట మార్కెట్లు పచ్చగా ఉంటాయని ఆశించిన వారికి ఈ ఏడాది హోలీ మాత్రం తీరని నష్టాన్ని మిగిల్చింది.