Swiss Banks : స్విస్ బ్యాంకులో మూడు రెట్లు పెరిగిన భారతీయుల డబ్బులు.. ఏకంగా రూ.37,600 కోట్లు జమ

Swiss Banks : స్విస్ బ్యాంక్‌ల్లో మన భారతీయుల డబ్బు రోజురోజుకు పెరుగుతూనే ఉంది. కొత్తగా వచ్చిన లెక్కల ప్రకారం.. 2024లో స్విట్జర్లాండ్‌లోని బ్యాంకుల్లో భారతీయులు పెట్టిన డబ్బు ఏకంగా మూడు రెట్ల కన్నా ఎక్కువైంది. ఇది సుమారు 3.5 బిలియన్ స్విస్ ఫ్రాంక్‌లు (అంటే దాదాపు రూ.37,600 కోట్లు) అన్నమాట. స్థానిక బ్యాంకు శాఖల్లో ఇతర ఆర్థిక సంస్థల్లో ఈ డబ్బు ఎక్కువగా పెరిగిందని స్విట్జర్లాండ్ సెంట్రల్ బ్యాంక్ చెప్పింది. గతంలో అంటే 2023లో స్విస్ బ్యాంక్‌ల్లో భారతీయులు, మన కంపెనీలు పెట్టిన డబ్బు 70 శాతం తగ్గి, నాలుగేళ్ళ కనిష్ట స్థాయికి (రూ.1,040 కోట్లకు) చేరింది. కానీ ఈసారి, 2021 తర్వాత ఇదే అత్యధికంగా డబ్బు పెరిగింది. అప్పట్లో (2021లో) రూ.3,830 కోట్లకు చేరుకుని, 14 ఏళ్లలో అత్యధికంగా నమోదైంది.

ఈ లెక్కలు స్విస్ బ్యాంకుల నుండి ఎస్‌ఎన్‌బీకి అందిన అధికారిక వివరాలు మాత్రమే. స్విట్జర్లాండ్‌లో భారతీయులు దాచిన నల్లధనం ఎంత ఉందో ఈ లెక్కలు చెప్పవని ఎస్‌ఎన్‌బీ స్పష్టం చేసింది. అలాగే, భారతీయులు, ఎన్ఆర్ఐలు లేదా ఇతరులు వేరే దేశాల సంస్థల పేరుతో స్విస్ బ్యాంక్‌ల్లో పెట్టిన డబ్బు ఈ లెక్కల్లో లేదట. 2023 చివరి నాటికి స్విస్ బ్యాంక్‌లకు భారతీయ కస్టమర్లు చెల్లించాల్సిన మొత్తం డబ్బు 354.55 కోట్ల స్విస్ ఫ్రాంక్‌లు. ఇందులో కస్టమర్ల డిపాజిట్లు రూ.34.6 కోట్లు, ఇతర బ్యాంకుల ద్వారా పెట్టినవి రూ.302 కోట్లు, ట్రస్టుల ద్వారా రూ.4.1 కోట్లు, బాండ్లు, సెక్యూరిటీల రూపంలో రూ.13.5 కోట్లు ఉన్నాయని ఎస్‌ఎన్‌బీ చెప్పింది.

2006లో స్విస్ బ్యాంక్‌ల్లో మొత్తం డబ్బు దాదాపు 6.5 బిలియన్ స్విస్ ఫ్రాంక్‌లు (దాదాపు రూ.65,000 కోట్లు) రికార్డు స్థాయిలో ఉండేది. ఆ తర్వాత కొన్ని సంవత్సరాలు తప్ప, తగ్గుతూ వచ్చింది. విదేశీ కస్టమర్ల డబ్బు ఎక్కువగా ఉన్న బ్యాంకుల్లో బ్రిటన్ టాప్‌లో ఉంది (రూ.222 బిలియన్ స్విస్ ఫ్రాంక్‌లు). అమెరికా (రూ.89 బిలియన్), వెస్టిండీస్ (రూ.68 బిలియన్) తర్వాత స్థానాల్లో ఉన్నాయి. ఈ లిస్ట్‌లో భారత్ ప్రస్తుతం 48వ స్థానంలో ఉంది. గత సంవత్సరం (2023)లో మనం 67వ స్థానంలో ఉన్నాం. అయితే, 2022లో 46వ స్థానంలో ఉండేవాళ్ళం.

స్విస్ అధికారులు ఎప్పుడూ ఒకటే చెబుతారు. స్విట్జర్లాండ్‌లో భారతీయులు పెట్టిన డబ్బు అంతా నల్లధనం కాదని, పన్ను మోసాలను అరికట్టడానికి భారతదేశానికి పూర్తి మద్దతు ఇస్తున్నామని అంటున్నారు. 2018 నుండి స్విట్జర్లాండ్, భారతదేశాల మధ్య పన్ను వివరాలు ఆటోమేటిక్‌గా పంచుకునే ఒప్పందం ఉంది. దీని కింద, స్విస్ బ్యాంక్‌ల్లో ఖాతాలు ఉన్న భారతీయుల వివరాలు ప్రతి సంవత్సరం మన పన్ను అధికారులకు అందుతున్నాయి.