Kirana Market: మన ఇంటి పక్కన ఉండే కిరాణా కొట్టు ర్యాక్‌ల రూపురేఖలు వేగంగా మారిపోతున్నాయి. ఏళ్లుగా కొన్ని ప్రముఖ కంపెనీల ఉత్పత్తులు మాత్రమే కనిపించే షెల్ఫ్‌లలో ఇప్పుడు కొత్త తరం డెలివరీ అండ్ కన్జ్యూమర్ (D2C) బ్రాండ్లు దర్శనమిస్తున్నాయి. రిటైల్ ఇంటెలిజెన్స్ ప్లాట్‌ఫారమ్ బిజోమ్ విడుదల చేసిన తాజా గణాంకాలు ఈ విషయాన్ని స్పష్టం చేస్తున్నాయి. దేశంలోని సుమారు ఒక కోటి కిరాణా దుకాణాలను పరిశీలించగా, ప్రస్తుత ఆర్థిక సంవత్సరం మొదటి అర్ధభాగంలో కొత్త కాలపు వినియోగదారు బ్రాండ్ల మార్కెట్ వాటా ఏకంగా 21.7 శాతానికి చేరుకుంది. సరిగ్గా ఏడాది క్రితం ఈ వాటా కేవలం 14.8 శాతంగా మాత్రమే ఉండేది.

వినియోగదారుల అలవాట్లలో వస్తున్న మార్పులే ఈ పెద్ద మార్పుకు ప్రధాన కారణం. గతంలో ఆన్‌లైన్ లేదా సూపర్ మార్కెట్లలో మాత్రమే దొరికే ప్రీమియం ఉత్పత్తులు ఇప్పుడు నేరుగా వీధి చివరి షాపుల్లో అందుబాటులోకి వస్తున్నాయి. జైడస్ వెల్నెస్ సిఈఓ తరుణ్ అరోరా తెలిపిన వివరాల ప్రకారం.. చాలా కాలం తర్వాత కొత్త కంపెనీలు మార్కెట్ నిర్మాణాన్ని మార్చే శక్తిని చూపిస్తున్నాయి. వినియోగదారుల ప్రాధాన్యతలను సరిగ్గా అర్థం చేసుకోకుండా కేవలం పాత బ్రాండ్ ఇమేజ్ మీద ఆధారపడి వ్యాపారం చేయడం ఇకపై సాధ్యం కాదని ఆయన అభిప్రాయపడ్డారు.

ఈ మార్పుకు బ్యూటీ అండ్ పర్సనల్ కేర్ బ్రాండ్ ప్లమ్ ఒక మంచి ఉదాహరణ. పూర్తిగా డిజిటల్ బ్రాండ్‌గా ప్రయాణం ప్రారంభించిన ఈ సంస్థ ఇప్పుడు దాదాపు 30 శాతం ఆదాయాన్ని ఆఫ్‌లైన్ కిరాణా షాపుల ద్వారానే సాధిస్తోంది. దేశవ్యాప్తంగా 35,000 ఆఫ్‌లైన్ విక్రయ కేంద్రాలను ఈ సంస్థ ఏర్పాటు చేసుకుంది. వినియోగదారులు కూడా గుడ్డిగా బ్రాండ్ పేరు చూసి కాకుండా, క్వాలిటీ, సైన్స్ ఆధారిత ఫలితాలను ఇచ్చే ఉత్పత్తులను ఎక్కువగా కోరుకుంటున్నారు. దీంతో ధర కాస్త ఎక్కువగా ఉన్నప్పటికీ షాపుల యజమానులు సైతం ఈ కొత్త బ్రాండ్లను తమ స్టాక్‌లో ఉంచుకోవడానికి ఆసక్తి చూపుతున్నారు.

పట్టణాలతో పాటు గ్రామీణ ప్రాంతాలకు కూడా ఈ కొత్త బ్రాండ్ల విస్తరణ వేగంగా సాగుతోంది. గ్రామీణ ప్రాంతాల్లో పాత కంపెనీల షాపుల సంఖ్య స్వల్పంగా పెరిగినప్పటికీ, పట్టణ ప్రాంతాల్లో అవి 1.9 శాతం వరకు దుకాణాలను కోల్పోయాయి. కొత్త స్టార్టప్‌లు ప్రీమియం కస్టమర్లను టార్గెట్ చేస్తూ వేగంగా కొత్త ఉత్పత్తులను మార్కెట్లోకి తెస్తున్నాయి. అయితే బిజోమ్ నివేదిక ప్రకారం, ఈ కొత్త బ్రాండ్లకు ప్రవేశం సులభమైనప్పటికీ నిలదొక్కుకోవడం అతిపెద్ద సవాలుగా మారింది. పాత కంపెనీల బలమైన డిస్ట్రిబ్యూషన్ నెట్‌వర్క్ ముందర సుదీర్ఘకాలం సేల్స్ కొనసాగించడం అంత తేలికైన విషయం కాదు.

కొత్త తరం కంపెనీల దూకుడును గమనించిన పాత దిగ్గజాలు సరికొత్త వ్యూహానికి తెరతీశాయి. హిందూస్థాన్ యూనిలీవర్, మారికి, ఐటిసి, గాద్రెజ్ లాంటి పెద్ద సంస్థలు ఈ కొత్త బ్రాండ్లను కొనుగోలు చేయడం ప్రారంభించాయి. మినిమలిస్ట్, ఓజివా, బియర్డో, యోగా బార్, మదర్ స్పార్ష్, ప్లిక్స్, ట్రూ ఎలిమెంట్స్ వంటి పాపులర్ డిజిటల్ బ్రాండ్లు ఇప్పటికే బడా కంపెనీల చేతుల్లోకి వెళ్లాయి. ఈ కొనుగోలు చేసిన బ్రాండ్ల డేటాను కూడా కలిపితే కిరాణా మార్కెట్లో కొత్త తరం ఉత్పత్తుల ఆధిపత్యం ఇంకా చాలా ఎక్కువగా ఉంటుందని నిపుణులు విశ్లేషిస్తున్నారు.

Tags: