IPOs: ఐపీఓ మార్కెట్‌లో సరికొత్త చరిత్ర..రూ.2.23 లక్షల కోట్లు సమీకరించిన కంపెనీలు

IPOs: భారతీయ స్టాక్ మార్కెట్ చరిత్రలో ప్రైమరీ మార్కెట్ విభాగం అపూర్వమైన మైలురాయిని అధిగమించింది. సంవత్ 2082 కాలం(గ్రెగోరియన్ (ఇంగ్లీష్) క్యాలెండర్ ప్రకారం 2025–2026)లో దేశీయ కంపెనీలు ఐపీఓల ద్వారా ఏకంగా రూ.2.23 లక్షల కోట్ల రికార్డు స్థాయి నిధులను సమీకరించాయి. అక్టోబర్ 21, 2025 నుంచి నవంబర్ 6, 2026 మధ్య కాలంలో మొత్తం 375 మెయిన్‌బోర్డ్ అలాగే చిన్న, మధ్యతరహా సంస్థల (SME) ఇష్యూలు మార్కెట్లోకి వచ్చాయి. ఇందులో ప్రధానంగా మెయిన్‌బోర్డ్ ఇష్యూల ద్వారానే రూ. 2.12 లక్షల కోట్లు సేకరించగా, మిగిలిన మొత్తం ఎస్ఎంఈ ఆఫరింగ్‌ల ద్వారా సమకూరింది. అంతర్జాతీయంగా ఆర్ధిక సవాళ్లు ఎదురైనప్పటికీ భారతీయ మార్కెట్ సత్తా చాటడం విశేషం.

మెయిన్‌బోర్డ్ ఇష్యూల దూకుడు

గత సంవత్ సంవత్సరంతో పోలిస్తే ఈసారి మెయిన్‌బోర్డ్ ఐపీఓల సంఖ్య 26 శాతం పెరిగి 104 నుంచి 131కి చేరుకుంది. దీనివల్ల సమీకరించిన మొత్తం గత ఏడాది రూ. 1.78 లక్షల కోట్లతో పోలిస్తే 19.6 శాతం వృద్ధి చెందింది. ముఖ్యంగా ఈ నిధులలో సరికొత్త మూలధనం (ఫ్రెష్ కేపిటల్) రూపంలో రూ. 1 లక్ష కోట్లు వచ్చాయి. ఇది గత ఏడాది ఉన్న రూ. 70,641 కోట్లతో పోలిస్తే ఏకంగా 42 శాతం అధికం. కంపెనీల వ్యాపార విస్తరణ, ఉత్పత్తి సామర్థ్యం పెంపునకు ఈ నిధులు నేరుగా ఉపయోగపడటం విశేషం. ఇక ఆఫర్ ఫర్ సేల్ (OFS) ద్వారా రూ. 1.12 లక్షల కోట్లను ఇన్వెస్టర్లు వెనక్కి తీసుకున్నారు.

జియో ప్లాట్‌ఫామ్స్ నుంచి ఎన్‌ఎస్‌ఈ వరకు

ఈ రికార్డు కలెక్షన్‌లో కొన్ని ప్రముఖ సంస్థలు అగ్రస్థానంలో నిలిచాయి. ముఖేష్ అంబానీకి చెందిన జియో ప్లాట్‌ఫామ్స్ పూర్తిగా ఫ్రెష్ కేపిటల్ ద్వారా రూ.30,188 కోట్లు సేకరించి అతిపెద్ద ఐపీఓగా నిలిచింది. ఆ తర్వాత నేషనల్ స్టాక్ ఆఫ్‌ ఇండియా (రూ.22,563 కోట్లు), ఐసీఐసీఐ ప్రుడెన్షియల్ ఏఎంసీ (రూ.10,603 కోట్లు) సంస్థలు ఓఎఫ్‌ఎస్ ద్వారా భారీ నిధులను రాబట్టాయి. ఎస్బీఐ ఫండ్స్ మేనేజ్‌మెంట్ అలాగే మణిపాల్ హెల్త్ ఎంటర్‌ప్రైజెసెస్ కూడా టాప్-5 జాబితాలో నిలిచి మొత్తం నిధులలో దాదాపు 29.8 శాతాన్ని ఈ అయిదు కంపెనీలే దక్కించుకున్నాయి.

విదేశీ ఇన్వెస్టర్ల విక్రయాలు

విదేశీ సంస్థాగత ఇన్వెస్టర్లుభారతీయ మార్కెట్ల నుంచి భారీగా నిధులను వెనక్కి తీసుకున్నప్పటికీ, దేశీయ మ్యూచువల్ ఫండ్లు అలాగే రిటైల్ ఇన్వెస్టర్ల కొనుగోళ్ల బలం కారణంగా ఈ భారీ ఐపీఓలను మార్కెట్ విజయవంతంగా జీర్ణించుకుంది. ఆర్థిక సేవలు, ఇన్వెస్ట్‌మెంట్ రంగం అత్యధికంగా రూ.60,781 కోట్లను సేకరించి అగ్రస్థానంలో నిలిచింది. 131 మెయిన్‌బోర్డ్ ఇష్యూలలో 89 ఇష్యూలు తొలిరోజే ఇష్యూ ధర కంటే లాభాలతో ముగిశాయి. గ్రో ఆపరేట్ చేసే కంపెనీ, మీసో వంటి ప్రముఖ సంస్థల షేర్లు ఇన్వెస్టర్లకు అంచనాలకు మించి లాభాలను అందించాయి.

ఎస్ఎంఈ విభాగంలోనూ జోరు

మెయిన్‌బోర్డ్‌తో పాటు ఎస్ఎంఈ సెగ్మెంట్‌లో కూడా కంపెనీలు పెద్ద ఎత్తున నిధులను సేకరించాయి. ఈ విభాగంలో 244 ఇష్యూల ద్వారా రూ. 10,826 కోట్లు సమీకరించబడ్డాయి. ఇందులో 141 ఇష్యూలు లిస్టింగ్ రోజునే లాభాలను నమోదు చేశాయి. రాబోయే కాలంలోనూ ప్రైమరీ మార్కెట్‌లో ఇదే జోరు కొనసాగే సూచనలు కనిపిస్తున్నాయి. మార్కెట్ రెగ్యులేటర్ సెబీ ఇప్పటికే ఐఐఎఫ్‌ఎల్ ఫైనాన్స్, అర్జున్ జ్యువెలర్స్, సాగర్ డిఫెన్స్ ఇంజనీరింగ్ సహా పలు కంపెనీల కొత్త ఐపీఓలకు గ్రీన్ సిగ్నల్ ఇవ్వడంతో ఇన్వెస్టర్లలో ఉత్సాహం మరింత పెరుగుతోంది.